Busca pa Sa Kico Ta Berdad

Kico Ta e Problema?

Mayoria di biaha un persona tin prehuicio pasobra e tin informacion robes. Considera e siguiente ehempelnan:

Algun doño di trabou ta kere cu hende muher no por haci trabou cientifico of tecnico.
Durante Edad Media na Europa, Hudiunan a ser acusa falsamente di venena posnan di awa y causa epidemia. Bou di e regimen Nazi, atrobe Hudiunan a ser acusa falsamente. Pero e biaha aki nan a culpa nan di a causa e crisis economico na Alemania. Den ambos caso, Hudiunan a bira victima di prehuicio extremo, y te den nos tempo tin algun hende cu tin prehuicio debi na e mentiranan ey.
Hopi hende ta kere cu tur hende cu limitacion fisico ta tristo of amarga.

Hende cu ta kere e mentiranan aki ta purba haya ehempel pa hustifica nan manera di pensa. Y nan ta convenci cu tur hende cu no ta di acuerdo cu nan ta ignorante.

Principio di Bijbel

“No ta bon pa hende ta sin conocemento.”—PROVERBIONAN 19:2.

Kico e versiculo aki ta siña nos? Si nos no busca pa sa kico ta berdad, nos lo tuma mal decision. Si nos ta kere den mentira y no den loke ta berdad, nos lo husga hende robes.

Dicon Ta Importante pa Busca pa Sa Kico Ta Berdad Tocante Otro Hende?

Ora nos siña conoce un persona bon, nos lo no kere cos robes cu hende ta papia di dje. Y ora nos haya sa cu e cosnan negativo cu hende ta bisa di un cierto grupo ta mentira, nos lo cuestiona loke hende ta bisa di otro grupo.

Ehempel di Bida Real: Jovica (Zuidoost Europa)

Jovica, kende nos a menciona caba, a scucha henter su bida con su paisanonan, noticia y programa di television ta duna informacion negativo tocante un grupo di stranhero. Jovica a bisa: “Mi tabatin prehuicio, y hasta rabia riba e hendenan ey. Mi a pensa cu mi tabatin bon motibo pa sinti asina.

Pero ora mi tabata den ehercito, mi a haya mi obliga di biba y traha cu soldaatnan di e grupo di stranheronan ey. Cu tempo mi a siña conoce nan. Mi a hasta siña nan idioma y scucha nan musica. Mi a cuminsa bay bon cu nan, y mi opinion di nan a cambia completamente. Pero mi sa cu mi sintimentonan negativo por bini bek. Pesey mi ta evita di scucha noticia cu ta papia malo di nan. Y tambe mi no ta wak pelicula of comedia cu ta haci bofon di nan. Mi sa cu prehuicio por hiba na rabia y odio.”

Kico Abo Por Haci?

No generalisa. Si bo tende hende ta bisa cierto cos negativo di un grupo di hende, esey no kiermen cu tur hende di e grupo aki ta asina.
Reconoce cu bo no sa tur cos tocante otro hende.
Purba di haya informacion for di un fuente confiabel.