For di Nos Lectornan

Sentidonan Asombroso Mi tin 15 aña di edad y ta for di tempo cu mi a siña lesa mi a cuminsa lesa boso revistanan. Danki pa e serie “Bo Ta Aprecia e Sentidonan Asombroso di Bida?” (8 di maart 2003) E articulonan tawata hopi interesante. Masha danki pa e trabou duro y investigacion cu boso ta haci pa presenta cada edicion di Spierta! Mi ta ansioso pa lesa esun siguiente!

H. S., Merca

E serie aki realmente a haci mi conciente cu nos curpa ta masha complica. Mi a keda asombra cu hende su punta di dede por detecta un punta cu ta solamente tres micron halto! Yehova mester tawata echt interesa den su creacion cu el a pensa riba un cos chikito asina.

E. R., Australia

Martir di Spaña Un danki di curason pa e articulo “Un Homber Cu A Scohe pa Obedece Dios.” (8 di maart 2003) Mi a keda masha conmovi ora mi a lesa di Antonio Gargallo. Aunke e tawata un hoben di apenas 19 aña cu a caba di batisa como un cristian, el a mantene su integridad ora cu diripiente el a hay’e ta tuma un decision asina serio. E relato aki a laga mi compronde cuanto fortalesa y pas interno Yehova por duna nos si nos ta dicidido pa haci su boluntad.

M. T., Italia

Masha danki pa e experencia cortico pero toch poderoso aki. Segun cu mi tawata les’e, awa tawata basha for di mi wowo. Loke specialmente a conmove mi tawata e carta cu Antonio Gargallo a skirbi su mama cu su ruman mohe prome cu nan a ehecut’e. Por fabor, sigui skirbi tocante cristiannan cu a mantene nan integridad na Yehova ora nan a haya nan confronta cu morto, pasobra esaki ta fortalece nos fe.

R. O., Nigeria

Sapato Danki pa e articulo “Bo Sapatonan Ta Realmente Comodo?” (8 di maart 2003) Mi tawatin añanan ta sufri di problema cu pia y mi a haci varios operacion chikito na mi tenchinan. Finalmente mi a descubri cu mi tin un pia cu ta un tiki mas grandi cu e otro. Door cu pa añanan mi a bisti e size di sapato incorecto, awor mi tin cu bisti sapato ortopedico.

R. G., Merca

Esaki tawata un bon articulo. Sinembargo, boso no a bisa cu generalmente e miho ora di dia pa cumpra sapato ta parti atardi, ora cu probablemente e pianan ta hincha.

A. W., Canada

“Spierta!” ta contesta: Danki pa bo observacion. Sea asina bon di wak “Observando Mundo”, e seccion “Problemanan di Salu Relaciona cu Sapato”, cu a aparece den e “Spierta!” na Spaño, di 8 di augustus 1999.

Spiek Mi kier expresa mi aprecio pa e articulo “Hobennan Sa Puntra . . . Ki Tin di Malo den Spiek?” (8 di februari 2003) Mi ta un studiante na universidad y mi tin e custumber di spiek for di tempo cu mi tawata den vijfde klas. Semper mi tawata puntra mi mes si ta bon pa spiek, pero mi no por a haya un contesta. Pesei, e articulo aki ta un berdadero tesoro. Mi ta bai kibra cu e custumber aki na mi siguiente tentamen pa cua mi ta studiando awor.

S. Y., Ucrania

Prostitucion di Mucha Danki pa e serie “Prostitucion di Mucha—Un Realidad Tragico.” (8 di februari 2003) Loke principalmente a touch mi curason ta e echo cu aunke e topico aki tawata doloroso, boso a duna e victimanan un speransa. E varios experencianan cu boso a conta ta similar na mi propio experencia. E serie a mustra cu asta den e sistema bieu di cosnan aki, e heridanan di un trauma teribel pa un gran parti por ser cura cu e yudansa di Yehova.

P. R., Alemania