Su Scriptie A Haci un Gran Impresion

Durante su ultimo aña na scol, Ginny, un Testigo di Yehova na Merca, a haya un bon chens pa papia tocante su religion. El a conta: “Mi juffrouw a bisa nos klas cu nos mester traha un scriptie pa nos haya nos diploma. Mi a bis’e cu mi kier a skirbi tocante Testigonan di Yehova den camponan di consentracion Nazi.”

E juffrouw a acepta pa Ginny skirbi tocante e topico ei. Ginny a admiti: “Mi tawata nervioso ora e dia a yega pa entrega mi scriptie y duna un spreekbeurt riba dje dilanti di klas. Mi no tawata sa kico e muchanan den klas lo a bisa ni si nan lo a tenta mi.”

Ginny a cuminsa su presentacion cu e pregunta: “Boso sa ken tawata bisti e Streya di David den e camponan di consentracion Nazi?” Tur hende a bisa: “E Hudiunan.” Anto el a puntra nan ta ken tawata bisti un triangulo pus. Ningun hende no tawata sa. Ginny a bisa: “Mi a conta nan cu ta Testigonan di Yehova.”

E juffrouw y e klas a keda impresiona cu e informacion cu Ginny a presenta. Segun Ginny: “Nan a keda hopi impresiona pa e echo cu Testigonan di Yehova por a haya nan libertad simplemente door di firma un papel den cua nan ta renuncia nan religion. Despues algun mucha di mi klas a bisa mi cu antes nan tawata haci bofon di Testigonan di Yehova, pero cu e siguiente biaha cu un Testigo pasa na nan cas, nan lo scucha.”

Ginny a haya cuater 10 pa su scriptie y spreekbeurt. E di: “Mi a haya un bon punto, pero tambe un bon chens pa papia tocante mi religion!”

[Plachi na pagina 11]

Nan a ofrece hopi Testigo di Yehova libertad, basta cu nan firma e documento aki renunciando nan religion

[Reconocemento]

Cortesia di United States Holocaust Memorial Museum