Loke Bo Scohe Ta Afecta Bo Salu
HOPI bes ta un reto pa come saludabel y mantene un bon condicion. Debi na e presionnan djawe, sa parce cu ta mas cumbiniente pa come cuminda procesa cu ta laga bo sinti bon, cu prepara platonan cu ingredientenan fresco. Tambe ta parce mas facil pa pasa bo tempo liber dilanti di television of computer cu participa den actividad fisico. Sinembargo, loke hende ta scohiendo den e casonan aki por pone cu un cantidad creciente di adulto y mucha lo haya nan mes cu problemanan serio di salu.
Segun e revista Asiaweek, na Asia “comemento di cuminda mucho vet y zoet, y un bida di cada bes mas sintamento, ta causando un epidemia di diabetes.” Ta alarmante cu esnan cu ta haya diabetes den comunidad ta mas y mas jong. Y na Canada, segun e corant The Globe and Mail, “investigadonan a descubri cu solamente un di cada shete mucha bou di 13 aña ta come suficiente fruta y berdura [y] cu un tiki mas cu mita ta hunga suficiente pa pone nan soda.” E informe a sigui mustra cu e estilo di bida aki ta pone cu pa ora e hobennan aki yega 30 y pico aña, nan ta haya malesa di curason masha lihe.
Asina tambe expertonan di soño ta bisa cu adultonan mester drumi mas o menos ocho ora tur anochi y hobennan mester drumi asta mas tanto. De echo, den un estudio di Universidad di Chicago, yoncumannan saludabel cu a drumi pa solamente cuater ora, durante seis anochi consecutivo, a cuminsa manifesta sintomanan di malesa cu por lo general ta ser asocia cu biehes. Aunke hopi hende ta sacrifica oranan precioso di soño pa nan por dedica mas tempo na trabou, scol of placer, e resultadonan por ta contraproducente. James Maas, investigado di soño di Universidad di Cornell, New York, a bisa: “Funciona ta un cos. Pero ser alerta, creativo y no pega soño riba autopista, ta completamente un otro cos. ”
Claro cu tin mas factornan cu ta influencia nos bienestar fisico. Por ehempel, un punto di bista positivo por beneficia nos salu. Y ora nos tin un berdadero proposito den bida, esei por motiva nos pa tuma decisionnan cu lo yuda nos keda saludabel.