Hobennan Sa Puntra . . .

Kico Tin di Malo den Sex Prome Cu Bo Casa?

“Tin biaha mi ta puntra mi mes si sex prome cu casamento ta dje malo ei, vooral ora mi ta sinti cu no ta normal cu ainda mi ta un birgen.”—Jordon.a

“Mi ta sinti un presion pa experimenta cu sex. Mi ta kere cu nos tur tin e inclinacion natural pa purb’e. Unda cu bo bira, tur cos ta drei rond di sex!”—Kelly.

ABO tin e mesun sintimentonan cu Jordon y Kelly? Al fin y al cabo, e custumber- y balornan tradicional cu un tempo a descurasha hende pa haci sex prome cu nan casa, casi a disparce. (Hebreonan 13:4) Un encuesta den un pais Asiatico a revela cu mayoria mucha homber entre 15 pa 24 aña ta haya cu tenemento di relacion sexual prome cu casa no solamente ta algo cu ta ser acepta, sino tambe algo cu asta ta ser spera di nan. Nada straño anto cu mayoria hoben rond mundo a yega di haci sex prome cu nan a cumpli 19 aña.

Tambe tin hobennan cu ta evita di tene relacion sexual pero cu en bes di esei ta practica otro actonan sexual, manera caricia otro su organonan sexual (masturbacion mutuo). Un informe precupante den The New York Times ta revela cu “sex oral a bira un forma normal pa cuminsa practica sex, algo cu hopi hoben ta considera menos intimo, menos riscante cu relacion sexual mes . . . [y] como un manera pa evita di sali na estado y pa conserva nan birginidad.”

Pero con un cristian mester mira sex prome cu matrimonio? Y kico di otro tipo di practicanan sexual? Nan ta aceptabel den bista di Dios? Nan ta safe? Y di berdad nan ta conserva bo birginidad?

Kico Ta Inmoralidad

E unico persona cu por duna un contesta confiabel riba e preguntanan aki ta nos Creador, Yehova Dios. Y den su Palabra e ta bisa nos pa “hui for di inmoralidad.” (1 Corintionan 6:18) Kico exactamente esei kiermen? E palabra Griego traduci como inmoralidad of fornicacion no ta limita na relacion sexual so sino ta inclui tambe un variedad di actonan indecente. Pues si dos persona no casa ta practica sex oral of ta caricia otro su organonan sexual, nan ta culpabel di inmoralidad.

Pero, den bista di Dios, por considera nan birgen ainda? Den Bijbel e palabra “birgen” ta ser uza como simbolo di puresa moral. (2 Corintionan 11:2-6) Pero tambe e ta ser uza den un sentido fisico. Bijbel ta papia di un mohe hoben cu yama Rebeca. E ta bisa cu e mucha mohe aki tawata “un birgen, y ningun homber no tawatin relacion cu ne nunca.” (Genesis 24:16) Ta interesante pa nota cu den e idioma Hebreo original, e palabra pa “relacion” evidentemente a encera mas cu e relacion normal entre homber cu mohe. (Genesis 19:5) Pues, segun Bijbel, si un hoben a comete cualkier forma di inmoralidad, sigur lo no por a consider’e un birgen mas.

Bijbel ta urgi cristiannan pa hui no solamente for di inmoralidad mes sino tambe for di tur forma di conducta impuro cu lo por hiba na dje.b (Colosensenan 3:5) Kisas otronan por haci bofon di bo pa esei. “‘Bo no sa kico bo ta perde!’ ta loke mi tawatin cu tende tur e añanan cu mi a bai scol secundario”, segun un hobensita cristian cu yama Kelly. Sinembargo, sex prome cu matrimonio no ta nada mas cu e “placernan pasahero di pica.” (Hebreonan 11:25) E por causa un daño duradero tanto fisico, emocional como spiritual.

Menasa Serio

Bijbel ta bisa nos cu Rei Salomon a yega di mira con un yoncuman a ser seduci pa tene relacion prome cu e casa. Salomon a compara e yoncuman cu “un buey [cu] ta bai pa wordo mata.” Ora un buey of un toro ta bai wordo mata, e no tin ningun idea kico ta bai pasa cu ne. Hobennan cu ta tene relacion sexual prome cu nan casa sa comporta nan mescos—nan actitud ta como si fuera nan no ta conciente mes cu nan accionnan lo tin consecuencianan serio! Relaciona cu e yoncuman ei, Salomon a bisa: “E no sa cu esaki lo cost’e su bida.” (Proverbionan 7:22, 23) Si, bo “bida” ta den wega.

Por ehempel, tur aña miyones di hobennan ta pega cu malesanan transmiti sexualmente. Un di e victimanan aki, Lidia, a bisa: “Ora mi a haya sa cu mi tawatin herpes, mi kier a sali bai na careda.” El a bisa cu duele: “Ta un enfermedad doloroso cu no ta cura nunca mas.” Mas cu mitar di tur caso nobo di infeccion di HIV rond mundo (6.000 pa dia) ta tuma luga serca hobennan cu tin entre 15 pa 24 aña.

Vooral hende mohe ta vulnerable pa hopi problema relaciona cu sex prome cu matrimonio. De echo, hende mohe ta core mas peliger di keda infecta cu malesa transmiti sexualmente (y tambe HIV) cu hende homber. Si un hobensita sali na estado, tanto e como e yiu cu no a nace ainda ta core un riesgo adicional. Dicon? Pasobra kisas curpa di e hobensita no a desaroya suficiente ainda pa e haya yiu na un manera safe.

Asta si un mama teenager scapa di e consecuencianan severo di salu, ainda e tin cu enfrenta e responsabilidadnan serio cu ser mayor ta trece cu ne. Hopi mucha mohe ta haya cu ta hopi mas dificil cu nan a imagina pa percura pa nan mes y pa nan criatura resien naci.

Tambe tin e efectonan spiritual y emocional cu ta bini despues. E pica sexual di Rei David a pone su amistad cu Dios na peliger y casi a ruin’e spiritualmente. (Salmo 51) Y aunke David a recupera den sentido spiritual, el a sufri e consecuencianan di su pica pa resto di su bida.

Hobennan djawe por sufri mescos. Por ehempel, tempo cu Cherie tawatin apenas 17 aña, el a cuminsa tene relacion sexual cu un mucha homber. El a kere cu e mucha homber tawata stim’e. Hopi aña despues, ainda Cherie tin duele di su accionnan. El a lamenta: “Mi no a duna balor na e berdadnan di Bijbel y a sufri e consecuencianan. Mi a perde e fabor di Yehova y esei tawata devastador.” Un hoben cu yama Trish ta admiti mescos: “Sex prome cu casa tawata e eror di mas grandi di mi bida. Lo mi ta dispuesto pa haci tur loke ta necesario pa bira un birgen atrobe.” Si, herida emocional por permanece pa hopi aña, y esei ta causa stress y dolor di curason.

Siña Domina Bo Mes

E hoben Shanda a haci un pregunta importante: “Pakico Dios ta duna hobennan deseonan sexual, siendo cu e sa mucho bon cu nan no tin mag di satisface nan deseonan sino te despues cu nan casa?” Ta berdad cu deseo sexual por ta hopi fuerte durante ‘e flor di hubentud.’ (1 Corintionan 7:36) De echo, diripiente un teenager por haya un deseo sexual sin ningun aparente motibo. Pero esaki riba su mes no ta nada malo. E ta un parti normal di e desaroyo di e sistema reproductivo.c

Ta berdad tambe cu Yehova kier pa hende haya placer den relacion sexual. Esaki tawata na harmonia cu su proposito original pa hende yena e tera. (Genesis 1:28) No obstante, nunca tawata su intencion pa nos a haci mal uzo di nos poder pa haya yiu. Bijbel ta bisa: “Cada un di boso [mester] sa con pa tene su mes curpa den santificacion y honor.” (1 Tesalonicensenan 4:4) Un hende cu ta haya cu e tin cu satisface su mes cada bes cu e tin deseo sexual, den un sentido, ta mes bobo cu un hende cu ta haya cu e tin cu dal un hende ki ora cu e rabia.

Relacion sexual ta un don di Dios, un regalo cu bo por disfruta di dje na su debido tempo—ora bo ta casa. Con Dios ta sinti ora nos ta purba disfruta di sex sin cu nos ta casa? Wel, imagina bo cu bo a cumpra un regalo pa un amigo. Prome cu bo por duna e amigo e regalo, e ta hort’e! Lo bo no rabia? Imagina bo anto kico Dios ta sinti ora un persona ta tene relacion sexual prome cu e casa, haciendo mal uzo di e don cu Dios a dun’e.

Kico bo mester haci tocante bo sintimentonan sexual? Cu poco palabra, siña domina nan. Corda bo mes cu “SEÑOR ta duna gracia y gloria; e no ta keda sin duna loke ta bon na esnan cu ta cana den rectitud.” (Salmo 84:11) Un hoben cu yama Gordon a bisa: “Ora mi cuminsa pensa cu sex prome cu matrimonio no ta dje malo ei, mi ta medita riba e mal consecuencianan spiritual y ta realisa cu no ta bale la pena perde mi relacion cu Yehova pa motibo di pica.” Kisas no ta facil pa eherce dominio propio. Pero manera e hoben Adrian ta recorda nos, “e ta laga bo cu un consenshi limpi y un bon relacion cu Yehova, liber pa enfoca riba e cosnan mas importante, sin remordimento pa accionnan di pasado.”—Salmo 16:11.

Tin hopi bon motibo pa bo ‘abstene bo di inmoralidad sexual’ den tur su varios formanan. (1 Tesalonicensenan 4:3) Nos ta admiti si cu esaki no ta semper facil. Un proximo articulo lo trata maneranan practico den cua bo por “mantene bo mes puro.”—1 Timoteo 5:22.

[Nota]

[Komentario na pagina 13]

Si un hoben a comete cualkier forma di inmoralidad, por consider’e un birgen ainda den bista di Dios?

[Plachi na pagina 13]

Sex prome cu casamento por daña e consenshi di un hoben cu ta teme Dios

[Plachi na pagina 14]

Hende cu ta tene relacion sexual prome cu nan casa ta core riesgo di pega cu malesa transmiti sexualmente