For di Nos Lectornan

Corte Supremo Danki pa e serie di articulonan di portada “Corte Supremo Mericano y Libertad di Expresion.” (8 di januari 2003) E articulonan aki a mustra cu ora mayoria hende den un comunidad tin prehuicio contra algo, hende por cuminsa considera cu sin duda esaki ta corecto. Mayoria hende ta bisa cu bo tin mag di kere den kico cu bo kier, pero ta prohibi pa papia tocante dje. Awor cu mi a lesa e articulonan aki, lo mi ta mas habri pa papia tocante mi creencianan religioso cu otro hende.

S. O., Hapon

Sin duda e caso di Stratton, Ohio, tawata un victoria pa libertad di expresion. E decision faborabel por combence hende na otro parti di mundo pa cambia nan opinion, manera aki na Filipinas, caminda na cierto area autoridadnan seglar ta exigi pa Testigonan di Yehova pidi un permit pa nan predica di cas pa cas. Nos ta gradicido pa e victoria aki cu ta asina necesario.

N. E., Filipinas

Abrolhos Mi tin 13 aña. Tawata masha dushi pa lesa e articulo “Habri Wowo pa Abrolhos.” (8 di januari 2003) Semper mi tawata interesa den parhanan straño, pero mi ta specialmente interesa den loke ta sosode den fondo di lama y riba islanan. Mi ta spera cu boso lo sigui publica articulonan asina.

V. J., Serbia y Montenegro

Embaraso Mas Safe Mi kier gradici boso pa e articulo “Con pa Haci Bo Embaraso Mas Safe.” (8 di januari 2003) E articulo aki a yuda mi mira claramente kico un embaraso ta encera. Mi tin 32 aña y mi tawatin echt mester di e articulo aki. Awor mi a compronde kico mi tin cu haci pa por tin un embaraso mas safe y mustra aprecio pa e regalo maraviyoso aki.

B. C., Italia

E articulo aki a menciona cu un hende mohe por laga haci un test pa wak si e tin e bacteria grupo B streptococcus durante su di 26 pa di 28 siman di embaraso. Un recomendacion mas resien ta pa haci e test aki durante e di 35 pa di 37 siman di embaraso y no durante e di 26 pa di 28 siman. Esnan cu a lesa e articulo aki probablemente lo puntra nan docter ta dicon e test no ta wordo haci durante e di 26 pa di 28 siman. Nan docternan por descarta Spierta! como un fuente di informacion confiabel pa nan pashentnan.

L. S., Merca

“Spierta!” ta contesta: Preparacion di nos revistanan ta tuma luga lunanan di antemano pa nan por wordo traduci na mas cu 80 idioma. Na momento cu a skirbi e articulo tocante embaraso mas safe, mayoria hende tawata considera cu ta na su luga pa laga haci e test entre e di 26 pa di 28 siman. Sinembargo, na luna di augustus 2002, e Academia Mericano di Pediatria a saca un informacion mas resien cu a keda aproba door di e Centro Mericano pa Combati y Preveni Enfermedad. Actualmente, manera e lesado a menciona corectamente, ta wordo recomenda pa haci e test aki durante e di 35 pa di 37 siman.

Na pagina 13, un nota na pia di pagina ta bisa cu tin hero y acido foliko den higra y noot. Sinembargo, higra tin hopi vitamina A—locual, manera boso articulo ta bisa, por ta peligroso pa baby.

B. J., Gran Bretania

“Spierta!” ta contesta: Danki pa e spiertamento.

Presion di Pareu Mi ta un mucha mohe di 15 aña y ta haya cu no ta facil pa trata cu presion di pareu. Mi a keda encanta cu e articulo “Hobennan Sa Puntra . . . Con Mi Por Trata cu e Presion di Mi Pareunan?” (8 di januari 2003) Ora mi a lesa cu otro hobennan tin e mesun problema cu mi, mi a haya un consuelo pa sa cu no ta ami so ta pasa den esaki. Nos por vence presion di pareu cu yudansa di e unico Dios Todopoderoso. Masha danki pa e informacion aki cu a yega net na ora.

K. R., Australia

[Reconocemento pa Potret na pagina 30]

Potret di Josh Mathes, Collection of the Supreme Court of the United States