E Banda Scur di Encanto Fisico

NO TIN duda cu sigui moda, por yuda bo mehora bo aparencia y duna bo mas confiansa den bo mes. Paña cu ta para bo bon por minimisa algun defecto fisico y asta realza bo puntonan mas atractivo. Tambe esei por influencia e manera cu hende ta mira bo.

Pero e mundo di moda tin un banda scur cu bo no por ignora. Cumpradonan por bira catibo di cumpramento di paña nobo constantemente. Pasobra no lubida, e industria di moda ta sigui produci stylenan nobo na granel. Esaki no ta pa casualidat. Casnan di moda ta haci mas ganashi ora cu pañanan ta bai for di moda lihe. Manera e diseñado di moda Gabrielle Chanel a expres’e: “Moda ta traha pa bai for di moda.” Pues, e consumido cu no ta alerta kisas ta sintie obliga na cumpra paña nobo djis pa e keda den style.

Tambe tin e peliger di cai pa e presion sutil di propaganda. Companianan di moda ta gasta miyones di florin na promocion di nan productonan, y hopi bes nan propaganda ta presenta un bida sin precupacion cu e hendenan cu ta bisti nan marca supuestamente ta gosa di dje. E mensahenan aki por tin un impacto poderoso. Segun un juffrouw di scol na Spaña: “No tin nada mas traumatico pa un teenager cu ora e no tin e ‘marca corecto’ di sapato.”

E Tentacion pa Sigui e Ultimo Grito di Moda

Algun grupo ta uza un cierto style di paña pa identifica nan mes. Loke nan ta bisti podise ta transmiti un rechaso di sosiedad, un estilo di bida liberal of asta idealnan violento of rasista. Aunke algun di e stylenan aki kisas ta escandaloso of asta sumamente ofensivo, por lo general mayoria hende di e grupo ta bisti e mesun tipo di paña. Asta algun persona cu no ta apoya e grupo su idealnan kisas ta gusta e style. Esnan cu ta sigui e stylenan aki por duna otro hende e impresion cu nan ta comparti y promove e creencianan basico di e grupo.

Stylenan cu ta ultimo grito di moda generalmente ta cambia, y tin biaha den un par di luna. Kisas ta un musico popular of un otro persona cu ta dicta moda a bin cu ne. Pero tin algun style cu ta bin na moda y ta keda. Por ehempel, blue jeans tawata popular serca hobennan cu tawata participa den manifestacionnan di protesta den e decadanan di 1950 y 1960. Sinembargo, awor hende di varios edad ta bisti carson di jeans na tur tipo di ocasion.

E Buskeda di un Figura Perfecto

Hende cu ta tuma moda mucho na serio por bira demasiado precupa cu nan aparencia. Modelonan por lo general ta halto y delega, y constantemente nos ta wordo bombardia cu nan imagen.a Companianan ta uza e figura “perfecto” pa bende tur cos; for di auto te mangel. E Centro di Investigacion Sociologiko di Gran Bretania ta calcula cu “awendia mucha mohenan ta mira den un solo dia mas imagen di mohenan excepcionalmente bunita, cu nos mamanan a mira durante henter nan adolecencia.”

E avalancha aki di imagennan di modelo cu un figura perfecto por tin un efecto perhudicial. Por ehempel na Merca, un encuesta cita den Newsweek a saca afo cu 90 porshento di teenager colo cla tawata malcontento cu nan curpa. Tin di nan lo haci casi cualkier cos pa nan logra e ‘figura ideal.’ Sinembargo, segun e Centro di Investigacion Sociologiko, menos cu 5 porshento di e poblacion femenino por alcansa e peso y size ideal cu medionan di comunicacion ta propaga. Apesar di esei, e admiracion extremo di un figura superflaco a pone miyones di mucha mohe bira catibo di dieta y ehercicio. Esei a pone algun di nan desaroya e trastorno anorexia nervosa, un trastorno di come sumamente dificil pa libra di dje.b E modelo Spaño Nieves Álvarez, kende tawata sufri di anorexia, a admiti: “Mi tawatin mas miedo di subi di peso cu di muri.”

Ta berdad cu por tin varios otro factor cu ta causa trastornonan di come manera anorexia y bulimia. Sinembargo, Dr. Anne Guillemot y Dr. Michel Laxenaire a declara: “E veneracion di un figura delega tambe pa un parti ta responsabel pa esei.”

Ta bisto anto cu moda tin un banda positivo y un banda negativo. E ta satisface hende su deseo basico di ta representabel y di tin algo nobo di bisti. Pero extremonan di moda por pone nos bisti paña cu ta duna otro hende e impresion robes. Y si nos ta duna demasiado importansia na aparencia, nos lo por kere ekibocadamente cu nos balor ta depende di nos ‘empake’, nos aparencia exterior, na luga di nos norma- y balornan interno. Nieves Álvarez, cita anteriormente, a bisa: “Nos tin cu cuminsa duna mas balor na un hende su capasidat y personalidad, cu na djis e emboltura.” Pero ta masha improbabel cu lo bini un cambio den esei pronto. Pues anto, con nos por haya un punto di bista balansa di moda?

[Nota]

[Cuadro/Plachinan na pagina 8, 9]

Tin Hende Cu Echt Lo Bisti e Cos Ei?

Tur lente y herfst, e casnan di moda di New York, Paris y Milan ta modela bistinan exclusivo di diseñadonan famoso. Fuera di nan prijs exorbitante, hopi di e creacionnan aki ta parce sumamente impractico y asta imposibel pa bisti. E diseñado Spaño, Juan Duyos, a bisa: “E diseñonan extrabagante y escandaloso cu bo ta mira, eigenlijk no ta wordo crea pa e publico en general bisti. E proposito di e show di moda kisas ta mas pa hala atencion na e diseñado of na e marca, cu pa bende e pañanan cu nan ta modela. Por ehempel, un coleccion impresionante cu medionan di comunicacion a comenta ampliamente riba dje, lo por yuda bende un perfume di marca.”

[Plachi na pagina 7]

Por ta costoso pa sigui e ultimo gritonan di moda

[Plachi na pagina 7]

Bistimento di algun paña cu ta na moda por identifica bo cu un cierto grupo

[Plachi na pagina 7]

Algun persona a desaroya anorexia, un trastorno dificil pa libra di dje