Docternan den un Mundo Cu Ta Cambia

Na aña 1174, Maimonides a keda nombra como docter priva di e gobernantenan di Egipto y e tawata pasa mayoria di su tempo na palacio. El a skirbi kico tawata pasa tur dia ora cu e yega cas: “Mi ta come algo liviano, e unico cuminda cu mi ta come den binticuater ora. Caba mi ta bai atende mi pashentnan y skirbi recept y instruccion pa nan malesanan. Pashentnan ta keda drenta sali te ora anochi sera, y tin biaha . . . mi ta asina agota cu apenas mi por papia.”

ETRABOU di docter semper a rekeri sacrificio propio. Pero e mundo djawe den cua docternan ta practica medicina ta cambiando rapidamente. Nan orario di trabou te ainda por ta mes agotador cu esun di Maimonides. Pero acaso hende ta respeta docternan mes tanto cu na antes? Con circunstancianan nobo a afecta docternan su estilo di bida tipico? Y con desaroyonan resien a cambia e relacion entre docter y pashent?

Un Cambio den Relacion

Tin hende ainda ta corda e tempo cu un docter por a cana cu tur su remedinan den su maletin preto. Den e tempo ei—mescos cu awor—hende tawatin sintimento mixto pa cu docter. Hende tawatin masha admiracion y respet pa mayoria docter debi na nan habilidad, rango y etica. Sinembargo, na mesun tempo nan por a ser critica pa e tarifa cu nan ta cobra, zundra pa nan fracasonan y denuncia pa nan aparente falta di compasion.

Pero toch hopi docter tawatin e gran satisfaccion di yuda varios generacion di e mesun famia. Nan tawatin custumber di bishita hopi pashent na cas, y den areanan di cunucu tin biaha nan tawata keda come of asta keda drumi ora di yuda cu hayamento di yiu. Hopi docter personalmente tawata traha e remedi pa nan pashentnan. Docternan generoso tawata duna tratamento gratis na hende di poco recurso y nan tawata disponibel 24 ora pa dia, 7 dia pa siman.

Claro cu te ainda tin algun docter ta traha asina, pero na hopi luga e caracter di e relacion entre docter y pashent a cambia. Y probablemente e cambio durante ultimo decadanan tawata hopi mas grandi cu e cambio durante siglonan anterior. Con bin e cambionan aki a tuma luga? Laga nos wak prome e asunto di bishita pashent na cas.

Kico A Pasa cu Bishita Pashent na Cas?

Bishita pashent na cas tawata e manera custumbra di practica medicina, y den algun pais ainda esei ta e caso. Pero mundialmente e custumber ei ta menguando. E corant The Times of India a bisa: “E docter di cas cu tipicamente tawatin un manera trankilisante di papia y di trata cu pashent, cu tawata conoce e famia intimamente y cu tawata dispuesto pa pasa na cas ki ora cu tawata necesario, ta birando mas y mas scars den un era di specialista y di superspecialista.”

Debi na e gran aumento di conocemento medico, hopi docter a specialisa nan mes den cierto ramo y ta traha como parti di un grupo, e resultado ta cu pashentnan kisas ta mira un otro docter cada biaha cu nan ta malo. Consecuentemente, hopi docter no por tin e relacion di largo plaso mas cu famianan manera antes tawata e custumber.

E cambio di stop di bishita pashent na cas a start un siglo pasa, tempo cu docternan a cuminsa haci mas uzo di test di laboratorio y di ekipo di diagnostica. Na hopi luga, agencianan di salubridad a cuminsa mira e asunto di bishita pashent na cas como un manera ineficiente pa uza docternan su tempo. Awe, mayoria pashent por haya transport pa bai un oficina di docter. Ademas, servicionan medico ausiliar y di emergencia ta haci trabou cu antes tawata na encargo di docter.

Cambio di Circunstancia

Den e mundo djawe masha poco docter ta independiente. Mayoria bes ta agencianan gubernamental of companianan di cuido di salu ta percura servicionan medico cu ta duna trabou na docternan. Sinembargo, hopi docter no ta gusta cu tin un tercer partido den e relacion entre docter y pashent. E agencianan ei hopi biaha ta rekeri di docternan pa nan wak mas pashent den menos tempo. Dr. Sheila Perkins, un docter di cas na Gran Bretania, a bisa: “Mi tin cu wak un pashent cada shete pa dies minuut. Y gran parti di e tempo ei mi tin cu uza pa hinca informacion di e pashent den computer. Ta resta masha tiki tempo pa cultiva un relacion cu e pashent. Esei por ta masha frustrante.”

E mundo cambia den cua docternan ta practica medicina awor ta un mundo caminda pashentnan a haya mas poder. Un tempo “ordo di docter” tawata lei. Pero den hopi pais awe, docternan ta obliga na informa e pashent di opcionnan di tratamento cu tin y di nan posibel resultadonan di manera cu e pashent por aproba un tratamento despues di compronde loke e ta encera. E relacion entre docter y pashent a cambia. Tin hende ta opina cu awor un docter ta simplemente un experto di cierto tecnica y procedura pero cu ta e pashent tin cu tuma hopi di e decisionnan.

Den nos sosiedad cu ta cambiando rapidamente, un cantidad grandi di docter ta hende mohe. Docternan femenino hopi biaha ta mas popular pasobra hende ta haya cu nan ta miho scuchado. Pues, nan influencia riba e profesion medico aparentemente ta hacie mas compasivo.

Mayoria hende ta aprecia un docter cu ta compronde e sintimentonan di e pashentnan y e stress cu nan tin. Pero ta rasonabel pa puntra: Cuanto pashent ta compronde e sintimentonan di nan docter y e stress cu nan tin? Esaki sigur lo por mehora e relacion entre docter y pashent. E siguiente articulo por yuda den esei.

[Plachi na pagina 3]

Maimonides

[Plachi na pagina 3]

Brown Brothers

[Plachi na pagina 4]

Antes, docternan hopi bes a bishita pashent na cas