Hobennan Sa Puntra . . .

Con Mi Por Sali for di e Sombra di Mi Ruman?

“Mi kier tawatin mi propio personalidad, pero semper mi a sinti cu mi mester a actua di acuerdo cu e reputacion di mi ruman mohenan. Mi tawata sinti cu nunca lo mi por a haci e cosnan cu mi ruman mohenan a logra.”—Clare.

BO TIN un ruman homber of un ruman mohe cu aparentemente tin exito den tur cos? Bo mayornan constantemente ta conseha bo pa ta mas manera e ruman ei? Si ta asina, kisas bo tin miedo cu semper lo bo keda den sombra di bo ruman, es decir, cu hende semper lo midi bo balor na con bon bo ta alcansa e logronan di bo ruman.

Barrya su dos ruman hombernan mas grandi a gradua di e Scol di Entrenamento Ministerial,b un scol altamente respeta, y nan tin excelente reputacion como cristian. Barry a admiti: “Mi no tawatin masha confiansa den mi mes, ya cu mi tawata sinti cu nunca lo mi por alcansa nan nivel den e trabou di predica ni ser mes bon cu nan den dunamento di discurso. Pa mi tawata dificil pa sera mi propio amistadnan, pasobra mi tawata djis compaña mi rumannan ora hende invita nan. Mi tawata sinti cu hende tawata amigabel cu mi djis debi na mi rumannan.”

Ta dificil pa bo no sinti yalurs ora bo tin un ruman cu tur ora bai ta haya elogio. Den tempo biblico e hoben Yosef (Hose) a destaca entre su ruman hombernan. Ki efecto esaki tawatin riba nan? “Nan a odi’e y no por a papia cu ne cu cariño.” (Genesis 37:1-4) Claro cu Yosef tawata modesto. Pero bo ruman kisas ta stimula rivalidad y rencor door di recorda bo constantemente di su logronan.

Tin hoben ta reacciona riba tur esaki door di rebela. Podise nan ta laga nan puntonan di scol bai atras, nan ta baha man na actividadnan cristian of ta bai participa den comportacion escandaloso. Kisas nan ta pensa cu si nan no por ta mes bon cu nan ruman, no ta bale la pena pa nan purba mes. Pero a lo largo, rebeldia ta perhudica bo so. Con bo por sali for di e sombra di bo ruman, es decir, distingui bo mes for di dje den un manera cu ta laga bo sinti bo bon tocante bo mes?

No Pone Bo Rumannan Riba un Pedestal

Mirando tur e atencion cu bo ruman ta ricibi, por pone bo kere cu e ta perfecto y cu nunca hamas lo bo por ta manera e. Pero esei di berdad ta asina? Bijbel ta bisa flat: “Tur a peca y ta falta e gloria di Dios.”—Romanonan 3:23.

Si, sea cual sea e habilidadnan of talentonan cu bo rumannan tin, toch nan ta keda ‘hende cu tin e mesun debilidadnan’ cu nos. (Echonan 14:15, NW) No tin motibo pa pone nan riba un pedestal of pa considera nan como idolo. E unico hende cu a yega di pone un ehempel perfecto tawata Hesucristo.—1 Pedro 2:21.

Siña for di Nan!

Awor, purba mira bo situacion como un oportunidad pa bo siña algo. Por ehempel, considera e rumannan homber y mohe di Hesucristo. (Mateo 13:55, 56) Pensa cuanto cos nan lo por a siña for di nan ruman perfecto! No obstante, “su rumannan mes no tawata kere den dje.” (Huan 7:5) Podise orguyo of yaluci a stroba nan di tin fe. Tawata Hesus su rumannan spiritual—su disipelnan—cu a reacciona riba su invitacion generoso: “Siña di mi.” (Mateo 11:29) Y ta te despues di Hesus su resureccion numa su rumannan carnal finalmente a realisa cuanto nan lo por a siña di Hesus. (Echonan 1:14) Prome cu esei, nan a perde hopi oportunidad precioso pa siña di nan ruman extraordinario.

Cain tambe a haci e fout ei. Su ruman Abel, tawata un sirbido di Dios extraordinario. Bijbel ta bisa cu “SEÑOR a aprecia Abel y su ofrenda.” (Genesis 4:4) Pero pa un motibo of otro, Dios ‘no a aprecia Cain y su ofrenda.’ Cain lo por a mustra un poco humildad y siña di su ruman. En bes di esei, “Cain a rabia masha pisa” y al final el a mata Abel.—Genesis 4:5-8.

Sin duda abo nunca lo no rabia dje pisa ei cu bo ruman. Pero lo bo por perde oportunidadnan precioso si bo laga orguyo y yaluci para den bo caminda. Si bo tin un ruman cu ta masha bon mes den wiskunde, e ta destaca den geschiedenis, e ta domina bo deporte faborito, e tin un conocemento sobresaliente di e Scritura, of e ta bon den duna discurso, anto bo tin cu lucha contra yaluci! Al fin y al cabo, yaluci of “envidia ta putrimento di weso” y ta perhudica so e por perhudica bo. (Proverbionan 14:30; 27:4) En bes di carga rencor, purba siña di bo ruman. Acepta e echo cu e tin algun talento of habilidad cu abo no tin. Observa con bo ruman ta haci su cosnan, of miho ainda, pidie yuda bo.

Barry, menciona anteriormente, a bin beneficia di e bon ehempel cu su rumannan a pone. El a bisa: “Mi a mira con felis mi rumannan tawata debi cu nan tawata dispuesto pa yuda hende den congregacion y den e trabou di predica. Pues mi a dicidi di sigui e ehempel di mi rumannan, y mi a cuminsa participa den trabou di construccion di Salon di Reino y di Betel. E experencia cu mi a haya a duna mi confiansa y a yuda mi crece den mi relacion cu Yehova.”

Descubri Bo Propio Puntonan Fuerte

Podise bo tin miedo cu si bo imita bo ruman su bon cualidadnan, abo lo perde bo propio personalidad. Pero esei no tin nodi sosode. Apostel Pablo a anima cristiannan di prome siglo: “Sea imitadonan di mi.” (1 Corintionan 4:16) Esaki ta nifica cu Pablo no tawata kier pa nan tin nan propio personalidad? Ningun momento so. Tin masha hopi oportunidad pa variedad. Si bo no ta mesun bon den wiskunde cu bo ruman, esei no kiermen cu bo no ta sirbi. Simplemente esei kiermen cu bo ta diferente.

Pablo a duna e conseho practico aki: “Laga cada un samina su mes obra, y e ora ei e lo tin motibo pa gaba solamente encuanto su mes, y no encuanto un otro.” (Galationan 6:4) Dicon bo no ta traha pa desaroya bo propio habilidad- y talentonan unico? Haci algo cu kisas lo yuda bo sinti mas bon tocante bo mes, y cu tambe lo duna bo habilidadnan balioso, manera por ehempel, siña papia un idioma stranhero, siña toca un instrumento musical of siña uza computer. No precupa cu bo mester haci tur cos perfecto! Mas bien, siña haci bo cosnan na un manera cabal, competente y segun bo consenshi. (Proverbionan 22:29) Kisas bo no tin hopi habilidad natural pa haci algo, pero “hende trahado ta domina”, segun Proverbionan 12:24 (Beibel na papiamentu koriente).

Sinembargo, ta specialmente bo desaroyo spiritual ta loke lo ta bon pa bo traha ariba. Habilidadnan relaciona cu actividadnan spiritual ta di balor hopi mas duradero cu cualkier talento cu facilmente ta hala atencion di otro hende. Considera e rumannan morocho Esau cu Yacob. Esau a haya hopi elogio di su tata pasobra e tawata “un bon yagdo, un homber di cunucu.” Na principio, kisas tawata facil pa pasa por halto di su ruman homber Yacob, pasobra e tawata “un homber trankil cu tawata biba den tent.” (Genesis 25:27) Pero Esau no a desaroya su spiritualidad, y el a perde e chens di haya bendicion. Yacob a cultiva un amor pa cosnan spiritual y Yehova a bendicion’e ricamente. (Genesis 27:28, 29; Hebreonan 12:16, 17) Kico ta e les? Desaroya bo spiritualidad, ‘laga bo lus briya’, y “bo progreso [lo] ta bisto pa tur hende.”—Mateo 5:16; 1 Timoteo 4:15.

Clare, menciona anteriormente, a bisa: “Ami tawata satisfecho pa biba den sombra di mi ruman mohenan mas grandi. Pero despues mi a dicidi di sigui e conseho biblico pa ‘habri mi curason’ pa cu otro hende. Mi a traha den sirbishi di veld cu diferente persona den congregacion, y mi a busca maneranan practico pa yuda esnan den congregacion cu tawata den necesidad. Tambe mi a invita rumannan di diferente edad na nos cas y a cushina pa nan. Awor mi tin un circulo mas grandi di amistad y mi tin mas confiansa.”—2 Corintionan 6:13.

De bes en cuando, bo mayornan kisas ta faya y ta conseha bo pa ta mas manera bo ruman. Pero realisando cu bo mayornan tin bo bienestar na pecho por calma e dolor ei un tiki. (Proverbionan 19:11) Sinembargo, lo ta bon pa respetuosamente bo laga bo mayornan sa con bo ta sinti ora cu nan haci e comparacion ei. Podise nan lo purba haya otro manera pa expresa nan precupacion.

No lubida nunca cu Yehova Dios mes ta tuma nota di bo si bo sirbie. (1 Corintionan 8:3) Barry a resumi esei bisando: “Mi a nota cu mas mi ta sirbi Yehova, mas felis mi ta. Awor hende ta mira mi pa e persona cu mi ta y ta aprecia mi, mescos cu nan ta aprecia mi rumannan.”

[Nota]

[Plachi na pagina 25]

Bo ruman tur ora bai ta e centro di atencion?

[Plachi na pagina 26]

Explora bo propio talento- y interesnan

[Plachi na pagina 26]

‘Laga bo lus briya’ door di desaroya habilidadnan cu ta relaciona cu actividadnan spiritual