Hobennan Sa Puntra . . .

Kico di Discoteca pa Hobennan?

“E unico motibo pakico mi tawata bai, ta pa mi echt dibirti.”—Shawn.

“Pa bisa berdad, tawata dushi, masha dushi mes! Hopi baliamento, bo ta balia henter anochi.” —Ernest.

DISCOTECA y fiesta grandi pa hobennan a bira masha popular durante e ultimo añanan aki. Hopi hoben cu kier pasa bon ta bishita e sitionan aki regularmente.

Claro cu nos tur gusta pasa bon. Y Bijbel ta bisa cu tin un “tempo pa hari” y asta un “tempo pa balia.” (Eclesiastes 3:4) Sinembargo, baimento di discoteca pa hobennan ta un recreo sano? Of tin bon motibo pa nos pensa dos bes prome cu nos bai un luga asina?

“Fiestanan Desenfrena”

Aunke Bijbel no ta condena reunionnan social modera, e ta spierta nos contra di “parandiamento” of “fiestanan desenfrena.” (Galationan 5:19-21; Byington) Den tempo biblico, hopi bes parandiamento a hiba na comportacion fuera di control. Profeta Isaias a skirbi: “Ai di esnan cu ta lanta mainta tempran pa core tras di bebida sterki, cu ta keda lanta te anochi laat, te ora biña subi na nan cabes! Nan tin lirio, harpa, tamborin, fluit y biña na nan banketenan, ma nan no ta paga atencion na e echonan di SEÑOR.”—Isaias 5:11, 12.

Un caracteristica di e fiestanan aki tawata e uzo di “bebida sterki” y muziek desenfrena. Nan tawata cuminsa for di tempran y a dura te anochi laat. Tuma nota tambe di e actitud di e coredonan di paranda—nan a comporta nan mes como si fuera Dios no a existi! Pesei no ta straño cu Dios a condena e tipo di reunionnan social ei. Pero kico Dios ta pensa di loke ta tumando luga awe den hopi discoteca pa hobennan?

Considera algun cos cu ta sosode. Pa di prome, algun discoteca ta sigui promove un tipo di baile violento cu yama moshing. Segun un fuente, e baile aki ‘a desaroya den discoteca meimei di decada di 1980, despues di e periodo di punk na Merca. El a origina for di un tipo di baile den cua e baliadonan ta dal duro den otro.’ Hopi bes ora baliadonan ta mosh, nan ta keda bula den laira, sagudi nan cabes violentamente, imita e manera cu bestia ta dal otro cu cacho y tambe nan ta dal duro den e otro baliadonan. Pia of man kibra y corta na curpa ta cosnan masha normal. Tin hende tambe cu ta haya sla na nan wes’i lomba y na cabes. Tawatin hende cu a asta muri. Ademas, den algun discoteca nan ta hisa un hende na laira y e multitud ta keda pas’e di un man pa otro riba nan cabes. Y e ta keda como si fuera ta surf e ta surf riba olanan di lama. Hopi hende cu nan a hisa asina a yega di cai y a herida nan mes. Y ora ta trata di mucha mohe, no ta nada straño cu nan ta mishi cu nan na maneranan inapropiado.

No tin duda cu Dios ta condena e tipo di comportacion ei, pasobra su Palabra ta manda cristiannan ‘renuncia impiedad y deseonan mundano y biba huicioso.’—Tito 2:12.

Muziek y Droga

Pensa tambe riba e tipo di muziek cu nan ta toca den algun discoteca. Tin discoteca ta consentra principalmente riba hard rock of heavy metal, muziek cu ta ser caracterisa pa un ritmo fuerte y vibrante y letranan vulgar. Sinembargo, den algun discoteca e muziek preferi ta rap of hip-hop. E tipo di muziek aki tambe ta ser caracterisa pa sex, violencia y rebeldia. Ora bo ta bai e luganan aki bo ta exponiendo bo mes na e clase di muziek ei den un ambiente insaludabel. Esaki por afecta bo? David Hollingworth, un autoridad den e ramo di discoteca, a bisa: “Muziek tin un tremendo impacto psicologico riba hende. Ora bo pone hopi hende hunto, muziek por stimula nan pa comporta nan mes na un manera agresivo.” Pesei no ta un sorpresa cu tawatin un aumento drastico di violencia den discoteca den varios ciudad na Merca. Hopi hende ta pensa cu esaki ta un resultado direct di e clase di muziek cu ta promove actividadnan vulgar y actitud violento.a

Den ultimo añanan droga tambe a bira parti di e ambiente den discoteca. Un investigado a declara cu ‘loke a haci discotecanan popular ta e echo cu einan mes bo por haya un variedad di droga y bo por uz’e tambe.’ De echo, tin droga cu generalmente nan ta yama droga di baile. Algun hende cu regularmente ta bai discoteca ta asta uza un combinacion di droga. Un di e droganan cu mas nan ta combina cu otro droga ta ketamina (nan ta yam’e tambe special K). E ta un droga cu por desconecta un hende su mente for di su emocionnan, tambe e por causa halusinacion, problema cu halamento di rosea y daño na e sistema nervioso. Metanfetamina por causa perdida di memoria, agresividad, violencia y posiblemente daño na curason y na e sistema nervioso. Loke ta hopi popular ta e droga cu yama ecstasy (XTC), cu ta consisti principalmente di anfetamina. E por causa confusion, ansiedad, pulso acelera, presion di sanger halto y tambe keintura halto. Tin uzado di ecstasy cu asta a muri.

Uzo di droga ta na conflicto cu e mandato di Bijbel pa “purifica nos mes di tur impuresa di carni y spirito.” (2 Corintionan 7:1) Ta sabi pa bo hinca bo mes den un ambiente caminda nan ta uza droga libremente?

Mal Asociacion

Corda riba e spiertamento cu hende sa cita hopi: “Mal compania ta daña bon custumber.” (1 Corintionan 15:33) Mescos cu e coredonan di paranda den tempo biblico, ta parce cu hopi hoben cu ta frecuenta discoteca awe no ta interesa den agrada Dios. De echo, bo por describi mayoria di nan como personanan cu ta “mas bien stimado di placer cu stimado di Dios.” (2 Timoteo 3:4) Abo realmente kier tin asociacion estrecho cu e tipo di hendenan ei?

Algun hoben kisas ta rasona cu si nan bai un discoteca cu otro hobennan cristian, esei ta minimisa e peligernan. Sinembargo, hobennan cristian cu realmente ta ‘un ehempel den conducta pa esnan cu ta kere’, probablemente lo no ta dispuesto pa bai. (1 Timoteo 4:12) Asta si ta un grupo di hoben cristian a bai discoteca of fiesta hunto y a logra keda hunto, e muziek y ambiente insaludabel ta keda. Nan por haya nan den un situacion tenso of incomodo si hende cu no ta Testigo invita nan pa balia. Algun hoben a haya nan asta envolvi den bringamento! Pues e siguiente palabranan di Bijbel a resulta di ta berdad: “Esun cu anda cu hende sabi lo ta sabi, ma un compañero di hende bobo lo sufri daño.”—Proverbionan 13:20.

Baliamento Probocativo

Un otro punto pa considera tambe ta e baliamento mes. Tin un tipo di baile masha straño cu a bira hopi popular, specialmente entre hobennan na Merca. En general nan ta balia e baile aki riba muziek di hip-hop cu tin letranan cu ta describi actividadnan sexual detayadamente. Ademas, e baile mes ta imita relacion sexual. Pesei nan ta yama e movementonan di e baile aki ‘sex cu paña bisti.’

Un hoben cristian lo kier ta envolvi den e tipo di baile aki? No si e kier agrada Dios. Pasobra Dios ta manda nos “hui for di inmoralidad.” (1 Corintionan 6:18) Algun hoben kisas ta rasona: ‘Si tur hende ta hacie, e no por ta dje malo ei.’ Sinembargo, e manera cu mayoria hende ta actua por ta robes. (Exodo 23:2) Tene e curashi pa resisti bo pareunan y mantene un bon consenshi pa cu Dios!—1 Pedro 4:3, 4.

Con pa Tuma e Decision

Esaki no ta nifica cu tur baliamento ta malo. Bijbel ta conta nos cu Rei David tawata asina contento despues cu el a hiba e arca sagrado di pacto Herusalem, cu e “tawata balia . . . cu tur su forsa.” (2 Samuel 6:14) Den Hesus su parabola di e yiu perdi, e alegria cu tawatin pasobra e yiu a regresa, tawata compaña pa “muziek y baliamento.”—Lucas 15:25.

Asina tambe por tin cierto tipo di baile cu ta aceptabel pa cristian caminda bo ta biba. Pero asta ora esei ta e caso, ta importante pa bo ta balansa y distingui bon. Ta mucho mas safe pa disfruta di muziek y baliamento na fiesta di cristiannan caminda tin control y supervision adecuado, cu den discoteca pa teenager. Na fiestanan bon supervisa di cristiannan, hobennan no ta isola nan mes, mas bien nan ta disfruta di asociacion saludabel hunto cu cristiannan di tur edad.

Ta cierto cu den bo comunidad por tin algun restaurant caminda tin muziek y baliamento aceptabel. Pero prome cu bo acepta un invitacion pa bai un di e establecimentonan ei, ta bon pa bo puntra bo mes lo siguiente: Ki reputacion e luga ei tin? Su entretenimento, bebida y cuminda ta strictamente pa hoben? Si esei ta e caso, cuanto chens tin cu e ambiente ta uno saludabel? Ki clase di muziek nan ta toca? Con nan ta balia einan? Mi mayornan ta eens pa mi bai? Door di haci e tipo di preguntanan aki, bo por evita di haci bo mes daño.

Shawn cu nos a cita na principio di e articulo, a resumi e asunto hopi bon. Prome cu el a bira cristian e tawata bai discoteca regularmente. E ta conta: “Tin hopi conducta inmoral den discoteca. Por lo general e muziek ta degrada, e baliamento por lo general ta masha inmoral, y un gran mayoria di hende cu ta bai discoteca tin un solo proposito—ora nan bandona e discoteca nan kier sali cu un persona cu nan por bai tene relacion sexual cu ne.” Despues cu Shawn a studia Bijbel cu Testigonan di Yehova, el a stop di bai discoteca. Basa riba experencia doloroso, su opinion ta: “E luganan ei no ta caminda pa cristiannan bai.”

[Nota]

[Plachi na pagina 26]

Algun hoben a haya nan mes den situacionnan incomodo den discoteca