Despues di e Explocionnan

DI UN ESCRITOR DI SPIERTA! NA ECUADOR

D IA 20 di november 2002, tawata un dushi dia den e stad Ecuatoriano Riobamba. Shelo tawata blou, cu nubianan blanco manera catuna. E volcannan rond di e stad cu nan top blanco di sneu a pas bon pa un postkaart. E 124.000 hendenan cu a biba einan, 2.700 meter halto den Seronan di Andes, tawata ocupa cu nan keaseres di tur dia, sin sa cu e trankilidad aki tawata a punto di wordo interumpi violentamente. Diripiente, den e trankilidad di atardi, tawatin un explosion teribel! Bentana- y flurnan a cuminsa tril. Y rapidamente un nubia menasante, cu a parce un padestul, a cuminsa forma.

Den menos cu dies minuut un di dos explosion a tuma luga, compaña pa un presion inmenso cu a bula tur bentana y saca portanan for di nan scarnir. Anto un nubia di candela y huma—hopi mas grandi cu esun prome—a aparece. Un serie di explosion y flash di lus a sigui.

José cu su casa Ana, ambos Testigo di Yehova, ta un pareha di 60 y pico aña cu tawata biba un 400 meter for di caminda e explosion a tuma luga. E forsa di e explosion a benta nan abou. Ana tawata para banda di e porta dilanti ora cu e presion di aire a ranca e porta y lag’e bai dal contra un muraya patras. Segun cu e pareha morto spanta tawata core bai na e parti patras di nan cas, blafon a cuminsa cai riba nan. Di un manera of otro nan a logra sali den un patio chikito, caminda den un skina nan a brasa otro y cuminsa haci oracion. Afortunadamente, un 15 minuut despues nan yiu homber a yega cu auto pa hiba nan na un luga mas safe.

No ta cu tur hende a bai mes bon. Despues di e explosion a surgi panico. Cantidad di hende a hui na pia. Meimei di gritamento tawatin hende cu a slip cai riba glas kibra cu tawatin plama riba acera. Auto, bus y truck tawata core sali for di e stad cu velosidad masha halto, y algun tawata pasa den verboden! Hopi hende cu a hui for di nan scol of trabou no tawata sa pa casi 24 ora con a para cu nan miembronan di famia.

Kico a causa tur e caos aki? Un candela den e arsenal subteraneo di un base militar pega cu e stad. Esaki a pone cu un gran cantidad di vuurpijl, granat di man y proyectil di tanki y di mortero a keda explota un tras di otro. Segun cu e explosionnan a sigui, autonan di polis tawata anuncia via loudspeaker cu tur hende mester a bai por lo menos un distancia di 15 kilometer for di e stad.

Poco despues Riobamba a keda desola. Miles di ciudadano local a yena e autopista pafo di e stad, nan tawata gekrimp hunto den e aire friu di anochi, hopi di nan sin jas of jacket. Despues di varios ora e explosionnan porfin a cuminsa mengua. E temperatura friu, serca di cero grado, a pone e habitantenan cuminsa cana bai bek den direccion di e stad, aunke cu cuidou. E siguiente mainta, ora a bira cla, hopi hende a descubri cu e explosionnan a causa daño severo na bentana, porta, dak, blafon y muraya di nan cas. Un famia a haya varios pida glas manera puñal hinca den un matras den camber. Otronan a haya fragmentonan di proyectil y municion den nan cas y pafo di cas.

Informenan inicial a menciona cu tawatin por lo menos 7 morto, 538 herido y 18.000 cas cu a sufri daño. Di e 950 Testigonan di Yehova den e area, ningun no a perde nan bida, aunke dos a wordo trata pa cortanan grave.

Yudansa pa e Esnan Aflihi

E mainta despues di e explosionnan, ancianonan di e congregacionnan local di Testigo di Yehova a cuminsa bishita nan rumannan cristian pa wak con a bai cu nan. Mas laat riba e dia ei, un superintendente biahero di Testigonan di Yehova a reuni cu anciano di 13 congregacion cu ta keda tanto paden como pafo di e stad pa evalua cuanto daño y lesion tawatin. El a anima e ancianonan pa atende e necesidadnan emocional y spiritual di e sobrevivientenan. Tawata sumamente importante pa e rumannan asisti na e reunionnan cristian, asta bou di e circunstancianan dificil ei! (Hebreonan 10:24, 25) Pues, e congregacionnan local a tene nan reunion custumbra e anochi despues di e desaster.

Riba diahuebs y diabierna, nan a compila un informe detaya di e daño causa na e casnan di Testigonan y a mand’e pa e sucursal local di Testigonan di Yehova na Guayaquil. E informe a menciona cu e cos mas urgente tawata pa tapa e centenares di bentananan kibra pa asina proteha e habitantenan contra friu. Den un par di ora e sucursal a cumpra rolnan grandi di plestik transparente, tambe tape y clabo di staal, pa por a haci e reparacionnan temporal.

Un truck cu material for di sucursal a yega diasabra mainta 9’or. Teamnan di Testigo di Yehova, consistiendo di hende homber y mohe, ya caba tawata yuda nan compañeronan Testigo piki glas kibra for di den nan cas pa asina nan por a cuminsa pega e plestik. Tur trabou a wordo cordina for di un Salon di Reino local. Nan a pone marca riba flur pa asina nan por a midi e plestik mas lihe. Uzando e midinan cu nan a haya di e teamnan di ausilio, nan tawata corta e plestik na midi y despues entreg’e na e teamnan cu tawata warda riba nan.

José, menciona anteriormente, a conta: “Ora nos a yega cas e atardi despues di e explosion, ya caba e rumannan tawata limpia e luga. Riba diasabra mi biciña a bin serca mi na cas y a comenta cu e hendenan a haci un bon trabou di pega e plestik riba mi cas, y el a puntra mi: ‘Cuantu tur esaki a costa bo?’” E biciña a keda babuca ora el a tende cu e rumannan a haci esaki gratis!

Pa diasabra anochi, aproximadamente 200 boluntario di e congregacionnan local a tapa e bentananan di 91 cas di Testigo di Yehova. Hopi persona cu no ta Testigo tambe a beneficia. Un corant local a publica un potret di un cas cu e Testigonan a traha ariba, y a comenta cu di e ocho habitantenan di e cas, ta un so ta Testigo di Yehova.

Sosten Emocional

Ta mas cu claro cu e explosionnan a causa hopi angustia emocional. Pa percura consuelo pa e Testigonan local, tawatin un reunion special riba dialuna, 25 di november, 5’or djatardi. A manda representantenan di e sucursal di Ecuador pa dirigi e reunion. Debi cu no tawatin coriente, nan no por a tene e reunion mas laat den anochi. E rumannan a spera un asistencia di mas o menos 600 persona so, como cu e ora a parce un poco incumbiniente. Sinembargo, 1.421 persona, incluso algun biciña cu no ta Testigo, a yena e Salon di Asamblea di Riobamba! Un texto clave cu nan a considera durante e programa tawata Salmo 4:8: “Na pas lo mi bai drumi y pega soño, pasobra ta abo so, o SEÑOR, ta haci mi biba den siguridad.” Tur esnan presente a expresa masha aprecio pa e programa spiritual cu a consola nan.

Na final di e programa nan a parti pa mayornan centenares di ehemplar di e articulo di Spierta! “Yuda Bo Yiunan Enfrenta Desasternan Natural” (na Spaño, 22 di juni 1996). Un paragraf di e articulo ta declara:

“E Agencia Federal Mericano pa Maneho di Emergencia, [conoci como FEMA (abreviacion na Ingles)], ta bisa cu inmediatamente despues di un desaster, muchanan normalmente tin miedo (1) cu nan ta wordo bandona, (2) cu ta separa nan for di nan famia, (3) cu e suseso ta bolbe ripiti y (4) cu un hende lo wordo herida of ta muri.” Basa riba e articulo aki, a urgi mayornan pa:

1. Purba mantene e famia hunto.

2. Tuma tempo pa splica e situacion cu calmo.

3. Anima e muchanan pa expresa nan mes.

4. Inclui e muchanan den e trabounan di limpiesa.

Despues a parti e ehemplarnan di e articulo di Spierta! cu a resta pa biciña- y studiantenan di Bijbel.

Tres siman despues di e explosion, a cumpra material pa haci reparacionnan mas permanente, incluso pa instala bentana, blafon y dak nobo. Despues di tres siman mas, nan a termina cu e proyectonan aki, y tambe cu e reparacion di dos Salon di Reino. Tawatin masha hopi expresion di gratitud pa e yudansa amoroso aki.

Durante e “ultimo dianan” aki, ta comun cu diferente tipo di desaster ta tuma luga. (2 Timoteo 3:1-5) Sinembargo, e sosten cu Testigonan di Yehova ta duna nan rumannan y nan prohimo ta mustra cuanto poder cristianismo berdadero tin. José a expresa esaki bon ora el a bisa: “Yehova su organisacion no ta tarda pa yuda nos ora nos ta den necesidad.”

[Plachinan na pagina 15]

Un 200 Testigo a ofrece nan mes pa yuda haci limpi. Nan a midi, corta y instala bentananan nobo. Tambe nan a cambia dak