Mustra Empatia
Kico Ta e Problema?
Si nos enfoca mucho riba con diferente otro hende ta for di nos, nos por mira e diferencianan ey como defecto. Como consecuencia, nos por cuminsa pensa cu e personanan ey ta inferior cu nos. Anto ora nos tin e punto di bista ey, ta bira dificil pa mustra empatia, esta pone nos mes den sapato di otro hende.
Principio di Bijbel
“Alegra cu esnan cu ta alegra; yora cu esnan cu ta yora.”—ROMANONAN 12:15.
Kico e versiculo aki ta siña nos? Cu nos mester mustra empatia. Esey ta e habilidad di pone bo mes den sapato di otro hende y sinti loke nan ta sinti.
Dicon Ta Importante pa Mustra Empatia?
Ora nos mustra empatia na un persona, nos lo ripara cu nos tin hopi cos en comun. Kisas nos lo haya sa cu e ta sinti y actua mescos cu nos. Empatia ta yuda nos compronde cu nos tur, sin importa ken nos ta, ta parti di un solo famia. Si nos enfoca riba loke nos tin en comun cu hende, nos lo stop di husga nan.
Ademas, empatia ta yuda nos pa mustra respet na otro hende. Wak e ehempel di Anne-Marie, di Senegal. E tabatin custumber di desprecia hende cu ta pertenece na gruponan cu ta ser considera como inferior. Anne-Marie a splica con empatia a yud’e: “Ora mi a mira con duro e grupo di hendenan aki tabata pasa, mi a puntra mi mes con ami lo sinti si mi tabata den nan sapato. Esaki a yuda mi compronde cu mi no ta mas cu nan, ni mi no a haci nada cu ta haci mi mas mihor cu nan.” En berdad, si nos haci esfuerso pa compronde kico un persona ta pasa den dje, esey por yuda nos mustra empatia en bes di critic’e.
Kico Abo Por Haci?
Si bo tin un punto di bista negativo di un grupo di hende, purba wak den ki manera anan ta mescos cu bo. Por ehempel, imagina con nan ta sinti den e siguiente situacionnan:
Empatia ta yuda nos mira cu nos tur ta parti di un solo famia
Ora nan ta come cu nan famia.
Ora nan caba di traha duro.
Ora nan pasa tempo cu nan amigonan.
Ora nan scucha nan cantica faborito.
Despues, purba di hinca bo mes den nan sapato. Puntra bo mes:
Con ami lo reacciona si un hende ta laga mi sinti cu mi no ta bal nada?
Con ami lo sinti si un persona husga mi sin cu e conoce mi?
Si mi tabata parti di e grupo ey, con ami lo kier pa hende trata mi?