Con Nos Por Biba pa Semper

BO SA kico e mucha muher chikito y su amiguitonan ta lesa? Si, e mesun buki aki—Mi Buki di Relato Biblico. Y nan ta lesa e mesun relato cu bo ta lesa—“Con Nos Por Biba pa Semper.”

Bo sa kico nan ta siña? Di prome, nan ta siña cu nos tin cu conoce Jehova y su Yiu Hesus pa nos biba pa semper. Bijbel ta bisa: ‘Esaki ta e manera pa biba pa semper. Siña conoce e unico Dios berdadero, y su Yiu cu el a manda na Tera, Hesucristo.’

Con nos por siña di Jehova Dios y di su Yiu Hesus? Un manera ta di lesa Mi Buki di Relato Biblico for di cuminsamento te final. E ta siña nos hopi cos di Jehova y di Hesus, no ta berdad? Y e ta siña nos hopi di loke nan a haci caba y loke nan lo haci ainda. Pero nos tin cu haci mas cu lesa e buki so.

Bo ta mira e otro buki na suela? Esei ta Bijbel. Laga un hende lesa pa bo e partinan di Bijbel for di cua e relatonan cu tin den e buki aki ta tuma. Bijbel ta duna nos tur informacion cu nos tin mester pa nos tur por sirbi Jehova na e manera corecto y haya bida eterno. P’esei nos mester tin e custumber di studia Bijbel regularmente.

Pero siña so di Jehova Dios y di Hesucristo no ta basta. Nos por tin masha conocemento di nan y di nan siñansanan, y toch no gana bida eterno. Bo sa kico mas nos mester haci?

Nos tin cu biba di acuerdo cu loke nos ta siña tambe. Bo ta corda Judas Iscariot? E tabata un di e diesdosnan cu Hesus a scohe como su apostel. Judas tabatin hopi conocemento di Jehova y di Hesus. Pero kico a pas’e? Despues di poco tempo el a bira egoista y a traiciona Hesus pa 30 pida plata. P’esei Judas lo no ricibi bida eterno.

Bo ta corda Gehazi, e homber cu nos a siña di dje den Relato 69? E kier a haya paña y placa cu no tabata di dje. P’esei, el a gaña pa haya nan. Pero Jehova a castig’e. Y Dios lo castiga nos tambe si nos no obedece su lei.

Pero tabatin hopi bon hende cu semper a sirbi Jehova fielmente. Nos kier bira manera nan, no ta berdad? E mucha Samuel ta un bon ehempel pa nos sigui. Bo ta corda cu nos a lesa den Relato 55 cu Samuel tabatin cuater of cinco aña so ora el a cuminsa sirbi Jehova den e tabernakel. Pues, no ta importa con chikito bo ta, bo no ta demasiado jong pa sirbi Jehova.

Naturalmente esun cu nos tur kier sigui ta Hesucristo. Segun Relato 87, aunke Hesus tabata mucha, e tabata den tempel papiando cu otronan tocante su Tata celestial. Laga nos sigui su ehempel. Laga nos bisa mas tanto hende posibel tocante Jehova nos Dios maraviyoso y su Yiu Hesucristo. Si nos haci e cosnan aki, anto nos por biba pa semper den e paradijs nobo di Dios riba Tera.