Hobennan Sa Puntra . . .

Pakico Dios Ta Laga Nos Sufri?

“Dios ta den shelo caminda tur cos ta dushi, mientras akibou nos ta sufri.” —Mary.a

HOBENNAN djawe a nace den un mundo cruel. Ta manera cos cu temblor tragico y desaster natural cu ta mata miles di hende a bira cos di tur dia. Guera y atake terorista ta domina noticia. Enfermedad, crimen y accidente ta ranca nos sernan keri for di nos. Mary, e hoben cita ariba, a pasa personalmente den un tragedia asina. Ta despues di morto di su tata el a expresa su amargura.

Ora nos pasa den un tragedia, ta masha normal pa nos sinti nos frustra, kibra of asta rabia. Kisas bo ta puntra bo mes: ‘Pakico e cos aki a pasa? Pakico net ami?’ of ‘Pakico net aworaki?’ Preguntanan asina merece un contesta satisfactorio. Pero pa haya e contestanan corecto, nos tin cu acudi na e fuente corecto. Awor nos tin cu admiti si cu, manera un hoben cu yama Turrell a remarca, tin biaha hende “tin asina tanto dolor cu nan no por pensa cu claridad riba un asunto.” Pues lo bo tin cu busca un manera di calma bo emocionnan un tiki pa bo por pensa na un manera logico y huicioso.

Con pa Enfrenta Realidadnan Desagradabel

Kisas nan ta cosnan desagradabel pa pensa ariba, pero morto y sufrimento ta parti di bida. Job tawatin rason ora el a bisa: “Hende cu a nace di mohe ta biba poco dia y ta yen di problema.”—Job 14:1.

Bijbel ta priminti un mundo nobo den cua ‘husticia lo biba.’ (2 Pedro 3:13; Revelacion 21:3, 4) Sinembargo, prome cu e condicionnan ideal ei bira realidad, humanidad mester pasa door di un tempo di maldad nunca bisto. Bijbel ta bisa: “Sabi esaki, cu den e ultimo dianan temponan trabahoso lo bin.”—2 Timoteo 3:1.

Con largo e temponan dificil aki lo dura? Hesus su disipelnan a haci mas o menos e mesun pregunta. Pero Hesus no a bisa nan spesificamente ki ora y ki dia e condicionnan deplorabel aki lo caba. En bes di esei, Hesus a bisa: “Esun cu persevera te na fin, esei lo ta salba.” (Mateo 24:3, 13) Hesus su palabranan ta anima nos pa mira cosnan for di un punto di bista di termino largo. Nos mester ta prepara pa wanta hopi situacion desagradabel prome cu e fin yega.

Hende Por Culpa Dios?

Tin sentido anto pa rabia cu Dios pa motibo cu e ta laga hende sufri? No ora bo considera cu Dios a priminti di pone fin na tur sufrimento. No tin sentido tampoco pa pensa cu ta Dios ta pone cosnan malo sosode. Hopi suseso tragico ta simplemente resultado di accidentenan. Por ehempel, imagina bo cu biento basha un palo abou y herida un hende. Algun hende lo bisa cu ta Dios a laga esaki sosode. Pero no ta Dios a pone e palo cai. Bijbel ta yuda nos compronde cu e cosnan ei ta simplemente e resultado tristo di “tempo y suseso imprevisto.”—Eclesiastes 9:11, NW.

Falta di sano huicio tambe por causa sufrimento. Supone cu un grupo di hoben ta sinta bebe na nan antoho y despues ta bai dal un buelta den auto bou di influencia di alcohol. Un accidente serio ta tuma luga. Ta ken su falta? Ta di Dios? No, pasobra nan a cosecha e consecuencia di nan mes falta di sano huicio.—Galationan 6:7.

Podise bo ta puntra: ‘Pero Dios no ta suficiente poderoso pa pone fin na sufrimento aworaki?’ Algun hende fiel den tempo biblico a haci nan mes e pregunta ei. Profeta Habacuk a puntra Dios: “Pakico bo ta wak cu tolerancia riba esnan cu ta trata cu traicion? Pakico bo ta keda keto ora cu e malbadonan ta traga esnan cu ta mas husto cu nan?” Pero toch Habacuk no a saca conclusion mucho lihe. El a bisa: “Lo mi spera pa mira kico e lo papia cu mi.” Despues, Dios a garantis’e cu na un “tempo stipula” lo E pone fin na sufrimento. (Habacuk 1:13; 2:1-3) Pesei nos mester tin pasenshi y warda pa Dios pone fin na maldad na su tempo stipula.

Evita di conclui mucho lihe cu di un manera of otro Dios kier pa nos sufri of cu e ta bezig ta test nos personalmente. Echo ta cu sufrimento por pone nos miho cualidadnan sali na cla y Bijbel ta bisa cu e pruebanan cu Dios ta permiti por refina nos fe. (Hebreonan 5:8; 1 Pedro 1:7) Si, hopi hende cu ta pasa den experencianan dificil of traumatico ta haya mas pasenshi of compasion. Pero nos no mester conclui cu ta Dios a causa nan sufrimento. E manera di pensa ei no ta tene cuenta cu nos Creador ta un Dios di amor y sabiduria. Bijbel ta bisa bon cla: “No laga ningun hende bisa ora cu e wordo tenta: ‘Mi ta wordo tenta door di Dios.’ Pasobra Dios no por wordo tenta door di maldad, y e mes no ta tenta ningun hende.” Al contrario, for di Dios nos ta haya “tur bon regalo y tur don perfecto”!—Santiago 1:13, 17.

Pakico Dios Ta Permiti Maldad

Di unda, anto, maldad ta bini? Corda cu Dios tin oponente—principalmente esun “kende ta wordo yama Diabel y Satanas, kende ta gaña henter mundo.” (Revelacion 12:9) Dios a pone nos prome mayornan, Adam cu Eva, den un mundo liber di problema. Pero Satanas a combence Eva cu sin e gobernacion di Dios lo bai e miho. (Genesis 3:1-5) Lamentablemente, Eva a kere e mentiranan di Satanas y a desobedece Dios. Adam a join e den e rebelion aki. Kico tawata e resultado? Bijbel ta bisa cu “morto a pasa pa tur hende.”—Romanonan 5:12.

En bes di caba mesora cu e rebeldia ei door di destrui Satanas y su compinchinan, Dios a haya cu ta miho pa laga tempo pasa. Kico el a logra? Un cos cu el a logra sigur cu esei ta cu Satanas a keda desenmascara como un mentiroso! Door di esei tambe awor hende lo tin suficiente prueba cu independencia for di Dios ta desastroso. Esei no ta exactamente loke a tuma luga? “Henter mundo ta bou di control di e malbado.” (1 Huan 5:19) Ademas, “hende a eherce autoridad riba . . . otro hende pa su daño.” (Eclesiastes 8:9) Religionnan di humanidad ta un mescla di siñansanan contradictorio. Balornan moral a alcansa e nivel di mas abou. Hende a purba cu tur sorto di gobierno cu bo por imagina. Nan ta firma tratadonan y adopta leinan, pero te ainda nan no a logra satisface e necesidadnan di e hende comun. Loke ta haci e miseria piyo ta e gueranan.

Ta keda bon cla anto cu Dios mester interveni y pone fin na maldad! Pero ta na e debido tempo di Dios esaki lo tuma luga. Tanten e dia ei no yega, nos tin e privilegio pa sostene e gobernacion di Dios door di obedece su lei- y principionan den Bijbel. Ora mal cosnan sosode, nos por haya consuelo den e speransa sigur di bida den un mundo liber di problema.

No Ta Abo So

Toch, ora nos ta pasa den sufrimento, kisas nos ta puntra nos mes, ‘Pakico net ami?’ Sinembargo, apostel Pablo ta recorda nos cu no ta nos so ta sufri pa via di maldad. Pablo ta bisa cu “henter e creacion ta keha y ta sufri e dolornan di parto hunto, te awor.” (Romanonan 8:22) E echo cu bo ta conciente di esaki por yuda bo trata cu e sufrimento. Por ehempel, e atakenan terorista di 11 di september 2001 na New York y Washington, D.C., a laga Nicole emocionalmente traumatisa. E ta admiti: “Mi a keda den shock y spanta.” Pero ora el a lesa con su rumannan cristian a enfrenta e tragedia ei, su punto di bista a cambia.b “Mi a realisa cu di berdad mi no ta mi so. Pocopoco pero sigur mi a cuminsa recupera di mi dolor y tristesa.”

Den algun caso, ta sabi pa busca un hende cu bo por papia cu ne—un mayor, un amigo maduro of un anciano cristian. Ora bo desahoga bo curason na un persona cu bo ta confia, lo bo por haya un “bon palabra” di animacion. (Proverbionan 12:25) Un hoben cristian di Brazil ta corda: “Mi a perde mi tata nuebe aña pasa, y mi sa cu Yehova lo resusit’e un dia. Pero un cos cu a yuda mi tawata di pone mi sintimentonan riba papel. Tambe mi tawata papia e cosnan aki cu mi amigonan cristian.” Abo tin berdadero “amigo” den ken bo por confia? (Proverbionan 17:17) Si ta asina, probecha di nan yudansa amoroso! No tene miedo di yora of expresa bo emocionnan. Hesus mes “a yora” morto di un amigo!—Huan 11:35.

Bijbel ta sigura nos cu un dia nos lo wordo “libra for di . . . sclabitud na corupcion” y disfruta di “e libertad glorioso di e yiunan di Dios.” (Romanonan 8:21) Mientrastanto, hopi bon hende lo por sufri. Pero e echo cu bo ta conciente pakico hende ta sufri y cu esei lo no dura hopi mas, mester ta un consuelo pa bo.

[Nota]

[Plachi na pagina 24]

Lo ta bon pa expresa bo tristesa