Mama Su Papel Honorabel

MAMA su papel hopi biaha ta ser balota y asta menosprecia. Un par di decada pasa, hende a cuminsa rebaha e papel di cuida yiu. Nan punto di bista tawata cu esei ta menos importante cu un carera y ta asta un forma di opresion. Aunke mayoria hende lo haya e actitud ei extremo, toch por lo general hende ta laga mamanan sinti cu ser un ama di cas y cuida yiu ta un ocupacion inferior. Tin hende ta asta haya cu un mohe mester tin un carera pafo di cas pa e por realisa su pleno potencial.

Sinembargo, hopi esposo y yiu a siña aprecia e papel di mama den famia. Carlo, kende ta sirbi na e sucursal di Testigonan di Yehova na Filipinas, a splica: “Mi ta akinan awe debi na e educacion cu mi mama a duna mi. Mi tata tawata un persona hopi stricto y a castiga bo mesora, pero Mama a yuda nos door di splica y rasona riba asuntonan. Mi ta echt aprecia su manera di siña nos.”

Peter, na Sur Africa, ta bin di un famia di seis yiu. Nan a ser cria door di un mama cu tawatin un educacion limita. Nan tata a bandona e famia. Peter ta corda: “Como cria di cas y haciendo trabou di limpiesa, Mama no a gana masha. Tawata dificil pa e paga scol pa nos tur. Hopi bes nos tawata bai drumi cu hamber. Djis paga pa e dak riba nos cabes tawata un reto. Apesar di tur e dificultadnan aki, Mama nunca no a entrega. El a siña nos pa nunca compara nos mes cu otro hende. Si no tawata pa su dedicacion cu curashi, nunca nos lo tawatin e exito cu nos a logra den bida.”

Un esposo Nigeriano, Ahmed, a expresa kico e ta pensa di e yudansa cu su esposa a dun’e den cria nan yiunan: “Mi ta aprecia e papel di mi esposa. Ora mi no ta na cas, mi tin e confiansa cu e muchanan ta bon cuida. En bes di sinti cu mi casa ta competi cu mi, mi ta gradicie y mi ta laga e muchanan sa cu nan tin cu respet’e mescos cu nan ta respeta mi.”

Un homber Palestino ta cla pa elogia su esposa su exito como mama: “Lina a logra hopi cu nos yiu mohe y ta contribui masha na e spiritualidad di nos famia. Na mi opinion, su exito ta debi na su creencianan religioso.” Lina ta un Testigo di Yehova y ta sigui principionan biblico ora e ta educa su yiu mohe.

Cua ta algun di e principionan aki? Kico nos por bisa di e manera cu Bijbel ta mira mama? Con mamanan den pasado a haya un posicion di dignidad y respet como educado di nan yiunan?

Un Punto di Bista Balansa di Mama

Ora Dios a crea hende mohe el a asign’e un papel honorabel den e areglo di famia. E prome buki di Bijbel ta bisa: “SEÑOR Dios a bisa: ‘No ta bon pa e homber ta so; lo mi traha un yudado p’e cu ta pas cu ne.’” (Genesis 2:18) Pues Dios a percura e prome mohe, Eva, como e parti pa complementa Adam. Eva tawata pas perfectamente como un ayudante p’e. E tawata parti di Dios su proposito pa nan produci yiu y cuida nan y tambe cuida e tera y su bestianan. E lo mester a percura e estimulo intelectual y e sosten di un berdadero compañera. Adam tawata hopi felis cu e bunita regalo aki cu el a haya di e Creador.—Genesis 1:26-28; 2:23

Mas despues, Dios a duna instruccion encuanto con mester trata hende mohe. Por ehempel, mester a mustra honor na mamanan Israelita y no tawatin mag di trata nan cu desprecio. Si un yiu homber a “maldiciona su tata of su mama”, lo el a ricibi castigo di morto. Anto Bijbel a urgi hobennan cristian pa “obedece [nan] mayornan.”—Levitico 19:3; 20:9; Efesionan 6:1; Deuteronomio 5:16; 27:16; Proverbionan 30:17.

Bou di guia di e esposo, e mama mester tawata e educado di tanto yiu mohe como yiu homber. Un yiu homber a haya e ordo pa ‘no bandona e siñansa di su mama.’ (Proverbionan 6:20) Ademas, Proverbionan capitulo 31 ta duna “e mensahe di peso cu [Rei Lemuel] su mama a dun’e como coreccion.” Sabiamente el a instrui su yiu homber pa evita mal uzo di bebida alcoholico, bisando: “No ta pas pa reinan bebe biña, ni pa alto funcionarionan bisa: ‘Unda tin bebida intoxicante?’, pa e no bebe y lubida loke ta decreta y troce e caso di cualkier di e yiunan di afliccion.”—Proverbionan 31:1, 4, 5, NW.

Ademas, lo ta sabi pa tur yoncuman cu ta pensando riba matrimonio pa considera e descripcion cu e mama di Rei Lemuel a duna di “un mohe birtuoso” of “un esposa capas” [NW]. El a bisa: “E bal mucho mas cu rubi.” Anto despues di describi e contribucion importante cu un esposa asina ta haci na un famia, e mama di e rei a bisa: “Ser atractivo ta engañoso y bunitesa ta banidad, ma un mohe cu ta teme SEÑOR, esei lo wordo elogia.” (Proverbionan 31:10-31) Claramente anto, nos Creador a traha hende mohe pa nan ocupa un puesto di honor y responsabilidad den e famia.

Den e congregacion cristian tambe esposa- y mamanan ta ser honra y aprecia. Efesionan 5:25 ta bisa: “Esposonan, stima boso esposa.” E yoncuman Timoteo, kende su mama y wela a siñ’e for di chikito pa respeta “e scrituranan santo”, a ricibi e siguiente conseho inspira: ‘Trata e mohenan mas bieu manera mama.’ (2 Timoteo 3:15; 1 Timoteo 5:1, 2) Pues, un homber mester respeta un hende mohe mas grandi como si fuera e tawata su mama. Dios realmente ta duna balor na hende mohe y ta otorga nan un posicion digno.

Expresa Bo Aprecio

Un homber cu a lanta den un cultura caminda hende mohe ta ser considera como inferior a conta: “Mi a ricibi un educacion cu a drei rond di hende homber, y mi a observa e maltrato di hende mohe y un falta di respet pa nan. Pues mi tawatin un lucha pa mira hende mohe manera e Creador ta mira nan, como un complemento—of compañera y ayudante—den e hogar y como parti di un team den dunamento di educacion na e yiunan. Aunke ta dificil pa mi expresa palabranan di elogio na mi esposa, mi ta reconoce cu e bon cosnan cu tin den mi yiunan ta debi na su trabou.”

Si, mamanan cu ta asumi nan responsabilidad como educado por sinti nan mes orguyoso di nan papel. E ta un carera digno. Cu tur derecho nan ta merece elogio y expresionnan sinsero di aprecio. Tin asina hopi cos cu nos ta siña for di mama, por ehempel, bon custumbernan cu ta yuda nos durante henter nos bida, bon manera cu ta asina importante pa bon relacion, y den hopi caso un educacion moral y spiritual cu ta tene hobennan den bon caminda. Abo resientemente a expresa aprecio na bo mama pa loke el a haci pa bo?

[Plachi na pagina 9]

Peter su mama a siñ’e pa no entrega

[Plachi na pagina 10]

Ahmed ta masha gradicido pa e yudansa di su esposa den lanta nan yiunan

[Plachi na pagina 10]

E esposo di Lina ta atribui e bon comportacion di nan yiu mohe na e creencianan religioso di Lina