Con pa Logra Pas na Trabou

DICON tin hende ta teima cu otronan? Bijbel ta yuda nos compronde e asunto. E ta splica cu nos ta bibando den “e ultimo dianan” di e sistema aki y cu ta pesei nos ta experencia “temponan trabahoso.” Hopi hende ta “stimado di nan mes, stimado di placa, gabado, arogante, blasfemado, desobedecido na mayornan, ingrato, impio, sin amor, ireconsiliabel, cu mala lenga, sin dominio propio, grosero, odiado di loke ta bon, traido, imprudente, soberbe.” (2 Timoteo 3:1-5) Den e temponan turbulento aki, tal comportacion ta tur caminda, y termento psicologico na trabou ta un di e resultadonan desagradabel. Pues anto, con abo por logra pas na trabou?

Resolve Conflicto

Hopi bes teimamento ta cuminsa debi na un conflicto entre coleganan cu no a ser resolvi. Pesei, sin cana mete den asunto di otro hende, percura atende umbes cualkier mal comprondemento den cua abo personalmente ta envolvi. Uza tacto y respet pa calma e dolor di un colega cu a sintie gehurt. Trata bo coleganan como personanan individual, no como un grupo. Si ta parce cu un colega tin algo contra bo, purba resolve e asunto. Tene na mente e conseho di Hesus: “Pura drecha asunto cu bo adversario.”—Mateo 5:25.

Ademas, tur hende na trabou ta beneficia si mantene e liñanan di comunicacion habri. Pues, purba comunica den un manera amical cu bo supervisor sin duna e impresion cu bo ta simplemente busca moda di ta bon mira serca dje. Corda tambe cu bon comunicacion cu bo pareunan y cu esnan bou di bo ta un bon remedi pa stress. Rei Salomon a skirbi: “Pa falta di conseho plannan ta fracasa, ma cu hopi consehero nan ta wordo logra.”—Proverbionan 15:22.

Pesei haci tur bo esfuerso pa ta amigabel cu bo coleganan. Pero esaki no ta nifica cu bo mester ta un “jaknikker”, y bai di acuerdo cu tur cos cu nan ta exigi di bo y asta compromete bo principionan djis pa mantene pas. Ma un actitud caloroso y amigabel por plakia un situacion desagradabel. Pero tene cuidou no solamente cu kico bo ta bisa otro hende sino tambe con bo ta bis’e. Un biaha mas Bijbel ta ofrece conseho sabi: “Un contesta suave ta kita rabia.” (Proverbionan 15:1) “Un lenga suave ta un palo di bida.” (Proverbionan 15:4) “Cu hopi pasenshi un gobernante por wordo persuadi.” (Proverbionan 25:15) “Laga boso palabranan ta semper cu gracia, sasona cu salo, pa boso por sa con boso mester contesta cada persona.”—Colosensenan 4:6.

“Laga Tur Hende Sa Cu Boso Ta Rasonabel”

Apostel Pablo a conseha cristiannan na Filipos: “Laga tur hende sa cu boso ta rasonabel.” (Filipensenan 4:5, NW) A base di e principio aki, fiha normanan di conducta rasonabel pa bo mes. Evita di tin mucho confiansa den bo mes of di ta mucho timido. Si bo coleganan ta tenta bo, no purba imita nan door di haci mescos bek. Bo no ta gana nada door di bruha e liña cu ta separa loke ta bon comportacion for di loke ta mal comportacion. Trata otro hende cu respet y dignidad, y bo tin mas chens di wordo trata mescos.

No pensa solamente riba bo comportacion sino tambe riba loke bo ta bisti. Puntra bo mes: ‘Ki impresion mi pañanan ta duna? Mi aparencia ta probocativo? E ta mustra descuida? Lo mi beneficia si mi bisti na un manera rasonabel pa trabou?’

Den mayoria cultura, hende ta balora y respeta trahadonan diligente y integro. Pues, purba gana respet di otronan door di rindi trabou di calidad halto. Sea un trahado confiabel. Esaki no kiermen cu bo mester kibra bo cabes pa haci delaster un trabou perfectamente. Un señora cu nan a cuminsa teima cu ne na trabou, despues a admiti cu pa un parti esei tawata su mes falta. El a bisa: “Mi kier tawata perfecto.” E señora aki a bin realisa cu perfeccion ta un meta imposibel: “Mi ta un bon trahado, pero mi no tin cu haci tur cos perfectamente.”

No sea demasiado sensitivo pa comentarionan negativo. No ta tur critica inhusto kiermen cu nan ta teima cu bo. Den Bijbel, Rei Salomon a skirbi: “No sea lihe den bo curason pa rabia . . . Tambe, no tuma na serio tur palabra cu wordo papia, . . . pasobra den bo curason bo sa cu hopi biaha abo mes tambe a maldiciona otro hende.”—Eclesiastes 7:9, 21, 22.

Pero un cos si, e echo cu bo ta sigui tal principionan sano no ta un garantia cu nunca nan lo teima cu bo of ter bo. Apesar di bo miho esfuerso, por tin colega cu toch ta teima cu bo. Kico lo bo por haci e ora ei?

Busca Apoyo

Gregory a admiti: “Mi a pasa door di un gran trastorno emocional ora cu pa varios luna mi coleganan no tawata worry cu mi.” Su experencia ta algo tipico pa e victimanan, kendenan ta sufri di un variedad di emocion doloroso: rabia, culpabilidad, berguensa, confusion, y tambe e sintimento di no ta bal nada. E presion di coleganan cu ta teima cu bo, por hiba asta un persona cu normalmente ta stabil, na desesperacion. De echo, Bijbel ta bisa cu “opresion ta haci un hende sabi bira loco.” (Eclesiastes 7:7) Pesei kico bo por haci?

Estudionan ta indica cu ta miho pa bo no purba trata cu e situacion bo so. Unda un victima por haya apoyo? Algun compania grandi a haci areglo pa yuda nan empleadonan cu ta sinti cu coleganan ta intimida nan. E companianan ei sa cu ta cumbini nan pa stop e teimamento y termento di colega. Segun un calculo, trahadonan cu ta teima cu un victima ta malgasta 10 porshento di nan ora di trabou. Caminda tin tal areglo disponibel, un victima lo por busca yudansa einan. Un consehero neutral—sea di e compania caminda bo ta traha of di pafo—lo por habri caminda pa tur partido envolvi papia tocante di e situacion y establece cierto reglanan di conducta pa trabou.

No Tin un Solucion Garantisa

Naturalmente, nos tin cu admiti cu no tin un solucion garantisa pa coleganan no teima cu bo of ter bo. Asta hende cu ta aplica e principionan di Bijbel describi den e articulo aki kisas ta nota cu e maltrato na trabou ta sigui tuma luga. E personanan ei por tin sigur cu Yehova Dios ta mira nan perseverancia y nan esfuerso pa desplega cualidadnan cu ta agrada Dios asta den un situacion dificil.—2 Cronicanan 16:9; Yeremias 17:10.

Tin hende den e situacion aki, dependiendo di e intensidad y frecuencia di e maltrato, ta dicidi di bai busca un otro trabou. Tin otro hende no tin e opcion ei, ya cu trabou kisas ta scars y no tin masha caminda cu nan por acudi pa yudansa. Monika, menciona den e articulo anterior, a ripara cu su problema cu tempo a haya un solucion ora cu e colega cu mas tawata teima cu ne, a kita for di trabou. Debi na esei, e ambiente na trabou a drenta un periodo basta trankil, y Monika por a completa su entrenamento prome cu el a dicidi di bai busca trabou otro caminda.

Pa loke ta Peter, menciona den e prome articulo, el a haya un alivio completo door di baha cu pension prematuro. Sinembargo, asta durante e periodo cu Peter tawata soporta e maltrato, el a beneficia di e apoyo di su casa. El a bisa: “Mi casa tawata sa kico mi ta pasando aden, y e tawata un pilar di fortalesa.” Vooral e fe cu Monika y Peter tawatin como Testigo di Yehova, a duna nan gran consuelo mientras cu nan tawata soporta nan prueba. Nan participacion den e predicacion publico a fortifica nan respet propio, y asociacion cu nan rumannan den fe a reafirma e amistadnan stabil cu nan tawatin.

Sea cual sea bo situacion, haci bo best pa logra bon relacion na trabou. Si nan ta teima cu bo of ter bo, haci esfuerso pa sigui e conseho aki di apostel Pablo: “Nunca paga malo cu malo na ningun hende. . . . Si ta posibel, asina leu cu ta depende di boso, sea na pas cu tur hende. . . . No laga malo vence bo, ma mas bien vence malo cu bon.”—Romanonan 12:17-21.

[Comentario na pagina 8]

Un actitud amigabel por plakia un situacion desagradabel

[Comentario na pagina 9]

“Si ta posibel, asina leu cu ta depende di boso, sea na pas cu tur hende.”—ROMANONAN 12:18

[Plachi na pagina 8, 9]

Atende umbes cualkier mal comprondemento den cua abo ta envolvi