E Punto di Bista Biblico

Bebemento di Mas Ta Realmente Asina Malo?

PA HOPI aña e figura di un burache simpatico cu ta pone hende hari, ta hungando su rol riba escenario. Aunke ta trata solamente di actuacion, e tipo di humor aki ta tipifica e punto di bista contradictorio cu hopi hende tin pa loke ta bebemento pisa. Nan ta mir’e como un debilidad si, pero na mes momento practicamente inofensivo.

Claro cu e realidad si no ta ni un tiki pret. E Organisacion Mundial di Salu ta clasifica mal uzo di alcohol como un di e peligernan principal pa salu mundial. Aparentemente, cu excepcion di adiccion na tabaco, mal uzo di alcohol ta causa mas morto y enfermedad cu mal uzo di cualkier otro substancia cu ta crea adiccion, y e ta costa e economia di Merca so caba mas cu 184 mil miyon dollar pa aña.

Apesar di e echonan aki, hopi hende ta sigui minimisa e seriedad di bebemento di mas. Aunke kisas nan ta reconoce e efectonan perhudicial cu mal uzo riba termino largo ta trece cu ne, nan no ta mira nada malo pa de bes en cuando core un paranda di bebemento. Den algun parti di mundo hobennan ta mira biramento di burachi como un rito pa mustra cu nan ta birando adulto. Y apesar di e advertencianan serio di parti di organisacionnan di salu, paranda di bebemento cu ta encera cinco of mas drinks tras di otro, ta aumentando drasticamente den tur grupo di edad. Pesei, ta di compronde cu hopi hende ta puntra nan mes si bebemento pisa ta realmente dje malo ei. Kico Bijbel ta bisa?

Biña y Bebida Alcoholico—Donnan di Dios

Na varios caminda Bijbel ta haci referencia na biña y bebida alcoholico. Rei Salomon a skirbi: “Bai anto, come bo pan den felicidad y bebe bo biña cu curason contento, pasobra Dios a aproba bo obranan caba.” (Eclesiastes 9:7) E salmista a reconoce cu Yehova Dios ta e Percurador di “biña cu ta haci curason di hende contento.” (Salmo 104:14, 15) Aparentemente biña ta un di e donnan cu Yehova a bendiciona humanidad cu ne.

Obviamente Hesus no a mira nada malo den bebe biña. De echo, su prome milager tawata di cambia awa den un biña di calidad superior na un bankete di boda. (Huan 2:3-10) Tambe el a uza biña como un simbolo apropiado di su sanger ora el a inaugura e Cena di Señor. (Mateo 26:27-29) Bijbel ta asta menciona e balor medicinal di biña, pasobra apostel Pablo a anima Timoteo pa “tuma un poco biña pa motibo di [su] stoma.”—1 Timoteo 5:23; Lucas 10:34.

E Clave Ta Moderacion

Ripara cu Pablo a recomenda Timoteo pa bebe solamente “un poco biña.” Bon cla, Bijbel ta condena tur uzo inmodera di alcohol. E sacerdotenan Hudiu por a bebe cu moderacion ora nan no tawata na trabou. Sinembargo, ora nan tawata cumpli cu nan tareanan sacerdotal si Dios a prohibi nan di bebe cualkier bebida alcoholico. (Levitico 10:8-11) Hopi aña despues, e Scritura a spierta e cristiannan di prome siglo cu e burachenan “lo no hereda e reino di Dios.”—1 Corintionan 6:9, 10.

Ademas, den e instruccionnan cu Pablo a duna Timoteo, e ta bisa cu esnan cu ta dirigi e congregacion no por ta “bicia na hopi biña.”a (1 Timoteo 3:3, 8) De echo, Bijbel ta manda pa expulsa burachenan cu no a repenti for di e congregacion cristian. (1 Corintionan 5:11-13) Manera e Scritura ta bisa aptamente, “biña ta un hacido di bofon.” (Proverbionan 20:1) Esun cu ta bebe di mas por perde su dominio propio y su sano huicio.

Pakico e Palabra di Dios Ta Condena Bebemento di Mas

Yehova, ‘esun cu ta siña nos pa nos mes bon’, sa cu ora nos haci mal uzo di algo, finalmente nos ta perhudica nos mes y tambe otro hende. (Isaias 48:17, 18, NW) Esaki ta conta pa bebida alcoholico tambe. E Palabra di Dios ta puntra: “Ken tin ai? Ken tin verdriet? Ken tin pleito? Ken tin keho? Ken tin herida sin causa? Ken tin wowo cora?” E ta contesta: “Esnan cu ta sinta oranan largo cu biña, esnan cu ta bai pa purba biña mescla.”—Proverbionan 23:29, 30.

Bou di influencia di demasiado alcohol, hende a haci hopi cos descabeya y peligroso: core auto betra y pone tanto nan mes como otro hende na peliger; bira mucho familiar cu casa di otro hende y causa daño serio na relacionnan matrimonial; papia y haci co’i kens of asta cosnan perverso. (Proverbionan 23:33) Corectamente, mal uzo di alcohol a ser yama un di e malesanan social mas perhudicial cu ta tormenta humanidad awe. Nada straño anto cu Dios ta duna e advertencia: “No anda cu esnan cu ta gusta dal nan biña.”—Proverbionan 23:20.

Na Galationan 5:19-21, Pablo ta menciona buracheria y parandiamento como “obranan di carni” na contraste cu e fruta di Dios su spirito. Bebemento di mas ta daña bo relacion cu Dios. Ta bon cla anto cu cristiannan mester evita tur uzo inmodera di alcohol.

[Nota]