Con Bo Por Conoce Dios pa Nomber

UN COLUMNISTA di corant a ricibi e siguiente carta for di un lector: “Henter mi bida mi a lucha cu e pregunta aki, y mi ta spera cu bo por duna mi un contesta. Con ta Dios su nomber? Hudiunan ta bisa cu su berdadero nomber a bai perdi den transcurso di siglonan. Cristiannan ta yam’e Hesus. Moslemnan ta yam’e Allah. . . . Pues, ta con yam’e?” E corant a publica e pregunta hunto cu e contesta aki: “Segun siñansanan Hebreo antiguo, Dios ta todopoderoso, pues no por limit’e na un solo nomber. Sinembargo, mi ta sigura bo cu lo e reacciona (sea cu e ta masculino of femenino) riba cualkier nomber cu respetuosamente bo yam’e.”

Tal actitud superficial pa cu e nomber di Dios no ta algo raro awe. Aunke hopi hende tin un inclinacion religioso y ta kere den Bijbel, toch nan no ta pensa masha riba e cuestion di e nomber di Dios. Pero kico Dios ta pensa di esei? Esaki ta un asunto asina insignificante p’e?

E No Ta un Asunto Insignificante

Considera e echo cu Bijbel ta menciona Dios su nomber personal, Yehova, miles di biaha. Den e Traduccion di Mundo Nobo di e Santo Scritura, e nomber dibino ta aparece 7.210 biaha!a Ta Dios mes a inspira escritornan di Bijbel pa uza su nomber asina hopi. Un di e escritornan aki, e salmista Asaf, a skirbi: “Abo so, kende su nomber ta [“Yehova”, NW], ta e Haltisimo riba henter tera.” (Salmo 83:18) David tambe a skirbi den un salmo: “Ma nos ta confia den e nomber di [Yehova], nos Dios.”—Salmo 20:7.

Bijbel ta mustra cu Yehova Dios ta examina nos curason pa determina kico nos ta pensa di su nomber. E salmista a bisa: “Si nos a lubida e nomber di nos Dios, . . . Dios lo no a descubri esaki? Pasobra e conoce e secretonan di curason.” (Salmo 44:20, 21) Profeta Isaias a skirbi: “Duna gradicimento na [Yehova], invoca su nomber. Haci su echonan conoci entre e pueblonan; haci nan corda cu su nomber ta halsa.”—Isaias 12:4.

Dios mes a bisa: “Nan lo sa cu mi nomber ta [Yehova].” (Yeremias 16:21) Na un otro ocasion el a declara: “Lo mi santifica mi nomber grandi cu a wordo profana meimei di e nacionnan . . . E ora ei e nacionnan lo sa cu ami ta [Yehova].” (Ezekiel 36:23) Algun di e declaracionnan aki ta señala na un tempo ora cu Yehova lo actua cu rabia contra esnan cu a mustra falta di respet pa su nomber. E cuestion di su nomber personal no ta un asunto insignificante pa Dios.

Yehova Dios No Ta Leu di Bo

Con bo por siña conoce Dios pa nomber? Kico kiermen conoce Dios pa nomber? Bijbel ta contesta: “Esnan cu conoce bo nomber lo pone nan confiansa den bo.” (Salmo 9:10) Pues ta bisto cu conoce Dios pa nomber ta encera mas cu djis sa con su nomber ta. Bo tin cu confi’e. Esei ta nifica cu bo tin cu haya sa ki clase di Dios e ta y siña tocante su cualidadnan y su manera di pensa. Esaki lo motiva bo pa confia den dje.

Ta solamente door di lesa y studia Bijbel cuidadosamente bo por siña compronde ki clase di Dios Yehova ta. E ta priminti cu lo e proteha hende cu ta demostra cariño p’e y pa su nomber. Dios ta bisa di e persona cu haci esei: “Pasobra el a stima mi, pesei lo mi libr’e; lo mi proteh’e, pasobra e conoce mi nomber. E lo sclama na mi, y ami lo contest’e; lo mi ta cu ne den angustia; lo mi rescat’e y honr’e. Cu bida largo lo mi satisfac’e, y lag’e mira mi salbacion.”—Salmo 91:14-16.

Ki un relacion maraviyoso Yehova Dios tin cu esnan cu conoc’e pa nomber! Abo tambe por tin un relacion asina cu ne. Den bo oracionnan sinsero, nunca basila pa yam’e na su nomber. Lo e contesta bo, pasobra manera Bijbel ta bisa, “e no ta leu di cada un di nos.”—Echonan 17:27.

[Nota]

[Cuadro/Plachi na pagina 11]

Dios Conoce Bo pa Nomber

Dios a bisa Moises: “Mi a conoce bo pa nomber.” (Exodo 33:12) E relato bon conoci di e palo na candela ta confirma esaki. Bijbel ta bisa cu Dios “a yam’e for di meimei di e mata y a bisa: ‘Moises, Moises!’” (Exodo 3:4) Esaki ta djis un ehempel di e varios ocasionnan cu Dios a papia cu hende uzando nan nomber personal. Claramente, e Creador di universo ta interesa den nos individualmente.

Bijbel ta bisa cu Dios conoce cada un di e miles di miyones di streyanan na nan nomber. (Isaias 40:26) Cuanto mas lo e mester ta interesa den hende cu ta ador’e! Apostel Pablo a skirbi cu Yehova “conoce esnan cu ta di dje.” (2 Timoteo 2:19) Esaki ta indica mas cu simplemente corda nan nomber for di cabes. Dios conoce su adoradonan intimamente. Nos na nos turno lo mester conoce Dios pa nomber y busca pa conoce su cualidadnan intimamente.

E ultimo buki di Bijbel ta describi un buki simbolico den cua Dios ta skirbi nomber di tur cu a ador’e den transcurso di historia. E buki aki ta wordo yama “e buki di bida” pasobra Yehova Dios lo duna bida eterno na tur esnan cu nan nomber ta skirbi den dje. (Revelacion 17:8) Esaki ta un bunita speransa pa esnan cu conoce Dios pa nomber.

[Cuadro/Plachi na pagina 12]

Nan A Proclama Dios Su Nomber

● E cantica di Moises djis prome cu Israel a drenta e Tera Priminti: “Mi ta proclama e nomber di [Yehova].”—Deuteronomio 32:3.

● E palabranan di David na e gigante Goliat: “Ami ta bini riba bo den e nomber di [Yehova] di ehersitonan.”—1 Samuel 17:45.

● E palabranan di Job despues cu el a perde tur su pertenencianan y tur su yiunan a muri repentinamente: “Bendiciona sea e nomber di [Yehova].”—Job 1:21.

● Apostel Pedro citando e Scritura Hebreo den un discurso: “Ken cu invoca e nomber di [Yehova] lo ta salba.”—Echonan 2:21.

● Profeta Isaias: “Duna gradicimento na [Yehova], invoca su nomber. . . . Haci nan corda cu su nomber ta halsa.”—Isaias 12:4.

● Hesucristo siñando su disipelnan resa: “Pues, haci oracion anto asin’aki: ‘Nos Tata cu ta den shelo, bo nomber sea santifica.’”—Mateo 6:9, 10.

● Hesucristo den oracion na Dios: “Mi a manifesta bo nomber.”—Huan 17:6.

● Dios papiando cu su pueblo: “Ami ta [Yehova], esei ta mi nomber; lo mi no duna mi gloria na un otro.”—Isaias 42:8.