“Lo No Tin Fin na ... Paz”

Nacionnan Uni ta anima tur hende pa coopera cu otro, respeta derecho humano y pa proteha medioambiente. Kico ta e motibo? Pasobra manera Maher Nasser di UN Chronicle a bisa: “Cambio di clima, crimen organisa, mas y mas inhusticia, problema di refugiado, terorismo global y maleza contagioso ta afecta hende rond mundo.”

Otronan a bay mas leu cu esey. E filosofo, poeta y politico Italiano Dante (1265-1321) y e fisico Albert Einstein (1879-1955) a apoya e idea di un gobierno mundial. Dante a kere cu paz lo no dura den un mundo cu ta politicamente dividi. El a cita Hesucristo ora el a bisa cu un “reino cu ta dividi ta caba na nada.”—Lucas 11:17.

Poco despues di Segundo Guera Mundial, durante cua dos bom atomico a ser uza, Albert Einstein a skirbi un carta habri pa e Asamblea General di Nacionnan Uni. El a bisa: “Nacionnan Uni mester actua mas lihe posibel pa crea e circunstancianan adecuado pa pone fundeshi pa un berdadero gobierno mundial cu lo garantisa siguridad internacional.”

Pero acaso nos por ta sigur cu e politiconan cu lo forma parti di e gobierno poderoso aki lo no bira corupto, incompetente of opresivo nunca? Of nan lo ta mesun malo cu e otro gobernantenan? E preguntanan aki ta haci nos corda riba e palabranan di e historiador Britanico Lord Acton, kende a bisa: “Poder tin e tendencia di corumpi, y poder absoluto ta corumpi na un grado absoluto.”

Sinembargo, si nos kier disfruta di berdadero paz, nos mester ta uni. Pero con nos por logra e meta ey? Acaso esey ta un meta realistico? Bijbel su contesta ta si. Nos por y lo logra e meta ey. Con? No pa medio di un gobierno mundial cu politiconan corupto, mas bien, pa medio di un gobierno cu Dios mes a establece. Ta Dios so tin derecho di goberna humanidad. Y e lo haci esey mediante “e Reino di Dios.”—Lucas 4:43.

“LAGA BO REINO BIN”

Ora Hesucristo a haci e Oracion di Nos Tata, e tabatin e Reino di Dios na mente. El a bisa: “Laga bo Reino bin. Laga bo boluntad sosode ... riba Tera.” (Mateo 6:9, 10) Si, e Reino di Dios lo percura pa Dios su boluntad ser haci riba Tera, y no e boluntad di hende egoista y haragan pa poder.

E Reino di Dios tambe ta ser yama “e Reino di cielo.” (Mateo 5:3) Dicon? Pasobra maske e Reino di Dios lo goberna Tera, e Reino lo haci esey for di cielo. Djis pensa loke esey lo nifica pa nos. E gobierno aki lo no exigi ningun tipo di belasting for di su ciudadanonan. Ki un alivio esey lo ta!

Manera e palabra “reino” ta indica, e Reino di Dios ta un gobierno cu tin un Rey, Hesucristo, kende a ricibi autoridad di Dios. Bijbel ta bisa tocante Hesus:

• “E gobernacion lo ta riba su schouder ... Lo no tin fin na e aumento di su gobernacion y di paz.”—Isaias 9:6, 7.

• “Na dje a wordo duna dominio, gloria y un reino, pa tur pueblo, nacion y hende di tur idioma por sirbie. Su dominio ... lo no pasa nunca.”—Daniel 7:14.

• “E reino di mundo awor ta pertenece na nos Señor [Dios] y na su Cristo.”—Revelacion 11:15.

Manera e Oracion di Nos Tata ta priminti, Dios su Reino lo cumpli cu Dios su proposito aki riba Tera. Bou di e Reino aki, nos planeta lo ta limpi y yen di bida atrobe, pasobra nos lo siña cuid’e manera mester ta.

Y mas importante, e Reino di Dios lo educa su subditonan. Tur hende lo siña respeta e mesun normanan y lo no tin desacuerdo ni division mas. Isaias 11:9 ta bisa: “Nan lo no causa daño ni destruccion ... pasobra Tera lo ta yen di e conocemento di SEÑOR, manera awa ta tapa lama.”

Hende di tur parti Tera lo ta uni y lo biba na paz cu otro. Esaki ta locual cu Nacionnan Uni kier a logra. Salmo 37:11 ta bisa cu nan “lo deleita nan mes den paz abundante.” Cu tempo, nos lo no uza palabranan manera “crimen”, “polucion”, “pobreza” y “guera” mas. Pero ki tempo esaki lo sosode? Na ki tempo e Reino di Dios lo cuminsa goberna Tera? Con e Reino di Dios lo goberna? Y con abo por beneficia di e Reino di Dios? Laga nos ban wak.