Tin un Gobierno Stabiel Cu Por Goberna Nos Planeta?—⁠Kico Bijbel Ta Bisa?

Tur caminda na mundo, e gobiernonan ta man na cabes. Hasta e paisnan cu ta parce di tin un gobierno stabiel tin hopi problema. Hopi di e paisnan ey cu ta parce di tin un gobierno stabiel ta haya nan cu escandalo politico, eleccion cu resultado hopi preta, division politico y hopi protesta violento contra nan gobierno.

Bijbel ta mustra cu ta un gobierno so tin cu ta stabiel. Muy probablemente, bo a tende di e gobierno ey caba. Esey ta e gobierno cu Hesus a menciona den e oracion cu el a siña su discipelnan haci.

• “Pues, boso mester haci oracion asin’aki: ‘Nos Tata cu ta den cielo, bo nomber sea santifica. Laga bo Reino bini. Laga bo boluntad sosode, mescos cu den cielo, tambe riba Tera.’”—Mateo 6:9, 10.

Kico Bijbel ta bisa tocante e Reino ey?

E Reino—⁠un gobierno stabiel

E Reino ta goberna for di cielo.

• Hesus a yama e gobierno ey “e Reino di cielo.” (Mateo 4:17; 5:3, 10, 19, 20) Pesey, el a bisa: “Mi reino no ta parti di e mundo aki.”—Juan 18:36.

E Reino lo reemplasa tur gobierno humano.

• Bijbel ta bisa: “E reino aki ... lo destrui y pone un fin na tur e reinonan [humano] ey, y e reino aki so lo keda pa semper.”—Daniel 2:44.

E Reino, cu Hesucristo como su Rey, nunca lo ser destrui.

• Bijbel ta bisa: “Su gobernacion lo dura pa semper; si, su gobernacion lo no yega na un fin. Su reino lo no ser destrui.”—Daniel 7:13, 14.

E Reino lo trece paz y trankilidad riba Tera.

• Bijbel ta bisa: “Pero kada ken lo sinta trankil bou di palu di wendrùif i di figo, sin niun hende spanta nan.”—Mikeas 4:4, Beibel na papiamentu koriente.

Haya sa mas tocante e Reino

Tempo cu Hesus tabata riba Tera, el a dedica su tempo predicando “bon noticia di Reino.” (Mateo 9:35) Ademas, el a profetisa:

• “Bon noticia ... di e Reino lo ser predica den henter e Tera habita, como testimonio pa tur nacion, anto e fin lo yega.”—Mateo 24:14.

Awe, e bon noticianan di Reino ta ser predica den mas cu 240 pais. Nos ta invita bo pa siña mas tocante e gobierno ey y con bo por beneficia di e gobernacion ey.

Por fabor wak e video Kiko e Reino di Dios Ta?