Un Paradijs Nobo Riba Tera

MIRA e palonan grandi, e flornan bunita y seronan halto ei. E luga ei no ta bunita? Mira con e bina ta tuma cuminda for di man di e mucha homber. Y wak tambe e leonnan y cabainan aya den sabana. Bo no tin gana di biba den un cas na un luga asina?

Dios kier pa bo biba pa semper riba Tera den un paradijs. Y e no kier pa bo sufri di e dolornan cu hende tin awe. Esaki ta e promesa di Bijbel pa hende cu lo biba den e paradijs nobo: ‘Dios lo ta cu nan. Hende lo no muri mas ni yora ni sinti dolor. E cosnan bieu a pasa caba.’

Hesus lo percura pa e cambionan maraviyoso ei bini. Bo sa na ki tempo? Si, despues cu e haci Tera limpi di tur maldad y tur mal hende. Corda cu ora Hesus tabata riba Tera el a cura hende di tur clase di malesa, y asta a resusita hende for di morto. Hesus a haci esei pa mustra kico e ta bai haci riba henter e Tera ora e bira Rei di e reino di Dios.

Imagina bo con maraviyoso e paradijs terenal nobo lo ta! Hesus, hunto cu esnan cu e scohe, lo reina den shelo. Nan lo cuida tur hende riba Tera y percura pa nan ta felis. Laga nos mira kico nos mester haci pa Dios duna nos bida eterno den su paradijs nobo.