Un Regalo Colo di Oro for di Lehano Nort

DI UN ESCRITOR DI SPIERTA! NA SUECIA

‘Kico ta algo tipico di nos pais cu nos por hiba como regalo?’, ami cu mi esposa tawata puntra nos mes prome cu nos a bandona Suecia pa bai bishita algun amigo na Inglatera. Nos regalo a bira jam traha na cas di e beishi cloudberry di Nort Europa. Como cu nos kier a hacie un cos educativo, nos a traha un etiket informativo basa principalmente riba nos propio observacionnan y algun referencia local. Lo siguiente ta e resultado di nos investigacion.

Kico Ta Cloudberry?

Cloudberry (na Hulandes, bergbraambes, y na Latin Rubus Chamaemorus), ta un beishi cu ta crece na un mata chikito di menos cu 30 centimeter halto. Cada mata ta produci un solo flor blanco y un solo beishi. Tanten cu e beishi no ta hecho e ta colo cora y duro, pero segun cu e ta hecha, e ta haya un colo geel manera oro y ta bira moli y yen di juice. Su nomber cloudberry (beishi di nubia), posiblemente ta bin door cu den parti nort di Inglatera cloudberry ta crece riba seronan caminda semper tin hopi nubia abou. Tambe bo ta haya nan den areanan humedo, principalmente tundra y muras den henter e region suit di Polo Norte. Na Suecia nan ta hecha normalmente den augustus, ora cu e herfst di Nort Europa ta acerca.

E Oro di Muras

Pa siglonan e pueblo nativo di Lapland a piki cloudberry como cuminda pa winter. E beishinan tin hopi vitamina C y otro vitaminanan, y como cu nan ta contene un preservativo natural, jam di cloudberry por keda fresco pa añanan si manten’e friu. Siendo cu e prome pobladonan di e regionnan den nort aki a biba principalmente di carni y pisca, cloudberry a bira un suplemento importante di vitamina. Pesei no ta un sorpresa cu nan a yega di yam’e e oro di muras!

Awendia, nan ta piki gran cantidad di cloudberry pa entrega na supermarket y industria. Por ehempel, na Suecia durante un aña normal, e mercado por bende mas cu mil tonelada di cloudberry, y tur ta beishi cu nan a piki na man! Pikidonan di cloudberry, kendenan hopi bes ta mucha di scol cu tin facansi, por gana un bon zakgeld di e manera aki. E Finlandesnan asta a honra e cloudberry door di grab’e riba nan moneda nobo di dos euro!

Un Experencia Sabroso

Cloudberry tin un sabor refrescante zoet-zuur. Bo por haya jam of mermelada di cloudberry y asta likeur di cloudberry den tiendanan specialisa den delicatesse y tambe den otro tienda den stadnan principal di Europa y Merca. Sundae di cloudberry a aparece hopi bes riba e menu di desert na e cena di gala anual pa ganadonan di Premio Nobel, cu ta ser teni na Stockholm, Suecia. Restaurantnan exclusivo sa sirbi e jam cayente riba eiscrim di vanilia. Ademas, e jam ta smak hopi bon cu cheesecake Sueco of cu keshi Camembert hasa, y tambe e ta un dushi reyeno pa tert. Na Finlandia nan ta produci un likeur di cloudberry cu tin colo di oro, y resientemente nan a introduci biña di cloudberry riba e mercado di biña na Suecia.

Si un dia bo haya bo caminda nan ta cultiva cloudberry, no keda sin piki nan y purba nan fresco, preferiblemente cu un tiki sucu blanco na puiro, y un bola grandi di whipped cream. Lo bo ripara cu nan ta bal oro, y lo bo sinti bo impulsa pa gradici bo Creador pa e dushi regalo aki.