Simplemente pa Luci Bunita?

DI UN ESCRITOR DI SPIERTA! NA SPAÑA

BO A yega di ripara cu ta manera cos cu parhanan ta dedica hopi tempo na drecha y limpia nan plumanan? Nan ta pasa oranan largo tur dia aparentemente haciendo nada otro cu ocupa nan mes cu nan plumanan. Sea ta lora of pelican, mofi of flamingo, nan tur diariamente ta pasa door di e ritual aki. Dicon? Ta simplemente nan kier luci bunita?

E berdadero motibo ta algo di mas peso cu esei. Parha tin cu dedica tempo na limpia y drecha nan plumanan mescos cu un avion mester haya mantencion cabal. De echo, pa parha, mantencion di nan plumanan den bon condicion ta un asunto di bida y morto. Nan plumanan ta gasta lihe, y e manera cu nan ta drecha nan cu nan boca ta yuda tene e plumanan limpi y sin parasit, pero tambe esei ta mantene nan funcionnan aerodinamico.

Un di e cosnan cu ta parti di nan rutina diario di aregla nan plumanan ta cu nan ta “zip” bek e haknan di pluma cu a sali for di otro. Ora e haknan ta bon sera, e pluma ta

fungi mas eficiente door cu e ta duna e parha un extra forsa pa bula bai laira. Book of British Birds (Buki di Parhanan Britanico) ta splica cu “dos grupo di pluma tin mester di atencion special: e plumanan di bula cu ne di e hala y e plumanan di ‘stuur’ cu ne di e rabo.”

Tambe parhanan tin un lucha constante pa mantene parasit bou di control. E parasitnan chikito aki, fuera di forma un peliger pa e salu di e parha, ta come e plumanan tambe. Biologonan a tuma nota cu parhanan cu nan pik ta lesiona no por limpia nan plumanan bon y, como resultado, nan tin mas parasit di pluma cu parhanan normal. Pa facilita e kimamento di parasit, tin algun parha ta cubri nan mes cu fruminga, pasobra aparentemente e acido di fruminga ta sirbi como un insecticida eficas.

Por ultimo, nan tin cu zeta e plumanan. Pa parha di awa e azeta riba nan pluma ta haci nan waterproof, y tur parha ta haya un miho proteccion contra weer si nan plumanan ta bon zeta. Di unda nan ta saca e azeta? Nan tin un klier special net riba nan rabo. E klier ei ta produci azeta y wax, anto e parha cu tur su pasenshi ta hunt’e riba su plumanan. Den e caso aki tambe e plumanan di bula cu ne ta haya atencion special.

Pues anto, nos no tin cu kere cu ta perde un parha ta perde tempo ora e ta sinta dedica tempo na su plumanan. Ta berdad cu e proceso aki ta yuda e parha luci bunita, pero tambe e ta manten’e salu. Den mundo di parha, pa bo sobrevivi bo tin cu limpia y drecha bo plumanan.

[Diagram/Plachinan na pagina 24]

(Pa e teksto den su formato kompleto, wak e publikashon)

“Schacht”

“Haakjes”

“Baardjes”

“Baarden”

[Plachi]

Door di pasa nan boca riba nan plumanan, parha ta hak e componentenan chikito di nan plumanan na otro manera un ziper

[Reconocemento pa Potret na pagina 23]

Cortesía del Zoo de la Casa de Campo, Madrid ▸

[Reconocemento pa Potret na pagina 24]

Pelikan: Foto: Loro Parque, Puerto de la Cruz, Tenerife; lora: Cortesía del Zoo de la Casa de Campo, Madrid