Loke Algun Hende Ta Kere

Hinduismo

E hindunan ta kere cu hende ta sufri debi na e cosnan cu nan a haci den e bida aki of un bida anterior. Un persona ta stop di sufri ora e alcansa moksha, esta, ora e ser libra di e ciclo di renacemento. Pa logra esey, e tin cu alcansa un estado mental liber di e cosnan di e mundo aki.

Islam

E moslimnan ta kere cu sufrimento ta un castigo pa pica y un prueba di fe. Segun Dr. Sayyid Syeed, presidente di Fundacion Islamico di Norte America, sufrimento ta pone nos corda cu “semper nos mester gradici Dios pa tur nos bendicionnan y cu nos mester yuda hende cu ta den necesidad.”

Hudaismo

Segun tradicion hudiu, nos ta sufri pa motibo di nos propio accionnan. Algun hudiu ta bisa cu lo tin un resureccion, y cu despues lo tin husticia pa esnan cu a sufri sin merece esey. Pero hudiunan mistico of kabbalah ta siña cu reencarnacion ta duna un hende varios oportunidad pa libra di su picanan.

Budismo

E budistanan ta kere cu cada bes nos ta reencarna y cu nos ta sufri den cada bida te ora nos no tin deseonan, accionnan y sintimentonan malo mas. Nan ta kere tambe cu danki na sabiduria, bon obra y dominio riba nos pensamentonan, un hende por logra alcansa nirvana, esta, un estado den cua no tin sufrimento mas.

Confucianismo

Segun e diccionario A Dictionary of Comparative Religion, hende cu ta sigui Confucio ta pensa cu sufrimento ta bin “principalmente debi na fout y eror di hende.” Aunke nan ta reconoce cu por evita varios tipo di sufrimento si un hende hiba un bida bon, nan ta kere cu den mayoria di caso sufrimento ta ser causa pa “forsanan spiritual cu hende no tin control riba dje. Den e casonan ey, hende no tin otro opcion y mester acepta cu esey ta destino.”

Algun religion di tribu

Tin cierto religion di tribu ta bisa cu bruheria ta causa sufrimento. Tin hende ta kere cu esnan cu ta haci bruheria por pone nan haya mala suerte of pone nan haya un accidente, y cu lo por combati esey door di haci cierto rito. Pesey, ora un hende bira malo, nan ta bay un curandero pa e duna nan remedi of haci rito pa contraresta bruheria.

Cristianismo

E cristiannan ta relaciona sufrimento cu e pica di e prome pareha, manera e buki di Genesis ta conta. Pero hopi iglesia a agrega nan propio ideanan. Por ehempel, algun catolico ta kere cu, na moda di papia, nan por duna Dios nan sufrimento como ofrenda pa bendiciona nan iglesia of pa salba un hende.