E “Caya di Mas Steil”?

Kico ta haci Baldwin Street, cu ta keda na Dunedin, Nueva Zelandia, asina special? Pa hopi tempo, e stad di Dunedin a pretende cu e caya aki ta e caya di mas steil na mundo. Aunke tin otro luga cu tambe ta pretende esei, un cos ta sigur: Baldwin Street ta extraordinariamente steil.

E caya bon conoci aki a bira un destinacion turistico popular pa bishitantenan di rond mundo. No, bo no tin nodi ta un subido di sero pa bo yega te ariba. Bo por subi e caya aki di 359 meter na pia, pero nan ta desconseha hende di purba subie cu vehiculo di motor.

Ban Subi Hunto cu Nos

Tawata un dia cu solo cla ora ami cu mi dos compañeranan a para wak e caya nos dilanti cu ta subi bai te ariba. Asina cu nos a cuminsa nos caminata nos tawata hala rosea pisa mientras nos tawata leun dilanti pa mantene nos balansa. “Ta manera ta un muraya di beton bo ta subi”, un di nan ta bisa lenga afo. Net na ora nos ta topa un banki cu ta invita nos pa sosega un rato.

Nos ta sigui subi, y no ta dura hopi cu nos ta na e top ta gosa di e panorama y ta sosega pa por hala rosea normal atrobe. Abou nos ta mira careda nechi di cas y hardin bon teni. Leu na horizonte nos ta mira mondi di mata berde scur banda di sabananan di yerba berde; anto cu shelo blou den background.

Nos caminata te ariba no a kibra ningun record di velosidad. Despues cu nos a yega abou bek, nos a para pa saca un potret di nos logro y a pasa tuma nos copia di e Certificado di Logro cu e stad ta duna y cu ta bisa cu nos a subi e “Caya di Mas Steil na Mundo.”—Contribui.