Unda Bo Por Haya Norma y Balor Moral?

NOS ta biba den un mundo caminda etica of balornan moral ta cambiando. Practicanan deshonesto cu antes hende tawata condena, awor ta sera wowo pa nan. Medionan di comunicacion cu frecuencia ta laga ladronnan y estafadonan parce personanan agradabel, importante, deseabel of asta ta pinta nan como heroe. Como resultado, e descripcion aki cu nos ta haya den Bijbel ta pas pa hopi hende: “Ora bo mira un ladron, bo ta consenti cu ne.”—Salmo 50:18.

Sinembargo, no tin nada di admira na estafadonan. Un escritor a declara: “Un caracteristica unico di estafadonan ta e habilidad natural cu nan tin—cu hopi bes nan a descubri for di chikito—pa manipula hende rond di nan. Es mas, nan manipulacion di hende no ta molestia nan consenshi ni un tiki. Al contrario, e ta duna nan un sintimento intenso di satisfaccion, un cierto bienestar cu ta stimula nan pa sigui manipula hende pa haya kico cu nan kier, sin importa e costo pa e dunado.”

Naturalmente, hende en general ta sinti simpatia pa e biuda cu ser estafa di tur su placa, pero masha tiki hende ta sinti duele ora cu un persona malversa placa di un compania grandi of di un compania di seguro. Hopi hende ta rasona cu con cu bai bin, negoshinan tin hopi placa toch. Pero e fraudenan ei no ta problema di e negoshinan so; nan ta saca nan perdida for di e consumido. Por ehempel, na Merca, un famia comun y coriente ta paga mas cu 1.800 florin pa aña na extra prima di seguro pa cubri e costo di fraude.

Un otro cos ta cu hopi hende ta probecha di oportunidadnan pa cumpra productonan barata cu ta imita esnan di marca, manera paña, holoshi, perfume, cosmetica y tas. E hendenan kisas sa cu e productonan di imitacion ta costa companianan miles di miyones di florin pa aña, pero nan ta pensa cu esei no ta afecta nan. Sinembargo, na final di cuenta ta e consumido tin cu paga pa producto- y servicionan legitimo. Ademas, ora bo cumpra producto di imitacion bo ta yena saco di criminalnan.

Un escritor cu ta den e negoshi di combati fraude a skirbi: “Mi ta combenci cu e motibo principal pakico tin asina tanto fraude awe ta pasobra nos ta biba den un mundo sin ni un tiki etica. Tin un deterioro grandi di etica cu a inspira un cultura di fraude. . . . Nos ta biba den un sosiedad cu no ta siña etica na cas. Nos ta biba den un sosiedad cu no ta siña etica na scol, pasobra lo acusa maestronan di ta siña e muchanan norma y balor.”

Na contraste, Testigonan di Yehova si ta siña hende e normanan moral di e Palabra di Dios y ta haci esfuerso pa aplica nan den nan bida. Nan ta laga principionan manera lo siguiente guia nan:

● “Stima bo prohimo manera bo mes.”—Mateo 22:39.

● “No comete fraude.”—Marco 10:19.

● “Laga esun cu ta horta, no horta mas; ma mas bien, lag’e traha, haciendo cu su mes mannan loke ta bon, pa e por tin algo pa comparti cu esun cu ta den necesidad.”—Efesionan 4:28.

● “Cu deseo pa comporta nos mes den tur cos na un manera honorabel.”—Hebreonan 13:18.

Aunke Testigonan di Yehova no tin e actitud di ta satisfecho cu nan mes ni ta husto den nan mes bista, nan ta kere cu si tur hende tawata aplica e principionan aki, mundo lo ta un luga mucho mas miho pa biba aden. Nan ta kere tambe e promesa di Dios cu un dia mundo lo bira asina.—2 Pedro 3:13.

[Comentario na pagina 11]

Si tur hende tawata biba segun e normanan moral di e Palabra di Dios, mundo lo ta un luga mucho mas miho pa biba aden

[Plachi na pagina 10]

Cristiannan berdadero ta sigui principionan biblico, manera “Stima bo prohimo manera bo mes”