Wak e Bon Cualidadnan di un Hende

Kico Ta e Problema?

Orguyo por hiba na prehuicio. Un persona orguyoso por pensa cu e ta mihor cu otro hende. E ta mira hende cu ta diferente for di dje como inferior. Tur hende por cay den e trampa aki. E Encyclopædia Britannica ta bisa: “Mayoria di cultura ta pensa cu nan manera di biba, di bisti, nan cuminda, custumber, creencia, norma y balor, etcetera, ta mihor cu di otro culturanan.” Kico por yuda nos pa no cay den e trampa aki?

Principio di Bijbel

“Cu humildad, considera cu otro hende ta superior na boso.”—FILIPENSENAN 2:3.

Kico e versiculo aki ta siña nos? Pa nos no pensa cu nos ta mas cu otro hende, nos mester bira humilde. Ora nos ta humilde, nos por mira cu otro hende ta mihor cu nos den cierto aspecto di bida. No tin ningun cultura cu ta bon den tur cos.

Ban wak e ehempel di Stefan, kende a lanta den un pais comunista. El a logra vence su sintimentonan di prehuicio contra hende di paisnan cu no ta comunista. El a bisa: “Mi ta kere cu pa vence prehuicio ta importante pa considera otro hende como superior na nos. Mi no sa tur cos y mi por siña algo for di tur hende.”

Kico Abo Por Haci?

Purba di ta realistico y admiti cu bo ta haci fout. Reconoce cu tin cos cu otro hende ta haci mihor cu bo. No pensa cu tur hende di un cierto grupo ta mescos.

En bes di pensa malo di un persona di un cierto grupo, puntra bo mes:

Reconoce cu otro hende ta mihor cu bo den cierto aspecto

Acaso e cualidadnan cu mi no ta gusta di e persona ey realmente ta malo, of simplemente esakinan ta diferente?
E persona ey por haya fout den mi?
Den ki aspecto e persona aki ta mas mihor cu mi?

Si bo contesta e preguntanan aki na un manera honesto, lo bo por vence e prehuicio cu bo tin y lo bo por yega di admira e cosnan bon di e persona ey.

Ehempel di Bida Real: Nelson (Merca)

“Tempo mi tabata mas jong, mi a pasa un gran parti di mi bida den un area caminda mayoria di e poblacion tabata di e mesun rasa y cultura. Pero cu 19 aña mi a muda bay un stad grandi pa traha den un fabrica. Eynan, mi a biba rondona pa hende di diferente background, rasa y cultura.

Ora mi a siña conoce mi coleganan, nos a bira amigo. Y mi a siña cu un hende su color, idioma y nacionalidad no ta bisa bo nada tocante con balente nan ta, ni con confiabel nan ta ni con nan ta sinti.

Cu tempo mi a casa cu un hende muher cu no ta di mi pais. E ta di un otro rasa. Mi ta masha contento cu mi a siña come su cumindanan y tambe scucha su musica cu tabata algo nobo pa mi. Bida a siña mi cu nos tur tin cos bon y cos malo. Honestamente, mi a bira un mihor persona ora mi a cuminsa admira y imita e bon cualidadnan di hende cu tin un rasa y cultura full diferente cu esun di mi.”