Manera Rayonan di Luna Cristalisa
Na april 2000, mineronan serca di Chihuahua, Mexico, a uza explosivo pa habri un tunnel mas o menos 300 meter bou di superficie di tera en busca di metal precioso. Segun cu Eloy Delgado di 40 aña tawata purba pasa door di un buraco chikito, el a bin descubri un cueba yen di cristal transparente y gigantesco. El a bisa: “E tawata bunita, mescos cu ora lus ta refleha for di un spiel kibra.” Un otro persona a bisa cu tawata como si fuera “rayonan di luna diripiente a haya substancia y bira solido.”
Expertonan ta kere cu e cristalnan aki ta esnan mas grandi na mundo. Tin di nan ta tamaño di palo di pino madura, y por ta midi te cu 15 meter halto y pisa mas cu dies ton! Jeffrey Post, director di e departamento di mineralnan na e Instituto Smithsonian na Washington, D.C., a bisa: “Ta algo sumamente asombroso pa mira cristalnan cu ta asina inmenso y perfecto.” El a remarca cu mayoria cristal na mundo ta asina chikito cu bo por tene nan den bo man.
E revista Smithsonian di april 2002 a describi con e cristalnan aki ta forma: “E awa cu tawatin den e cuebanan aki tawata yen di suafel di e depositonan di metal cu tin pega eibanda, y nan a cuminsa disolve e barancanan di calki, sacando gran cantidad di calcio. E calcio aki na su turno a mescla cu e suafel pa forma cristal na un escala nunca bisto pa hende.”
Aunke e temperatura y humedad den e cuebanan kisas ta ideal pa cristal, pa hende si, nan ta mucho fuerte. E temperatura ta banda di 65 grado Celsius, y humedad ta 100 porshento. Explorado Richard Fisher, e prome Norte Americano cu a bishita e cuebanan, a bisa: “Ora bo drenta den e cueba grandi ta como si fuera bo ta drenta den un forno supercayente.” El a agrega cu un persona por soporta e condicionnan aki pa solamente seis te dies minuut. Despues di esei, e calor y humedad ta bira insoportabel.
Descubrimento di e cristalnan inmenso aki ta un recordatorio adicional di e maraviyanan asombroso y abundante cu tin riba nos planeta, di cua gran parti kisas nos no a descubri ainda. Bo no ta di acuerdo cu e salmista cu a declara: “O SEÑOR, ki numeroso bo obranan ta! Cu sabiduria bo a traha tur; tera ta yen di loke bo a crea”?—Salmo 104:24.
[Reconocemento pa Potret na pagina 31]
Tur potret: © Richard D. Fisher