Luga di Empleo of Zona di Guera?

DI UN ESCRITOR DI SPIERTA! NA ALEMANIA

“Simplemente mi no por a soporta mas. Mi tawatin mas cu 30 aña na e compania. Mi a subi te na e nivel di supervisor. Anto un dia nos a haya un hefe nobo. E tawata hoben y dinamico, y cu hopi idea nobo. Segun e, mi tawata un obstaculo pa e compania, pesei el a cuminsa teima cu mi. Despues di lunanan di insulto, mentira y humiliacion, mi nervionan tawata na werki. Ora cu e compania a ofrece mi un pakete pa baha cu pension prematuro, mi a dicidi di acept’e.”—Peter.a

PETER tawata un victima di termento psicologico na trabou. Na Alemania, caminda Peter ta biba, tin segun calculo rond di 1,2 miyon hende cu ta wordo geter na trabou. Na Hulanda, 1 di cada 4 persona lo confronta esei na un dado momento durante nan añanan na trabou. Y un informe di e Organisacion Internacional di Trabou ta bisa cu teima cu hende na trabou of ter nan, ta un problema creciente na Australia, Austria, Dinamarca, Inglatera, Merca y Suisa. Pero kico precis termento psicologico na trabou ta encera?

Un “Guera pa Caba cu Bo Nervionan”

Segun e revista noticiero Aleman Focus, termento psicologico ta ora coleganan ta “teima cu un hende frecuentemente, repetidamente y sistematicamente.” E no ta simplemente hacimento di chansa na trabou, locual por inclui sarcasmo, critica, tentamento y asta mal chansa. Mas bien, e ta un campaña pa terorisa un hende psicologicamente. E meta ta pa exclui e victima, lag’e sinti cu e no ta un parti di e grupo.b

E tacticanan di ter un trahado of teima cu ne por varia for di teima pa co’i kens te na actonan criminal. Coleganan ta cuminsa daña reputacion di e victima y papia malo cu ne, tambe nan no ta worry cu ne y ta trat’e na un manera agresivo. Tin victima cu deliberadamente coleganan ta duna mas trabou cu tur otro hende of cu regularmente nan ta scohe pa haci e tareanan di mas desagradabel cu ningun otro hende kier haci. Coleganan por sabotea e victima su esfuerso pa ta productivo, podise door di keda sin dun’e informacion necesario. Den algun caso, esnan responsabel pa e termento a corta tire di auto di e victima of a bai sin autorisacion den su computer.

Algun trahado ta bira victima di un solo persona cu ta teima cu nan of ter nan. Pero mayoria biaha, ta un grupo di colega ta uni pa ataca un victima.

Podise e echo mas sorprendente ta cu den hopi caso e hefe ta di acuerdo cu e termento. Den algun estudio cu nan a haci na Europa a bin dilanti cu e supervisor a hunga un papel activo den 50 porshento di e casonan di termento, y hopi biaha ta e so tawata responsabel pa e termento. Tur e tacticanan aki ta comberti un persona su empleo den “un guera largo y angustioso; un guera pa caba cu bo nervionan”, segun e corant Aleman Frankfurter Allgemeine Zeitung.

Efectonan Mas Aya cu e Luga di Empleo

Hopi bes, e efectonan di termento ta bai hopi mas leu cu e luga di empleo. Hopi victima ta sufri di problemanan serio di salu debi na e trato cruel. Depresion, problema cu drumimento y atake di panico ta algun consecuencia di termento psicologico na trabou. Kico di Peter, menciona den e introduccion? Su balor propio a baha te na vloer. Un señora cu yama Margaret, tambe di Alemania, a ser conseha door di su docter pa busca tratamento na un clinica di salu mental. E causa? Na trabou nan tawata ter e. Esei por asta afecta un persona su matrimonio of bida di famia.

Na Alemania, termento na trabou a bira asina comun cu un compania di seguro medico a pone un number di telefon disponibel pa yuda victimanan. E compania a descubri cu mas cu mitar di esnan cu a yama no por a bai traha pa casi seis siman, rond di un tercera parti no por a traha durante tres luna, y mas cu 10 porshento no por a traha pa mas cu tres luna. Un revista medico di Alemania ta calcula cu “te cu 20 porshento di tur suicidio ta debi na termento na trabou.”

Pues ta bisto cu ora nan ta ter bo na trabou of teima cu bo, esei por comberti trabou den un pesadiya. Tin manera pa preveni esei? Kico bo por haci pa logra pas na trabou?

[Nota]

[Plachinan na pagina 4]

Termento ta comberti trabou den un pesadiya