E Fe di un Famia Ta Pasa den Prueba

INDIA, un mucha mohe lief di nuebe aña cu ta biba na Wisconsin, Merca, sa bon kico ta malesa. De echo, ya caba el a haci tres operacion grandi y un cantidad di operacion chikito. Su mama, Lori, a bisa: “Durante seis aña largo, India su bida tawata drei rond di salanan di emergencia, estadia na hospital y baimento di docter.”

Tur cos a cuminsa tempo cu India tawatin un aña y mei. El a cuminsa haya sintomanan straño, entre otro, diarea cronico, keintura halto, stoma geblas y perdida abnormal di peso. Tambe e tawatin dolor den su bariga. Tur anochi pa dos aña largo, pobersito India tawata lanta cada bes yorando, kehando y tin biaha asta gritando di dolor.

Mientras cu docternan tawata purba saca afo ta kico falt’e, India a sigui sufri teriblemente. Lori a bisa: “Nos baby basicamente tawata muriendo di hamber.” Mark, tata di India, a agrega: “Pa mas cu un aña nos mester a mira nos yiu mohe ta para caba na nada, sin sa con pa yud’e. Mi ta corda con impotente mi a sinti mi un anochi cu ami cu Lori tawata papia tocante su entiero, ya cu na e punto ei nos a kere cu esei tawata inevitabel.”

Cu tempo docternan a saca afo cu India tawatin un malesa cu ta ataca e parti paden di e tripa y forma ulcera. Tambe e tawatin un malesa cu ta inflama e canal di gal di e higra. E malesanan aki por a ser trata. Sinembargo, lo e mester a opera, y pa e ulceranan na tripa, lo e mester a uza remedi. Ambos condicion a rekeri control y cuido constante durante su recuperacion.

Ya ta mas cu shete aña cu India a bira malo pa prome bes. Gracias na e cuido di docternan hopi atento, India ta riba caminda di recuperacion. Como Testigonan di Yehova, Mark cu Lori ta sinti cu ta nan fe den e Palabra di Dios a yuda nan persevera, specialmente pa loke Bijbel ta bisa tocante malesa, morto y e speransa di un futuro resureccion. Esei ta loke a yuda India tambe persevera. Lori a bisa: “India semper a papia libremente tocante e speransa di resureccion cu tin den Bijbel. E ta algo masha real p’e.”

Un biaha cu India tawata den e speelzaal na un hospital, el a topa un mucha chikito kende su ruman mohe tawatin leukemia. Lori a conta kico a pasa: “E mucha a bisa India cu e tin miedo cu su ruman lo por muri. Anto India a cont’e kico Bijbel ta bisa cu morto ta y cu e si no tin miedo di muri. E siguiente dia, mama di e mucha a bin serca mi cu varios pregunta. E tawata hopi asombra cu India por a papia asina libremente y sin miedo tocante cosnan asina.”

Mark cu Lori a descubri cu e oracionnan di rumannan den fe tawata un sosten enorme. Mark a bisa: “Antes ora mi bisa hende cu lo mi haci oracion pa nan of asta ora mi haci oracion cu nan, semper mi tawata desea cu lo mi por a haci mas pa nan. Awor mi ta realisa con importante e oracionnan ei cu nan—y pa nan—ta. Oracion tawata e cos di mas importante cu un hende por a haci pa nos durante e tempo dificil ei. Esta un hermandad amoroso nos tin!”

Tambe Mark ta haya cu e malesa di India a yuda nan examina nan prioridadnan. El a bisa: “Un cos cu sigur a cambia ta nos punto di bista pa cu cosnan material. Ora bo yiu ta malo, ta manera cu e cosnan ei no tin ni un tiki balor! E cosnan balioso den bida tawata—y ta—nos relacion cu Yehova Dios y nos hermandad amoroso.”

Mark cu Lori y tambe India cu su rumannan ta spera cu anhelo riba e tempo cu Isaias a profetisa di dje. E tempo ora cu “ningun habitante lo no bisa: ‘Mi ta malo.’”—Isaias 33:24; Revelacion 21:4.

[Plachi na pagina 18]

India Erickson

[Plachi na pagina 19]

Hospital di Mucha di San Diego

[Plachi na pagina 19]

India hunto cu su famia