Un Camaleon Sabi di Lama

“Ki un horor! Un secat ta chupa bo manda aden. E ta hala bo na dje, y den dje; anto abo, mara, inmobil, ta sinti con e ser increibel ei, cu ta un monster, ta guli bo pocopoco.”—E TRAHADONAN DI LAMA, DI VICTOR HUGO.

HENDE a yega di bisa hopi cos negativo di secat of octopus. Mitonan di antiguedad y cuentanan—manera esun cita ariba—inhustamente a cataloga secat como un criatura indeseabel.

Pero en realidad, asta e secat gigante di Oceano Pacifico, cu por alcansa un largura di mas o menos seis meter y pisa te cu 50 kilo, por lo general no ta forma un menasa pa hende. Den añanan resien hende a remplasa leyendanan exagera tocante e “monster” aki di ocho pia, cu echonan veridico. Sambuyadonan y biologonan marino a siña hopi cos tocante e gran variedad di secat cu tin.

Con Secat Ta Cohe Su Victima y Evita Enemigo

En bes di traga hende, secat ta come principalmente marisco. Nan ta uza nan ocho brasanan y tambe te cu 1.600 zuignap pa gara nan victima. (Zuignap ta musculo chikito rondo na nan tengla cu ta chupa y pega na cos.) Cu e zuignapnan aki, un secat chikito por lastra un obheto cu ta 20 bes mas pisa cu ne! Tambe algun secat ta scupi veneno cu ta paralisa nan victima casi instantaneamente.a Caba e secat ta come e victima door di hala e cuminda aden atrabes di su cacumbeinnan skerpi cu parce boca di lora.

Pero kico si un secat ripara cu un otro criatura kier com’e? E secat tin un desbentaha sorprendente. Su sanger color blou cla tin tiki oxigeno ya cu e ta depende di hemocianina en bes di hemoglobina. Debi na esei, secat ta cansa lihe. Sinembargo, e tin habilidadnan special pa proteha su mes contra cacho di awa, bayena y otro criaturanan yagdo.

Un di e habilidadnan ei ta propulsion, es decir, e ta pusha su mes cu speed di jet. Ora un secat ta sintie menasa, e ta pusha su mes patras door di saca awa for di e saco diki (of, mantel) cu ta forma e parti principal di su curpa. E criatura sabi aki tin un otro tactica di escape. E por saca un nubia di inkt, cu ta contene un pigment cu no ta larga den awa di lama. Anto scondi den e nubia aki, e secat por cambia di direccion y hui bai prome cu e nubia plama.

Un Experto di Disfras

Claro cu secat ta prefera pa nan no yag riba dje mes. Con e ta sconde pa su yagdonan? E famoso explorado di lama Jacques-Yves Cousteau a skirbi: “Na Marseilles, caminda nos team a cuminsa filma e pelicula tocante secat, mayoria di nos sambuyadonan a raporta cu no tawatin secat den e area; of, si un tempo tawatin, ya nan no t’ei mas. Pero en realidad, e sambuyadonan tawata pasa landa dilanti di e secatnan, cu tawata asina bon camufla cu nan tawata casi invisibel.” Con e secatnan a logra e hazaña aki?

Un secat adulto por tin te cu dos miyon cel di color (cromatoforo) den su cuero, casi 200 pa cada milimeter cuadra. Cada cel di color tin un pigment cora, geel of preto. Door di sera of relaha su spiernan rond di e celnan, e secat den un par di seconde por cambia e color di su cuero pa un solo color of asta pa patronchinan colorido.

Pero ta un ironia cu secat aparentemente no ta mira color. Sinembargo, fuera di e tres pigmentnan, su color di cuero por cambia hopi. Secat tin celnan cu tin plachi manera spiel (iridocyte), y e celnan aki ta refleha lus pa pas cu e color di e ambiente caminda e secat ta. Esei no ta tur cos. Ora un secat ta sconde riba un rif, e por cambia e textura di su cuero suave door di pone spina, y asina e ta pas miho cu e superficie grof rond di dje.

Un Doño di Cas Trahado y Ordena

No ta un sorpresa anto cu ta dificil pa haya e cas di un secat. Nan gusta traha nan cas den buraco den baranca of bou di baranca grandi, uzando material di construccion cu tin eibanda. E dak y murayanan di un secat su cas por ta consisti di piedra, pidanan di metal, cocolishi, y asta di resto di barconan cu a sink y di sushi benta den lama (manera boter, bleki, etcetera).

Unabes un secat traha su cas, e ta ten’e masha ordena y limpi. E ta spuit awa pa laga e vloer paden di santo keda suave. Despues di come, e ta pusha tur resto di cuminda pafo. Pa test secat su habilidad di mantene su cas, Cousteau su team di sambuyado a kita algun piedra for di muraya di cas di un secat. Kico e secat a haci? Un pa un el a pone e piedranan bek, y pocopoco el a reconstrui e muraya! Cousteau a skirbi: “E proceso a sigui te ora cu el a reconstrui e muraya completamente; y e muraya den tur aspecto tawata identico na esun cu e sambuyadonan a kibra.” E secat su reputacion di mantene su cas nechi y na ordo ta bon conoci. Ora cu sambuyadonan mira un cas cu santo of sushi acumula den dje, nan sa cu e ta bashi.

Su Ultimo Cas

E ultimo cas y esun mas importante cu un secat embra lo biba aden por lo general ta su cas pa pone webo. E embra ta haya un pakete di sperma di su pareha y e ta ward’e den su mantel te ora cu e ta bai pone su webonan. E por pasa varios siman en busca di un cas apropiado. Caba e ta fortifica su cas y ta pega cu lijm miles di webo, na troshi, den dak. Sinembargo, e blue-ringed octopus si no ta traha un cas asina. Ya cu su colornan bibo ta spierta otro criaturanan yagdo pa keda leu, e ta prefera di cuida su yiunan den lama grandi, caminda tur criatura por mira na su color cu e ta venenoso.

Secat ta un bon mama. Despues di pone webo, probablemente e ta nenga di come. Mas bien, e ta proteha su webonan, ta limpia nan y laga awa fresco pasa banda di nan. Tambe e ta fortifica su cas y ta tuma un postura defensivo pa core cu criaturanan yagdo. Aunke e secat embra ta muri despues cu su webonan brui, e ta keda cuida nan te na su morto. Cousteau a bisa: “Ningun hende nunca a raporta cu un secat embra a bai laga su webonan sin proteccion.”

Serca mayoria sorto di secat, e yiunan cu caba di sali for di webo ta drif bai ariba na superficie di lama como plankton. Otro bestianan di lama ta come mayoria di nan. Pero despues di varios siman, e sobrevivientenan ta regresa fondo di lama y ta madura bira secat adulto cu por biba te cu tres aña.

Con Sabi Secat Ta?

Tin hende ta di opinion cu ora uza e palabra “inteligencia” en conexion cu bestia, esei ta encera e habilidad di siña for di experencia y resolve problema. Den e sentido ei, considera e comentario aki di Cousteau: “E timides di un secat ta un reaccion forma door di sinti, un reaccion basa principalmente riba prudencia y cautela. . . . Si un sambuyado por demostra cu e no tin intencion di hacie daño, e secat mesora ta perde su timides, anto mas lihe cu cualkier otro bestia ‘salbahe.’”

Secat tin e celebro y wowonan mas desaroya di tur criatura sin wes’i lomba. Nan wowonan, mescos cu esnan di nos, por focus precis riba algo y por adapta na cambio di lus. E parti meimei di nan celebro ta interpreta informacion cu e wowonan ta ricibi y esaki, hunto cu un excelente sentido di por fula ta haci posibel cu secat por tuma decisionnan sorprendentemente sabi.

Varios cientifico a raporta cu nan a mira un secat siña kita un corki for di un boter pa asina e por a cohe un lobster cu tawatin den e boter. Otro cientificonan a raporta cu un secat por saca afo con ta drei habri tapa di un boter pa e por yega na e cuminda cu tin den e boter. Na Vancouver Aquarium di Canada, tawatin un secat cu tur anochi tawata disparce door di un tubo pa e bai come e piscanan cu tawatin den e tanki pega cu ne.

Relaciona cu e inteligencia di secat, e buki Exploring the Secrets of Nature (Explorando e Secretonan di Naturalesa) ta conclui: “Nos tin e inclinacion di atribui e nivelnan di mas halto di inteligencia na hende cu macaco, pero tin prueba cu secat tambe ta entre e bestianan di mas inteligente.”

E comportacion inteligente di secat kisas ta recorda nos di e criaturanan cu Bijbel ta describi como “sumamente sabi.” (Proverbionan 30:24) Nan ta realmente un maraviya di creacion. Ni cientificonan ni sambuyadonan no ta considera secat un “horor” mas, manera Victor Hugo a pint’e den su imaginacion. E hendenan cu ta studia e criatura aki ta keda profundamente impresiona cu e camaleon sabi aki di lama cu ta camufla su mes bon.

[Nota]

[Plachi na pagina 15]

Un blue-ringed octopus

[Reconocemento]

© Jeffrey Rosenfeld

[Plachi na pagina 16]

Un secat di rif di Lama Pacifico cu camuflahe perfecto, ta net bou di e boca di un pisca yagdo. Abo ta mira e secat?

[Plachinan na pagina 16, 17]

Tin hopi variedad y color di secat

[Plachi na pagina 17]

Yiu cu a caba di sali for di webo ta drif bai ariba na superficie

[Reconocemento]

© Fred Bavendam

[Reconocemento pa Potret na pagina 16]

Te ariba na banda robes: © Roger T. Hanlon; ariba: © Jeffrey Rosenfeld