Cera Amistad Nobo

Kico Ta e Problema?

Si nos evita hende cu ta di cierto grupo cu nos no ta gusta, nos lo por haya mas prehuicio. Y si nos tin solamente amigo cu ta manera nos, nos lo tin e tendencia di pensa cu nos manera di pensa, sinti y actua so ta bon.

Principio di Bijbel

“Habri boso curason hancho.”—2 CORINTIONAN 6:13.

Kico e versiculo aki ta siña nos? Nos “curason” por referi na nos emocionnan y sintimentonan. Si nos ta gusta solamente hende cu ta mescos cu nos, nos ta cerando e porta di nos curason pa amistadnan nobo. Pues, pa nos evita e problema ey, nos mester ta dispuesto pa cera amistad cu tur tipo di hende, hasta cu hende cu ta diferente for di nos.

Dicon Ta Importante pa Cera Amistad Nobo?

Ora nos siña conoce otro hende bon, nos ta compronde dicon nan ta haci cos na un otro manera. Y ora nos haya amor pa nan, nos ta lubida cu nan ta diferente. Nos ta haya mas aprecio pa nan, y nan alegria ta bira nos alegria y nan tristeza ta bira nos tristeza.

Ban wak e ehempel di Nazaré. Un tempo e no tabata gusta cierto grupo di inmigrante. Nazaré ta splica kico a yud’e cambia su punto di bista: “Mi a pasa tempo cu nan y traha cu nan. Mi a conoce hende cu ta full diferente for di loke otro hende a conta mi. Ora bo bira amigo di hende di un otro cultura, bo ta siña pa no husga nan, pa stima nan y balora nan.”

Kico Abo Por Haci?

Busca manera pa papia cu hende cu ta di un otro pais, rasa y cultura of idioma. Bo por haci lo siguiente:

Puntra nan pa conta bo algo di nan mes.
Invita nan pa come hunto cu bo.
Scucha bon ora nan ta conta bo algo di nan bida pa bo haya sa kico ta importante pa nan.

Si bo purba compronde loke nan a pasa aden, esey por mehora bo opinion di e grupo di hendenan ey.

Ehempel di Bida Real: Kandasamy y Sookammah (Canada)

“Nos a lanta na Sur Africa durante tempo di apartheid. Cada rasa mester a biba den comunidadnan separa. Esey a lanta sintimentonan di prehuicio entre e diferente gruponan racial. Nos no tabata di e grupo color cla, y nos no tabata gusta hende color cla pasobra algun di nan a trata nos comosifuera nos ta inferior. E tempo ey nos no tabata pensa cu nos tin prehuicio; nos tabata sinti cu nos ta victima di prehuicio.

Pa cambia nos actitud, nos a tuma iniciativa pa habri nos curason pa amigonan di diferente antecedente. Ora nos a cuminsa cera amistad cu hende color cla, nos a ripara cu nan no tabata dje diferente ey for di nos. Nos tur ta enfrenta e mesun problemanan y situacionnan.

Hasta nos a laga un pareha casa color cla keda cerca nos pa un tempo basta largo. Nos a siña conoce nan bon. Y no a dura masha cu nos a bira bon amigo. Como resultado, nos opinion di hende color cla a mehora.”