Fraude Ta un Problema Mundial

WAYNE tawata un homber encantador y cu stem suave y cariñoso. E tawata precis e tipo di homber cu Karen lo kier a casa cu ne. Karen a bisa: “E tawata tur loke semper mi a pidi den oracion p’e y a spera di haya. Tur hende cu a mira nos a pensa cu nos tawata perfecto pa otro. El a laga mi kere cu e tawata locamente enamora di mi.”

Sinembargo, tawatin un problema. Wayne a bisa Karen cu e tawata e di tres homber den rango di responsabilidad den servicio secreto di Australia. E kier a retira, pero nan no a permitie. E tawata sa mucho hopi di nan actividadnan y nan lo a mat’e si e bai laga nan! Hunto e pareha a traha un plan. Nan lo casa, pone nan cen hunto, bandona Australia y hui bai Canada. Karen a bende su cas y tur cos cu e tawatin, y a confia Wayne cu e placa.

E casamento a tuma luga manera nan a plania. Wayne a hui for di e pais, pero Karen a keda atras, bandona, cu menos cu shete florin na banco. Poco despues el a haya sa cu e tawata victima di un plan mañoso y complica, yen di mentira cu Wayne a trama cu e solo proposito pa estaf’e. Mescos cu un actor, Wayne a hunga un rol specialmente diseña pa e cai na agrado di Karen. Su antecedente, su interesnan, su personalidad y su supuesto amor pa Karen tawata mentiranan pa gana su confiansa, un confiansa cu a costa Karen mas cu 360.000 florin. Un funcionario policial a declara: “Karen a ser viola emocionalmente. Asta si bo pone un banda e asunto di e placa, ta increibel cuanto daño un cos asina por causa un hende.”

Karen a bisa: “Mi emocionnan ta kibra na werki. E homber cu el a aparenta di ta no tawata existi.”

Karen ta simplemente un di e cantidad incontabel di victimanan di fraude y estafa rond mundo. No ta conoci cuanto placa estafadonan ta kita for di hende, aunke autoridadnan ta calcula cu e cifra ta suma na miles di miyones di florin y cu e ta bira mas tanto tur aña. Fuera di e perdida financiero, victimanan manera Karen ta sufri hopi dolor emocional sabiendo cu un hende a probecha di nan, anto hopi biaha un hende cu nan a confia.

Miho Preveni cu Lamenta

Fraude of estafa ta ser defini como “un plan mañoso of engaño delibera pa obtene placa pa medio di pretencion-, representacion- of promesanan falso.” Lamentablemente, mayoria hende cu comete fraude no ta ser castiga, pasobra hopi biaha ta dificil pa proba cu di berdad ta trata di un caso di engaño delibera. Ademas, hopi estafado conoce e buraconan cu tin den lei y ta probecha di nan—nan sa con pa estafa hende den maneranan cu ta dificil of imposibel pa hiba nan dilanti mesa berde. Es mas, pa lanta un caso criminal contra un estafado ta costa basta tempo y placa. Esnan cu por lo general ta ser sentencia pa nan crimen ta esnan cu a horta miyones di florin of cu a haci algo asina escandaloso cu nan ta acapara atencion di henter comunidad. Asta ora nan gara un estafado y castig’e, probablemente ya el a gasta of sconde e placa cu el a estafa. Consecuentemente, masha poco bes victimanan ta ricibi compensacion pa e placa cu nan a perde.

Pues simplemente bisa, si nan estafa bo, probablemente lo no tin masha cos cu bo por haci pa recupera loke bo a perde. Ta mas miho bo evita di bira victima cu busca un manera pa haya bo placa bek despues cu bo bira victima. Un homber sabi a skirbi hopi tempo pasa: “Un hende prudente ta mira maldad y ta sconde, ma e simpelnan ta sigui bai, y ta haya castigo pa esei.” (Proverbionan 22:3) E siguiente articulo lo splica maneranan den cua bo por proteha bo mes contra fraude of estafa.