Con un Trahado Por Bira Victima

Poco despues cu Monika a caba scol el a cuminsa core stage como oficinista na un kantoor di abogado. Monika a anticipa un transicion suave di bida di scol pa trabou.

Horst tawata un docter di 30 y pico aña. E tawata casa y tawatin yiu, y tur cos tawata indica cu lo el a bira un docter respeta y haya un bon entrada.

Tanto Monika como Horst a bira victima di termento psicologico na trabou.

E CASONAN di Monika y Horst ta siña nos un les balioso: No ta facil pa predeci ken lo bira victima di termento psicologico na trabou. De echo, cualkier persona cu cualkier tipo di trabou ta un posibel blanco. Pues anto, con bo por proteha bo mes? Un manera ta door di siña con pa logra pas na trabou, asta cu coleganan trabahoso.

Traha Bon cu Bo Coleganan

Pa hopi hende, nan trabou ta rekeri pa nan traha bon cu un team di colega y yuda e team ei funciona suavemente como un unidad. Si coleganan ta bai bon cu otro, e trabou ta bai dilanti. Si nan no ta bai bon cu otro, e trabou ta bai atras y tin mas chens cu nan ta cuminsa ter un colega of teima cu ne.

Kico por stroba un team di colega di funciona suavemente? Un factor por ta cambionan constante den personal. Den tal situacion, ta dificil pa sera lasonan amistoso. Ademas, coleganan nobo no conoce e rutina di trabou, y esei ta slow tur hende su actividad. Si e trabou ta acumula, e grupo probablemente ta constantemente bou di stress.

Mas ainda, si un team no tin metanan bon defini, e coleganan no ta sinti nan uni. Por ehempel, esaki por ta e caso ora cu un hefe insigur ta pasa mas tempo na defende su posicion como hefe cu na dirigi e trabou. Lo e por asta purba mantene control door di instiga coleganan contra otro. Loke por empeora e asunto ta ora e structura di e grupo no ta bon defini, locual ta pone cu algun colega no ta compronde kico precis ta nan responsabilidad. Por ehempel, por surgi conflicto ora cu dos empleado ta pensa cu nan tur dos tin e responsabilidad final di aproba cuentanan cu mester paga.

Den un situacion asina, ta bira dificil pa comunica cu otro y hopi bes no ta resolve conflictonan den cua un colega a sintie gehurt. Envidia ta daña e ambiente di trabou, y coleganan ta competi cu otro pa nan por keda bon mira serca e hefe. Mal comprondementonan chikito ta ser mira como gran insulto. De echo, coleganan ta cuminsa haci un pieu bira un baca. Situacionnan asina ta forma e base pa cuminsa ter un colega of teima cu ne.

Con Ta Scohe un Victima

Despues di transcurso di tempo, nan por scohe un empleado pa cuminsa teima cu ne. Ki clase di persona tin hopi chens di bira victima? Probablemente lo ta un hende cu ta destaca como diferente. Por ehempel, kisas e ta e unico hende homber den un ambiente femenino of e ta un hende mohe cu ta haci un trabou cu ta hende homber so sa haci. Tambe nan por mira un persona cu tin confiansa den su mes como un hende agresivo, mientras cu un persona reserva nan lo por mir’e como un persona cu ta haci cos bou di man. E posibel victima por ta diferente tambe den e sentido cu e ta mas bieu of mas jong cu tur otro colega of asta miho cualifica pa e trabou.

Ken cu e victima por ta, e coleganan “ta cuminsa haci cos di vrijpostig y malicioso cu e victima cu nan a scohe y asina nan ta sinti un alivio di nan propio stress”, segun e revista medico Aleman mta. Intentonan di e victima pa remedia e situacion lo no tin masha exito y por asta empeora e asunto. Segun cu e intimidacion ta bira mas frecuente y sistematico, e victima ta sintie mas isola y rechasa. Na e punto aki, tin hopi chens cu e victima di e termento no por resolve e situacion su so.

Naturalmente, semper tawatin e posibilidad cu trahadonan ta bira victima di maltrato na nan luga di empleo. Pero hopi hende por corda con antes coleganan tawata parce mas dispuesto na yuda otro. Masha poco bes tawata surgi casonan di termento organisa. Pero atrabes di añanan, a tuma luga loke un docter a describi como “un deterioro general di e spirito di solidaridad y un desaparicion na gran escala di e sentido di berguensa personal.” Awendia hende tin menos respet pa etica y nan no tin problema pa participa den guera abierto na trabou.

Pues, cu rason tur hende cu ta traha ta interesa pa sa e contesta riba e preguntanan aki: Bo por preveni termento? Con bo por logra pas na trabou?

[Plachi na pagina 6]

E meta di termento ta pa laga e victima sinti cu e no ta un parti di e grupo