E Cambio den Norma y Balor Bo Ta Sinti e Perdida?

“CUA ta e problema principal cu e pais ta confronta?” Mayoria di e hendenan cu nan a haci e pregunta aki den un encuesta na Merca a menciona e deterioro moral y di famia como e cos principal of un di e problemanan principal cu ta precupa nan. Anto, no ta nan so ta pensa asina.

Por ehempel, e corant International Herald Tribune di Paris a remarca: “Tin un anhelo palpabel, specialmente serca hobennan, pa un sorto di plan pa futuro cu lo trece union, un set di ideal generalmente reconoci cu cua por trata y controla e forsanan di golosidad, egoismo y falta di solidaridad cu ta parce di domina mundo. . . . E debate cu ta lanta awor tocante e necesidad di un etica mundial ta un manera di admiti cu falta algo.”

Bo ta haya cu gobierno- y lidernan mundial, incluso lidernan comercial, tin e norma- y balornan necesario pa hiba nos na un futuro mas felis, mas safe y mas sigur? Te na cierto grado, bo ta sinti manera cos cu algo a bai perdi debi na e cambio den norma y balor cu bo ta mira rond di bo?

Un asunto di hopi precupacion kisas ta bo siguridad personal. Bo ta biba den un area caminda ta safe pa laga bo cas habri? Anochi, bo por cana trankil riba caya den bo bario? Si bo ta fortuna pa biba den un area cu no tin guera abierto, conflicto etnico ni guera mortal entre gangnan, podise toch bo tin miedo cu hende ta ataca bo fisicamente, atraca bo, kibra drenta den bo cas of horta bo. Ta di compronde cu esaki ta causa angustia y laga bo sinti cu bo siguridad personal a bai perdi.

Fuera di esaki, kisas bo a perde—a lo menos te na cierto grado—e confiansa cu un tempo bo tawatin den hende. Podise bo a experencia—tanto na trabou of den bo bida personal—cu mas y mas hende ta inclina na perhudica bo, maske ta un tiki, si esei ta cumbini nan.

Pueblo Mester di Gobierno Su Ehempel

Atraves di historia, tawatin un conexion estrecho generalmente reconoci entre e norma- y balornan personal cu un sosiedad ta manifesta y e norma- y balornan cu su gobierno ta manifesta. Calvin Coolidge, cu despues a sirbi como presidente di Merca, a bisa: “Hende ta papia di derechonan natural, pero mi ta reta ken cu ta pa mustra unda den naturalesa cualkier derecho a yega di existi of ser reconoci prome cu a establece un cuerpo di lei corespondiente debidamente nombra pa declara y proteha e derechonan ei.”

Na final di cuenta, ta e gobierno na mando—sin importa con el a yega na poder—ta esun cu por promove of stroba derechonan civil, manera por ehempel libertad di prensa, libertad di reuni hunto, libertad di religion y libertad di papia den publico, libertad di aresto ilegal of di molester, y oportunidad pa haya un huicio imparcial.

Abraham Lincoln, cu despues a sirbi como presidente di Merca, a yega di bisa: “E meta legitimo di gobierno ta pa haci pa e comunidad, cualkier cos cu nan mester haci pa nan mes, pero cu definitivamente nan no por haci of no por hacie asina bon, riba nan mes como personanan individual.” Ora gobierno ta traha pa cumpli cu metanan eleva asina, hende ta inclina na confia esnan na poder.

Sinembargo, awendia ta parce cu duda y desconfiansa a remplasa tal siguransa y confiansa. Un estudio resien na Merca a informa cu 68 porshento di esnan entrevista ta haya cu e practicanan etico di funcionarionan federal ta mediocre of asta menos di loke ta adecua. Den hopi pais, hende su opinion di funcionarionan gubernamental a haya golpi door di escandalonan di soborno y corupcion na e nivelnan di mas halto. Ta di compronde anto cu esaki a pone hopi hende perde confiansa den otronan.

E Bon Ehempel di Rei Salomon

Tin un ehempel di antiguedad cu ta ilustra ki un impacto grandi norma y balor di esnan na poder por tin. Rei Salomon a goberna riba e 12 tribunan di Israel for di aña 1037 pa 998 prome cu nos era. Su tata, Rei David, tawata un di e reinan sobresaliente di Israel. Bijbel ta describi David como un amante di berdad y husticia y, mas cu tur cos, como un homber cu tawatin pleno confiansa den su Dios, Yehova. David a siña Salomon e mesun normanan ei.

Dios Todopoderoso a aparece na Salomon den un soño y a bis’e: “Pidi loke bo kier pa mi duna bo.” (2 Cronicanan 1:7) En bes di pidi gran rikesa, gloria personal y victorianan politico, Salomon a revela cua tawata e norma- y balornan cu tawata importante p’e: el a pidi un curason sabi, huicioso y obediente, di manera cu e por tawata un bon gobernante pa e nacion di Israel.

Con e gobernacion di Salomon a influencia e pueblo? Dios a bendiciona Salomon cu sabiduria, gloria y rikesa personal, tanten cu e tawata fiel na e norma- y balornan spiritual di e nacion. Descubrimentonan arkeologico ta confirma e prosperidad material di e reinado di Salomon. E buki The Archaeology of the Land of Israel (Arkeologia di e Pais di Israel) ta declara: “E rikesa cu a basha drenta e palacio real for di tur direccion, y e comercio floreciente . . . a ocasiona un revolucion rapido y riparabel den tur aspecto di cultura material.”

Si, e bon gobernacion di Salomon a trece pas, siguridad y felicidad pa su ciudadanonan. “Huda y Israel tawata biba den siguridad, cada homber bou di su mata di wendruif y bou di su palo di figo, for di Dan te na Beerseba, tur e dianan di Salomon.”—1 Reinan 4:20, 25.

E Mal Ehempel di Rei Salomon

Sinembargo, lamentablemente Salomon su norma- y balornan cu tempo a cambia, mescos cu ta pasa cu asina hopi lider djawe. E relato di Bijbel ta bisa: “E tawatin sheteshen esposa, princesnan, y tresshen concubina, y su esposanan a haci su curason desvia. Pasobra a sosode cu ora Salomon a bira bieu, su esposanan a haci su curason desvia pa sigui tras di otro diosnan; y su curason no tawata completamente dedica na SEÑOR su Dios, manera curason di su tata David tawata.”—1 Reinan 11:3, 4.

Ki efecto e cambio den Salomon su norma- y balornan tawatin riba su pueblo? Apesar di su gran habilidad y sabiduria, Salomon a bira un gobernante opresivo durante e ultimo parti di su reinado. E gastonan halto di su gobernacion a caba cu e economia di e nacion. E forsa laboral a bira malcontento. Rivalnan politico a resisti e rei y a busca manera di kita su poder. E nacion a perde gran parti di su solidaridad. Ironia ta cu ta Salomon mes a skirbi: “Ora cu e hustonan aumenta, pueblo ta regociha, ma ora cu un malbado ta goberna, pueblo ta suspira.”—Proverbionan 29:2.

Un poco despues di Salomon su morto, disturbionan politico y desconfiansa a pone e nacion parti na dos, y a sigui un periodo di sufrimento, desunion y deterioro. E Israelitanan a sinti un gran perdida. Nan gobierno a cambia su norma- y balornan, y a lubida loke ta na miho interes di e pueblo. E fayo basico tawata cu nan lidernan a ignora Yehova y su leinan. Pues, henter e nacion a sufri.

Falta di Confiansa Ta Tur Caminda Awe

Masha tiki hende den circulonan gubernamental, comercial y religioso ta presta atencion na mantene norma- y balornan halto. Esaki na su turno a pone cu e poblacion en general ta sinti un gran perdida den nan mente y curason. Gobierno y otro lidernan ta cada bes menos capas pa soluciona e problemanan basico di nan pais.

Por ehempel, nan no a logra pone un fin na guera ni frena e creciente costo di cuido medico ni e mal efectonan di traficacion ilegal di droga. E sistemanan di educacion tambe ta bai atras. Varios gobierno ta asta patrocina gamblemento organisa. Hopi lider comercial y religioso tambe a resulta di ta un decepcion sorprendente debi na nan accionnan corupto y inmoral. Pesei no ta straño cu tur caminda tin un falta di confiansa den e integridad di esnan cu hende ta mira na dje como lider.

Ta posibel pa un gobierno proteha y asta hiba delantera den sostene derechonan humano y norma- y balornan basico? Si, esei ta posibel. Nos articulo final lo splica con.

[Komentario na pagina 7]

‘Golosidad, egoismo y falta di solidaridad, ta parce di ta domina mundo.’—INTERNATIONAL HERALD TRIBUNE

[Plachinan na pagina 8]

Ora Rei Salomon a obedece e leinan di Dios, el a transmiti normanan halto na su ciudadanonan