Cambio di Moda Atraves di Historia

SEA cu nos ta realisa esei of no, nos decisionnan diario relaciona cu kico nos lo bisti ta ser determina te na cierto grado pa loke ta na moda. Na final di cuenta, ta moda ta determina pa gran parti kico tin pa cumpra.

Asta pañanan cu awor nos ta considera comun y coriente, un tempo tawata e ultimo moda. Por ehempel, camisa y dashi a bira e ultimo grito di moda mas cu un siglo pasa. Y den decada di 1920 sweater di hende mohe a bira un style cu a keda te awe.

Tin dos cos basico cu ta stimula e industria di moda: e deseo pa algo nobo, y e deseo pa cuadra cu e normanan cu ta reina. Casi tur hende gusta bisti un cos nobo. Ta pesei tin biaha nos ta cumpra paña, no pasobra esun cu nos tin a gasta, sino djis pasobra nos kier un cambio. Ademas, nos no kier ta inapropiadamente bisti, pesei nos ta cumpra paña cu te na cierto grado ta cuadra cu e style cu nos amigo- of compañeronan ta bisti. Atraves di siglonan e industria di paña a satisface y tin biaha probecha di hende su deseo pa cos nobo y nan deseo pa ta na conformidad cu cierto grupo.

Un Historia Kortiku di Moda

Pa crea un style, diseñadonan ta uza cinco elemento basico: colo, silueta, forma cu e paña ta kai, textura di e tela, y corte (of diseño di e tela). Den transcurso di añanan e opcionnan cu diseñado- y cosedonan tin na nan disposicion den tur e cinco areanan aki a aumenta drasticamente. Por ehempel, den antiguo Egipto linen (lino) transparente localmente produci tawata e tela preferi, y e tawata ideal pa un clima cayente. Pero como cu no tawata facil pa tiña linen, e tawata normalmente un solo colo: blanco gebleach. Sinembargo, diseñadonan di moda egipcio a plisa e tela di manera cu nan pañanan a haya un nechi forma y tawata cai na un manera bunita. Asina nan a crea un di e stylenan cu a dura mas largo na mundo.

Ya pa den prome siglo di nos era, tawatin tela- y colonan nobo disponibel. Romanonan rico a importa seda for di China of India, aunke e gasto pa transporta tela di seda puro tawata mes costoso cu oro. Un otro tela masha na moda tawata lana (wol) di tiña importa for di Tiro. Un liber di lana por a costa 1.000 denario, cu ta tres aña di salario pa un trahado tipico. E tiña- y telanan nobo a permiti mohenan rico Romano bisti stola—un bisti largo y hancho—di catuna blou importa for di India of kisas di seda geel importa for di China.

Aunke den epocanan di pasado stylenan nobo tawata sali periodicamente, un bisti caro probablemente a keda na moda durante henter un hende su bida. Cambionan a tuma luga lentamente y por lo general tawatin efecto riba solamente e hendenan di clase halto. Pero cu binida di e revolucion industrial, moda a bira mucho mas importante pa e pueblo comun.

Durante siglo 19, hopi industria a lanta pa produci paña tanto pa hende rico como pa esnan pober. Tawatin un aumento den fabricanan cu ta uza mashin pa produci tela di catuna y di lana, y prijs di tela a baha. Mashin di cose a yuda produci paña mas barata, y tiñanan artificial a ofrece un seleccion hopi mas grandi di colo.

Cambionan social y tecnologico a hunga un papel asta mas grandi den produccion di paña pa e pueblo comun. Den West Europa y Norte America, hende tawatin mas placa pa gasta. Den decada di 1850, nan a cuminsa publica revistanan di hende mohe, y poco tempo despues pacusnan grandi a cuminsa ofrece paña kosi caba na diferente size. Den siglo 19 tambe Charles Frederick Worth a introduci show di moda, den cua a uza hende pa modela paña y asina stimula interes di posibel clientenan.

Den siglo 20, materialnan sintetico nobo manera rayon, nylon y poliester, a ofrece fabricantenan un seleccion mas amplio di tela. Debi na diseñonan computerisa tawata facil pa produci stylenan nobo, y globalisashon a pone cu lo ultimo den stylenan di moda por a aparece casi simultaneamente na Tokio, New York, Paris y São Paulo. Mientrastanto, diseñadonan y fabricantenan a haya maneranan nobo pa promove nan producto.

Awendia ta hobennan a tuma luga di hende rico como e fanaticonan di moda. Tur luna, miyones di hoben ta cumpra paña nobo, y e industria di paña ta produci miles di miyones di florin na paña tur aña.a Pero tin trampanan scondi den ser fanatico di moda?

[Nota]

[Cuadro/Plachinan na pagina 4, 5]

Esnan Cu Ta Dicta Moda

Pa siglonan, ta reinan y hende di clase halto a dicta e norma di bisti. Den siglo 17, Rei Louis XIII di Francia a dicidi di bisti un peluca pa tapa su cabes pelon. No a tarda hopi cu aristocratnan Europeo a cuminsa feita nan cabes y bisti peluca, un style cu a keda na moda pa mas cu un siglo.

Den siglo 19, revistanan di hende mohe a cuminsa publica loke ta na moda y asta a ofrece patronchinan barata pa asina hende mohe mes por a cose nan pañanan. Den siglo 20, segun cu pelicula y television a bira mas popular, artistanan a bira idolonan internacional y a cuminsa dicta stylenan di moda. Musiconan popular tambe a cuminsa bisti stylenan extremo, locual hobennan a core imita. Awendia, casi nada no a cambia, ya cu hacidonan di propaganda ta haci bon uzo di shownan di moda, revistanan yamativo, borchinan grandi di propaganda, showcase di pacusnan y television, pa genera un demanda pa paña nobo.

[Plachi]

Rei Louis XIII

[Reconocemento]

For di e buki The Historian’s History of the World

[Plachi na pagina 4]

E bisti di linen aki di antiguo Egipto tawata un di e stylenan cu a dura mas largo

[Reconocemento]

Potret saca pa cortesia di British Museum

[Plachi na pagina 4]

Na antiguo Roma hende mohe a bisti un stola

[Reconocemento]

For di e buki Historia del Traje, 1917

[Plachi na pagina 4, 5]

Kimono ta na moda for di alrededor di aña 650 di nos era

[Reconocemento]

For di e corant La Ilustracion Artistica, Volumen X, 1891

[Plachi na pagina 5]

Den epocanan di pasado, un bisti caro probablemente a keda na moda durante henter un hende su bida

[Reconocemento]

EclectiCollections

[Plachi na pagina 5]

E revolucion industrial a haci posibel pa hende comun y coriente ta mas conciente di moda

[Reconocemento]

EclectiCollections