Observando Mundo

Realmente Nan Ta Mas Productivo?

“Un di cada cuater Canades ta traha awor mas cu 50 ora pa siman, compara cu un di cada 10 un decada pasa”, segun e corant Vancouver Sun. Un estudio federal cu a envolve 31.500 Canades cu ta traha, a saca afo cu “mita di e personanan cu a participa den e encuesta a bisa cu nan ta traha na cas of den weekend, regalando nan doño di trabou un 27 ora extra pa luna.” Un motibo fundamental ta tecnologia. Segun e corant, “e encuesta a revela cu casi tur e overtime sin pago cu ta ser haci na cas . . . ta trabou cu bo ta haci via computer.” Pesei, en bes di laga hende tin un siman di trabou di cuater dia y mas tempo liber, “tecnologia ta e causa principal cu ta aumenta e casonan di stress, malesa, agotamento, ausencia na trabou y tur otro gasto cu ta caba cu productividad.” E corant ta agrega: “Mayoria di e personanan cu a participa den e encuesta ta haya cu tecnologia a aumenta nan interes den nan trabou y a mehora nan productividad. Pero na mesun tempo, casi ningun hende no a bisa cu tecnologia a baha nan peso di trabou of e stress di trabou.”

E Costo di Matrimonio Kibra

Despues di a analisa mas cu 100 articulo publica di estudionan cu a ser haci durante mas cu dos decada, Rebecca O’Neill, gerente di proyecto di e Unidad di Investigacion di Famia di e organisacion Civitas, ta informa cu “pa hopi mama, tata y yiu, e ‘famia sin tata’ a resulta den pobresa, dolor di curason, mal salu, oportunidadnan perdi y un falta di stabilidad.” Segun e corant The Sunday Telegraph di Londen, O’Neill a bisa cu yiunan di mayornan diborcia of separa tawatin “50 porshento mas chens di sufri di problema cu salu, dos biaha mas chens di hui for di cas y cinco biaha mas chens di ser abusa.” E corant a agrega: “Yiunan cu ta biba sin nan tata natural tambe tawatin tres biaha mas chens di tin problema pa anda bon cu otro hende y pa haya nan cu problema na scol. Como teenager, nan tawatin dos biaha mas chens di bebe, huma, uza droga, . . . comete crimen, tene relacion sexual siendo menor di edad y di bira mama of tata siendo teenager.” Segun e informe, asta ora parehanan casa tawata mes pober y menos privilegia cu mayornan soltero, nan yiunan tawatin menos chens di experencia e problemanan ei.

Suicidio Ta Encabesa e Lista di Morto Violento

“Suicidio ta e causa principal di morto violento rond mundo”, segun e corant di Londen The Independent. E articulo, basa riba un informe di Organisacion Mundial di Salu, ta bisa cu 1,6 miyon hende a muri di varios tipo di violencia na aña 2000. Suicidio a exigi 815.000 bida e aña ei, mientras cu asesinato a exigi 520.000 y guera y conflicto a exigi 310.000 bida. E gran mayoria di morto na aña 2000 “a tuma luga den paisnan den desaroyo, mientras cu menos cu 10 porshento den paisnan desaroya”, segun e corant. Belarus, Estonia, y Lituania a registra porsentahenan di suicidio cu ta cuater bes mas halto cu di Gran Bretania. Na Africa y Nort y Sur America, e porsentahe di asesinato ta mas cu dobel e cantidad di suicidio, pero na Australia, Europa y Lehano Oriente, ta net lo contrario.

Muchanan Cu No Ta Drumi Suficiente

Keda sin drumi suficiente por tin efectonan desastroso riba un mucha su salu, segun e revista U.S.News & World Report. Muchanan cu no ta drumi suficiente tin problema cu siñamento na scol y por tin dificultad pa sera amistad. E revista ta informa cu “muchanan cu falta soño hopi bes tin un capasidad mas cortico di consentra, y nan tin mal beis, ta hiperactivo y sin pasenshi.” Docternan ta precupa cu hopi bes ta mayornan mes ta responsabel pa e problemanan aki. Psicoterapista di mucha, Barbara Braun-McDonald a bisa: “Si bo ta laga bo yiu keda lanta te 11 or djanochi pa boso por ta hunto como famia, lo bo tin cu reexamina bo bida.” Nan ta anima mayornan pa establece un ora fiho pa drumi y pa lanta, asta den weekend, pa asina forma un patronchi sano di drumimento. Otro sugerencianan ta inclui un rutina regular prome cu bai drumi, manera baña, sinta hunto brasa, lesa un historia pa e yiunan mas chikito, y no laga nan wak television ni sinta na computer durante e ora prome cu nan tin cu bai drumi.