1. Acaso Ta Dios Su Culpa Cu Nos Ta Sufri?

Dicon Ta Importante pa Haya e Contesta?

Hopi hende no kier tin nada di haber cu Dios pasobra nan ta kere cu ta su falta cu hende ta sufri.

Algo pa Pensa Riba

Directamente of indirectamente, hopi lider religioso a siña hende cu Dios ta causa sufrimento. Por ehempel, tin hende ta bisa lo siguiente:

• Desaster natural ta castigo di Dios.

• Mucha ta muri pasobra Dios tin mester di un angelito mas den cielo.

• Dios ta tuma parti pa cierto partido den gueranan cruel.

Ta posibel cu loke lidernan religioso ta siña hende tocante Dios ta robes? Nos por confia nan?

Loke Bijbel Ta Bisa

Dios no ta causa sufrimento.

Ora nos sa con Dios ta, nunca nos lo culp’e di nos sufrimentonan. Por ehempel, Bijbel ta bisa tocante Dios:

“Tur [Dios] su camindanan ta husto ... Husto y recto e ta.”​—DEUTERONOMIO 32:4.

“Leu sea di Dios di haci maldad, y di e Todopoderoso di comete inikidad.”​—JOB 34:10.

“Ta imposibel ku Dios ... Todopoderoso por trose hustisia.”​—JOB 34:12, BPK.

Dios no ta aproba di religion cu ta siña mentira tocante dje.

Por ehempel, e ta rechasa tur religion cu ta siña hende pa apoya guera, violencia y cu Dios ta causa sufrimento.

“E profetanan ta profetisa mentira den mi [Dios su] nomber. Mi no a manda nan, ni a duna nan ordo, ni a papia cu nan; un vision falso ... y decepcion di nan mes mente nan ta profetisa na boso.”​—JEREMIAS 14:14.

Hesus a condena hipocresia religioso.

“No ta tur hende cu bisa mi: ‘Señor, Señor’, lo drenta e Reino di cielo, sino esun cu ta haci e boluntad di mi Tata cu ta den cielo. Hopi hende lo bisa mi riba e dia ey: ‘Señor, Señor, nos no a profetisa den bo nomber, saca demoño den bo nomber y haci hopi obra poderoso den bo nomber?’ Sinembargo, lo mi bisa nan publicamente e ora ey: ‘Mi no conoce boso! Bay for di mi, hacidonan di maldad!’”​—MATEO 7:21-23.