Bibando Cu e Trauma di un Atake Terorista

DI UN ESCRITOR DI SPIERTA! NA SPAÑA

DIA 11 di maart 2004, e zonido di explosion di dies bom den tres diferente stacion di trein a sagudi e stad di Madrid na Spaña. Un atake simultaneo riba cuater trein di pasahero a mata un 190 hende y herida 1.800.

Ya cu e bomnan a explota durante e oranan druk di mainta, tawatin hopi hende den tur e treinnan y e destruccion tawata algo teribel. Aroa, un testigo ocular, a bisa: “E forsa di e explosion tawata asina grandi cu mi a mira henter un wagon bai un meter halto. Ora mi a sali for di mi wagon, henter e area tawata parce un zona di guera. Ta un cos horibel pa mira un masacre asina den bida real.” E mesun susesonan escalofriante a tuma luga riba cuater diferente trein y den dies diferente wagon. E teroristanan a laga rugzak yen yen di explosivo den e treinnan y despues a activa esakinan cu telefon cellular.

Algun di e pasaheronan a sali ‘di bon’ den e sentido cu nan no por corda e susesonan teribel cu nan a pasa aden. Pero centenares di nan, manera Aroa, tin cu biba cu e cicatrisnan fisico y emocional. Aroa a bisa: “E explosion a causa daño grave na mi oido, pero loke mas ta afecta mi ta e imagennan di horor cu a keda graba den mi mente.”

Aroa a agrega: “Afortunadamente, como un Testigo di Yehova, mi a ricibi hopi apoyo emocional. Yamada di telefon y mensahe di tur parti di mundo a recorda mi cu nos en berdad ta un hermandad mundial. Ademas, Bijbel ta yuda nos compronde pakico e crueldadnan aki ta tuma luga. Mi a splica algun di mi coleganan di trabou cu e Scritura a profetisa cu ‘den e ultimo dianan’, hende lo bira violento y sin cariño. Tambe mi a haya cu mi sirbishi di tempo completo a resulta di ta un bon yudansa pa calma e dolor.”—2 Timoteo 3:1-3, BPK.

Pedro tawata un di e tantisimo pasaheronan cu a sufri heridanan serio. E tawata para menos cu cuater meter for di e bom cu a explota den su wagon. E explosion a tumb’e abou, causando herida na cabes y problema serio cu halamento di rosea. Despues di a pasa cinco dia den cuido intensivo, el a cuminsa recupera. E gran cantidad di rumannan den fe cu a bishit’e a lanta su animo, y tambe nan a sorprende e personal medico. Un enfermera a bisa asombra: “Den 26 aña nunca mi a yega di mira un hende ricibi tanto bishita y tanto regalo asina!” Pedro, di otro banda, a papia hopi positivo di e personal medico. El a bisa: “Nan tawata maraviyoso. Nan a yuda mi recupera enormemente.”

Hopi di e victimanan tawata imigrantenan cu no tawatin hopi tempo na Spaña. Manuel, un Cubano, a ser herida pa e prome explosion na e stacion di Atocha, pa despues e di dos explosion lag’e inconciente. El a splica: “Den e panico, e hendenan a trapa mi ora mi tawata benta abou riba plataforma di e stacion. Ora mi a bin bei, mi tawatin dos repchi kibra y un pia fractura. Tambe mi a perde oido por completo den un horea.”

Manuel a agrega: “Trahadonan di emergencia—polis, servicio di ambulans y bombero—a yega na e sitio den un par di minuut, y nan a duna nos e miho asistencia posibel. Nan tawata sa precis kico nan mester a haci, y nan eficiencia y profesionalismo a yuda controla e situacion di panico. Nan a haci sigur cu mi a haya e atencion medico necesario y tambe nan a trata mi cu bondad y compasion.”

Spanto Despues di e Trauma

Mescos cu Aroa, Manuel a keda cu cicatrisnan emocional profundo. El a confesa: “Ki dia ei ora mi a subi un trein mi a haya un atake di panico. Mi mester a baha bek mesora. Y te ainda, ki ora mi mira un hende den transporte publico ta cana cu un rugzak of algo similar, mi ta bira desconfia. Pero maske mi no tin ni un famia ta biba na Spaña, mi a haya hopi mas yudansa cu otro hende. Literalmente centenares di mi rumannan spiritual a bel mi, y un famia Testigo a invita mi na nan cas pa un par di dia pa mi no sinti mi mi so. E sosten balioso aki di nos hermandad mundial a yuda trankilisa mi.”

Ainda Sergio, un pasahero cu a sali ileso, ta sufri tur dia di e esenanan cu el a mira tur rond di dje. Un bom a explota den e wagon dilanti esun di dje, y un otro bom den e wagon pega su tras. Mescos cu Manuel, e ta gradicido pa e sosten amoroso cu el a haya di su famia y di su rumannan di fe. El a bisa: “Nan no solamente a demostra nan amor pa mi sino tambe nan a recorda mi cu mi ta pertenece na un hermandad uni cu ta interesa den cada un di su miembronan. No a pasa ni un dia sin cu mi a haya e apoyo aki, y e cantidad di yamadanan di telefon a permiti mi expresa mi sintimentonan, locual hopi bes ta dificil pa mi.”

Algun pasahero den e treinnan a experencia diferente tipo di ansiedad. Por ehempel, Diego no tawata sa mes cu e tawata sinta banda di un di e cuater bomnan cu no a explota. El a logra sali ileso for di e trein. “Pero awor mi ta sinti mi culpabel di no a ofrece yudansa na e heridonan”, el a confesa. “Mi a laga e panico domina mi, hunto cu e centenares di hendenan cu a core sali for di e stacion mas lihe posibel.”

E explosion den e trein di Ramón, un yoncuman di Brazil, a lag’e den un estado di shock cu apenas e por a move. No obstante, dos dia despues di e atake, el a dicidi di bai predica e mensahe di Reino na otro hende. Ramón a topa un homber Portugues cu a bis’e cu e tawata buscando e religion berdadero. Ramón por a cuminsa un studio di Bijbel cu e homber, kende mesora a cuminsa asisti na e reunionnan cristian. Ramón a remarca: “Ora bo por yuda otro hende spiritualmente, bo ta sinti bo miho.”

Sin duda tur e victimanan mester di tempo pa recupera di e heridanan fisico y emocional cu nan a sufri. Lamentablemente, nos ta biba den un tempo caminda violencia sin sentido por cuminsa cualkier caminda. Y aunke balornan spiritual por yuda victimanan biba cu e trauma, finalmente ta e Reino di Dios so lo elimina e tragedianan aki.—Revelacion 21:3, 4.

[Cuadro/Plachi na pagina 15]

FORTALESA SPIRITUAL PA BIBA CU TRAUMA

Manuel Suárez

“Mientras ainda mi tawata den shock, wardando pa bai hospital, mi a keda corda e palabranan di Proverbionan 18:10: ‘E nomber di Yehova ta un toren fuerte; e husto ta core drenta den dje y ta sigur.’ E palabranan ei a fortalece mi.”

Aroa San Juan

“Ora bo pasa door di algo asin’aki, bo ta realisa mas cu nunca cu nos ta den e ultimo dianan y cu nos tin cu consentra riba balornan spiritual. Gracias na mi sirbishi di tempo completo, pocopoco pero sigur mi ta superando e trauma aki.”

Fermín Jesús Mozas

“Apesar di e heridanan na mi cabes, mi por a ofrece yudansa y trankilisa algun otro pasahero herida. Mi ta kere cu mi a keda calmo pa motibo di e speransa di resureccion cu Dios a duna nos, un speransa cu ta fortalece nos na momentonan asina.”

Pedro Carrasquilla

“Ora mi tawata drumi den e seccion di cuido intensivo, sufriendo di un dolor di pecho fuerte, cada bes e palabranan di 1 Timoteo 6:19 tawata pasa den mi mente. Nan ta anima nos pa establece un bon fundeshi pa futuro pa nos gara loke ta e berdadero bida. E versiculo aki a recorda mi di nos speransa di Paradijs, cu Dios a priminti na hende cu ta stim’e. Esei ta loke nos kier logra.”

[Plachi na pagina 13]

Ariba: Trahadonan di rescate ta atende e heridonan riba e railnan pafo di e stacion di Atocha

[Reconocemento]

Ariba: CORDON PRESS

[Plachi na pagina 13]

Man drechi: Un sitio conmemorativo improvisa