Fin di Tur Maldad

KICO bo ta mira aki? Si, un ehersito riba cabai blanco. Pero wak di unda nan ta bini. E cabainan ta bahando for di shelo riba nubia! Di berdad tin cabai den shelo?

No, nan no ta cabai di berdad. Nos sa esei pasobra cabai no por core riba nubia, no ta berdad? Pero Bijbel ta menciona cabai den shelo si. Bo sa pakico?

Antes nan tabata uza cabai hopi den guera. P’esei Bijbel ta papia di personanan riba cabai cu lo baha for di shelo, pa mustra cu Dios tin un guera pa bringa contra hende riba Tera. Bo sa e nomber di e luga di e bataya? Armagedon. Esei ta e guera cu lo destrui tur maldad aki riba Tera.

Hesus ta Esun cu lo hiba delantera den e guera na Armagedon. Corda cu Jehova a scohe Hesus pa ser rei di Su gobierno. P’esei Hesus tin un corona bisti. Y e spada ta mustra cu lo e mata tur enemigo di Dios. Mester sorprende nos pa sa cu Dios lo destrui tur mal hende?

Wak Relato 10. Kico bo ta mira einan? Si, e diluvio grandi cu a destrui tur mal hende. Ken a manda e diluvio ei? Jehova Dios. Awor wak Relato 15. Kico a sosode? Jehova a manda candela pa destrui Sodoma y Gomora.

Bai na Relato 33. Mira loke a sosode cu e cabainan y e garoshinan di guera di e Egipcionan. Ken a pone e awa bin bek y tapa nan? Jehova. El a haci esei pa proteha su pueblo. Wak Relato 76. Ei bo ta mira cu Jehova a laga nan destrui asta su pueblo, e Israelitanan, debi na nan maldad.

Pues anto, no mester sorprende nos cu Jehova lo manda su ehersito celestial pa pone fin na tur maldad riba Tera. Pero djis imagina bo kico esei lo kiermen! Bira e blachi y laga nos mira.