Demografia, Bijbel y Futuro

DI UN ESCRITOR DI SPIERTA! NA SUECIA

E FAMIA humano a crece di 1,65 mil miyon hende na principio di siglo 20 pa e cantidad abrumador di 6 mil miyon na final di e siglo. Acaso e poblacion di mundo lo sigui crece na e velosidad sorprendente aki? Lo bai tin un explosion di poblacion durante e milenio aki? E expertonan cu ta lucha cu e tipo di preguntanan complica ei ta ser yama demografo; nan campo di estudio ta demografia.

Demografia ta ser defini como e estudio estadistico di poblacion humano, specialmente relaciona cu su tamaño, densidad, distribucion, y datonan importante tocante cantidad di nacemento, morto, casamento, salubridad y malesa. Expertonan ta studia tres factor cu tin un impacto bisto riba poblacion: fertilidad (e cantidad di yiu cu ta nace); mortalidad (e cantidad di hende cu ta muri); y migracion (e cantidad di hende cu ta muda di un pais pa otro).

Demografia historico ta studia e crecemento y fluctuacion di poblacionnan di pasado. Demografonan historico ta siña mas tanto posibel tocante civilisacionnan antiguo door di examina cuidadosamente informacion skirbi, ruinanan, skeletnan y otro obhetonan. Demografia historico ta basa pa un parti riba suposicion of calculo, y pa un parti riba conocemento adkiri. E buki Atlas of World Population History (Atlas di Historia di e Poblacion Mundial) ta admiti: “Debi na e nivel actual di desaroyo, nos no por comproba e teorianan di demografonan historico. Pesei for di punto di bista di un estadistico, ta imposibel pa nan ta confiabel.” Apesar di esei, pa hende cu ta studia Bijbel e teorianan demografico ta interesante. De echo, hopi bes nan ta na harmonia cu relatonan biblico.

Crecemento di Poblacion Despues di Dilubio

Bijbel ta bisa cu ta ocho persona so a sobrevivi e Dilubio di tempo di Noe. Algun demografo ta specula cu un 1.400 aña despues, e poblacion di tera lo por a alcansa 50 miyon hende. Ta imposibel cu e poblacion a aumenta di 8 persona te yega 50 miyon den 1.400 aña?

Na prome luga, e calculo di 50 miyon ta solamente un calculo. Sinembargo, ta interesante pa tuma nota di loke Bijbel ta bisa na Genesis 9:1: “Dios a bendiciona Noe y su yiu hombernan y a bisa nan: ‘Sea fructifero y multiplica, y yena tera.’” Anto, den capitulo 10 y 11, nos ta lesa di 70 famia cu a sali for di Noe su yiu hombernan, Sem, Cam y Jafet. Ora nos sigui lesa nos ta topa e liña di desendencia for di Sem te na Abraham di hombernan cu “tawatin mas yiu homber y yiu mohe.” Esaki kisas tawata un tempo cu e hendenan tawata haya mas yiu cu normal, di acuerdo cu Dios su mandamento pa “yena tera.”

Kico di e porsentahe di mortalidad? E mesun capitulonan di Genesis ta describi con pa varios siglo despues di Dilubio hende tawata biba extraordinariamente largo.a Ora tin un porsentahe halto di nacemento combina cu un porsentahe abou di morto, esei ta resulta den un crecemento rapido di poblacion.

E Israelitanan Su Estadia Temporal na Egipto

Algun investigado ta cuestiona e relato biblico di e crecemento rapido di poblacion cu a tuma luga serca e Israelitanan tempo cu nan tawata biba den e tera di Egipto. Bijbel ta declara cu fuera di e esposanan di e yiu hombernan di Yacob, “na tur, e personanan di cas di Yacob, kendenan a bin Egipto, tawata setenta.” (Genesis 46:26, 27) Sinembargo, ora cu e Israelitanan a bandona Egipto 215 aña despues, nan tawatin e cantidad asombroso di “seisshen mil homber na pia, sin conta mucha aden.” (Exodo 12:37) Si nos agrega hende mohe y mucha, lo por tawatin na tur te cu tres miyon Israelita! Un aumento asina ta posibel?

Pa contesta e pregunta ei, tuma bon nota di loke Bijbel ta bisa di e crecemento di e poblacion Israelita na Egipto: “E yiunan di Israel tawata fructifero y a aumenta masha y a multiplica bira masha poderoso mes, asina cu e tera a keda yen-yen di nan.” E crecemento di e Israelitanan e tempo ei tawata extraordinario.—Exodo 1:7.

Un cos interesante ta cu den nos tempo tambe hende a mira crecemento similar den cierto nacionnan, por ehempel na Kenia durante decada di 1980. Sinembargo, loke a haci e crecemento di e Israelitanan excepcional ta cu e aumento a sigui pa un periodo largo.

Bijbel mes ta duna un motibo mas pa e crecemento rapido di Israel. No tawatin scarsedad di cuminda durante e tempo cu e Israelitanan tawata na Egipto. Claro cu ora ta reina hamber, hopi hende ta muri den nan flor di bida. Como resultado, ta nace menos yiu durante un periodo asina. Sinembargo, Bijbel ta indica cu e Israelitanan tawatin cuminda na abundancia. Ora cu e famia di Yosef (Hose) a bin Egipto, Farao a bisa Yosef: “Laga bo tata y bo rumannan keda biba na e miho parti di e tera, laga nan keda biba na tera di Gosen.” (Genesis 47:6) Asta despues cu e Israelitanan a bira catibo di e Egipcionan, nan tawatin aparentemente suficiente cuminda. De echo, despues di nan liberacion for di sclabitud, e Israelitanan tawata corda cada bes riba e pan, pisca, concomber, milon, prei, siboyo, conoflok y weyanan di carni cu nan a come tempo cu nan tawata catibo.—Exodo 16:3; Numbernan 11:5.

Durante e Prome Siglo di Nos Era

Tambe demografia por yuda claria nos comprondemento di e Scritura Griego Cristian. Por ehempel, ora nos lesa tocante e mandamento cu Hesus a duna su siguidonan pa “haci tur e nacionnan disipel di mi”, nos lo por puntra nos mes: ‘Ta con grandi e teritorio cu nan mester a cubri cu e predicacion tawata?’ (Mateo 28:19) Ta cuanto hende tawata biba den e Imperio Romano den prome siglo? Algun experto ta calcula cu e poblacion tawata entre 50 pa 60 miyon hende. Si ta asina, e prome predicadonan cristian ei tawatin ke se yama un trabou nan dilanti!

Lesando e Scritura Griego Cristian, nos ta siña cu apostel Pedro a bai te na Babilonia pa predica e bon nobo einan. (1 Pedro 5:13) Dicon Babilonia? Un comentario den The New Encyclopædia Britannica ta clarifica esei: “E centronan principal di poblacion Hudiu pafo di Palestina tawata na Siria, Asia Menor, Babilonia y Egipto. Y ta ser calcula cu cada un di e luganan ei tawatin por lo menos 1.000.000 Hudiu.” Siendo cu Pedro tawata asigna pa predica specialmente na e Hudiunan, ta logico cu lo el a bai caminda tin un colonia di hudaismo—Babilonia. (Galationan 2:9) Y ya cu tawatin un poblacion grandi di Hudiu einan, nos por tin sigur cu teritorio no a caba lag’e!

Kico Lo Pasa den Futuro?

Manera nos a mira, demografonan ta interesa den cierto detayenan di hende su pasado. Kico nan ta bisa tocante futuro? Tin preguntanan importante cu nan ta haci nan mes. Lo tin un explosion di poblacion durante e milenio aki? Ningun hende no sa sigur. Tumando nota cu den varios pais e porsentahe di yiu cu ta nace ta bahando, algun investigado ta pronostica cu e poblacion mundial lo keda mescos.

Sinembargo, no ta tur experto ta di acuerdo cu esei. E revista Population Today ta bisa: “Awendia, por parti e paisnan den dos categoria distinto di crecemento di poblacion: e paisnan cu indice di fertilidad di dos yiu of menos pa pareha y e paisnan cu tin un indice mas halto di fertilidad. E ‘categoria di dos yiu of menos’ ta inclui Europa, Merca, Canada, Japon y un par di pais cu ta birando industrialisa rapidamente . . . Na contraste, e paisnan cu tin un crecemento rapido di poblacion ta consisti di mayoria di e paisnan di Africa, Asia y Latino America, caminda fertilidad ta mas cu dos yiu pa pareha. Den e paisnan aki, caminda mas cu mitar di e poblacion mundial ta biba, —hende mohe ta haya un promedio di cuater yiu.”

Pues, mientras cu e poblacion di algun pais a baha, den otro paisnan el a aumenta of keda casi mescos. Population Today ta resumi e prospectonan pa futuro asin’aki: “Pa mayoria pais den desaroyo, crecemento rapido di poblacion no a termina. Loke lo determina e berdadero fin, no e fin imagina, di e ‘explosion mundial di poblacion’ ta con lihe paisnan ta inverti—y tambe cuanto placa nan ta inverti—den programanan pa reduci mortalidad di baby, pa educa hende mohe y pa percura planiamento di famia.”

E poblacion mundial lo crece hopi mas cu e cifra actual di seis mil miyon habitante? Tempo cu dia lo mustra. Pero si nos sa cu e proposito di Dios ta pa yena e tera, no pa e tera ta sobrepobla. (Genesis 1:28) Y nos tin tur motibo pa carga e confiansa cu esaki lo sosode bou di e Reino di Dios.—Isaias 55:10, 11.

[Nota]

[Plachi na pagina 20]

E sobrevivientenan di e Dilubio a inicia un poblacion mundial cu awor a surpasa seis mil miyon

[Plachi na pagina 21]

Den 215 aña, un cantidad chikito di Israelita na Egipto a aumenta yega te na tres miyon