Un Punto di Bista Balansa di Moda

BIJBEL ta bisa cu “tur cos [Dios] a haci bunita na su tempo.” (Eklesiastes 3:11, NW) Nos ta mira bunitesa tur caminda den e mundo rond di nos. Tambe nos ta mira bunitesa den hende.

Un diseñado di moda ta purba realza nos bunitesa mediante e pañanan cu nos ta bisti. Pero, manera e articulo anterior a trece dilanti, e industria di moda a cambia tambe e concepto di kico ta bunita. Ruth Striegel-Moore, profeser di psicologia, a remarca: “Nos a custumbra asina tanto di mira hende mohe sumamente flaco, cu awor nos ta pensa cu ta esaki ta bunita.”

Ta bisto anto cu lo no ta sabi pa laga mundo su concepto actual di bunitesa presiona nos pa pensa mescos cu ne. Den su buki Always in Style (Semper den Style), Doris Pooser ta bisa cu “hende mohe djawendia no tin nodi cambia of camufla nan curpa ki ora cu surgi un curpa ‘ideal’ nobo.” Y esei ta berdad. Pakico nos mester laga medionan di comunicacion dicta pa nos loke nan ta haya ta bunita? Pooser a bisa: “Ta hopi mas facil pa nos ta nos mes, en bes di purba desesperadamente di cambia loke nos tin.”

Bunitesa Duradero

Confiansa propio y satisfaccion den bida ta depende di hopi mas cos cu solamente un bunita aparencia. Judy Sargent, un expashent di anorexia, a skirbi: “Berdadero felicidad ta sali di paden. E no ta depende di e peso cu bo balansa den baño ta duna.” Bijbel ta bai asta un stap mas leu. Apostel Pedro a skirbi: “Boso bunitesa mester sali for di loke boso tin den boso curason, e bunitesa duradero di un spirito suave y trankil. Ta e bunitesa ei ta esun di mas balioso den bista di Dios.”—1 Pedro 3:4, Beibel na papiamentu koriente.

E bunitesa duradero cu Pedro a referi na dje ta surpasa encanto fisico debi cu e ta permanente y ta di gran balor den bista di Dios. Hopi siglonan pasa un rei sabi a remarca: “Ser atractivo ta engañoso y bunitesa ta banidad, ma un mohe cu ta teme SEÑOR, esei lo wordo elogia.”—Proverbionan 31:30.

Aunke bunitesa fisico kisas ta atrae mas atencion awe, hopi hende toch ta respeta e persona cu ta desplega cualidadnan cristian. Apostel Pablo a anima cristiannan: “Bisti e hende nobo . . . bisti un curason di compasion, cariño, humildad, mansedumbre y pasenshi.”—Colosensenan 3:10, 12.

Moda riba su mes ta algo pasahero. Asta desde e punto di bista di mas faborabel, e ultimo style por dorna nos djis pa un tempo cortico. Pero cualkier bon impresion cu nos haci lo no dura masha si nos aparencia no ta wordo compaña pa un personalidad agradabel. Corda cu “fruta di e spirito”—cu ta inclui amor, goso, pas, pasenshi, bondad y dominio propio—nunca no ta bai for di moda.—Galationan 5:22, 23; 1 Timoteo 2:9, 10.

Sinembargo, nos tin cu bisa si, cu ta na su luga pa duna e debido atencion na nos pañanan. Aline, di Francia, ta admiti cu tawata dificil pa e keda balansa den esaki. El a conta: “Como teenager, mi tawata hopi interesa den bistimento. Mi kier a sigui e ultimo moda pasobra esei a duna mi confiansa den mi mes. Y si mi por a cumpra paña di marca, miho ainda.”

Aline a sigui bisa: “Pero ora mi a bira grandi, mi mester a siña mantene mi mes financieramente, y tambe mi a cuminsa pasa gran parti di mi tempo den e sirbishi cristian. Mi a bin realisa cu si mi kier a biba segun mi forsa, mi no por ta catibo di moda mas. Mi a cuminsa cumpra paña ora tin baratiyo of na pacusnan di descuento. Mi a descubri cu mi por a sigui bisti bon, pero na un cuart di e prijs. E secreto ta sinta den cumpra paña cu ta keda bo bon, cu ta practico, cu ta combina bon cu loke bo tin caba, y cu lo no bai umbes for di moda. En bes di laga moda dicta kico mi mester cumpra, awor ami ta purba dicidi ki style ta bai bon cu mi. Mi no ta bisa cu paña no ta importante mas pa mi. Pero mi balor como persona ta depende di mas cos cu solamente mi aparencia.”

Den un sosiedad caminda hopi bes hende ta considera bo aparencia exterior di mas balor cu bo berdadero cualidadnan, cristiannan ta haci bon di tene e recordatorio serio aki di Bijbel na mente: “Nada di loke mundo ta ofrece no ta bini di Tata, esta deseonan pecaminoso, gana di cosnan cu ta atrae bista di hende y cana pronk cu loke bo tin, ma tur ta bini di mundo. Ademas, mundo y su deseonan ta pasahero, ma esun cu haci boluntad di Dios ta biba pa semper.”—1 Huan 2:16, 17, BPK.

[Plachi na pagina 9]

Berdadero bunitesa ta sali di bo paden, no di loke bo tin bisti

[Plachi na pagina 10]

Scohe pañanan cu ta practico y cu ta combina bon cu loke bo tin kaba