Hendenan cu A Bira Disipel di Hesus

KEN ta e miho sirbido di Dios cu a yega di existi?— Asina mes, Hesucristo. Bo ta kere cu nos por ta manera e?— Wel, Bijbel ta bisa cu ta e a pone e ehempel cu nos mester sigui. Y Hesus mes ta invita nos pa bira su disipel.

Bo sa kico kiermen bira disipel di Hesus?— E kiermen varios cos. Pa cuminsa, nos mester siña for di Hesus. Pero esei no ta tur cos. Nos mester kere di berdad den loke e ta bisa tambe. Y si nos ta kere den dje, nos lo haci loke e ta bisa.

Hopi hende ta bisa cu nan ta kere den Hesus. Abo ta kere cu di berdad nan tur ta su disipel?— No, mayoria di nan no. Kisas nan ta bai misa. Pero hopi di nan no a tuma tempo nunca pa siña e cosnan cu Hesus a siña su disipelnan. Ta hende cu ta sigui Hesus su ehempel so ta berdadero disipel di dje.

Laga nos papia di un par di e hendenan cu tawata disipel di Hesus tempo cu el a biba como hende riba tera. Un di e prome hendenan cu a bira disipel di Hesus ta Felipe. Anto Felipe a bai busca su amigo Natanael (cu yama Bartolome tambe). Aki bo por mira Natanael sinta bou di palo. Ora Natanael a bin serca Hesus, Hesus a bis’e: ‘Ata un homber honesto aki, un berdadero yiu di Israel.’ Natanael a keda sorprendi. El a puntra Hesus: “Di unda bo conoce mi?”

Hesus a bis’e: “Prome cu Felipe a yama bo, ora bo tawata bou di e palo di figo mi a mira bo.” Natanael a keda masha straño cu Hesus tawata sa precis unda e tawata. Pesei, Natanael a bis’e: “Abo ta e Yiu di Dios; Abo ta e Rei di Israel.”—Huan 1:49.

E dia prome cu Felipe y Natanael a bira disipel di Hesus, un par di otro hende tambe a bira disipel. Nan tawata Andres, Pedro ruman di Andres, y Huan. Y kisas Santiago ruman di Huan tambe. (Huan 1:35-51) Pero despues e cuater disipelnan aki a bolbe na nan negoshi di piscamento. Un dia, ora Hesus tawata cana canto di Lama di Galilea, el a mira Pedro cu Andres ta baha reda den lama. Hesus a bisa nan: “Sigui mi.”

Hesus a sigui cana un tiki mas, anto el a mira Santiago cu Huan. Nan tawata sinta den boto cu nan tata, drechando nan reda. Hesus a yama nan tambe pa siguie. Kico abo lo a haci si Hesus a yama bo? Lo bo a bai cu ne mesora?— E hombernan aki tawata conoce Hesus. Nan tawata sa cu ta Dios a mand’e. Pesei, nan a bai laga nan negoshi di piscamento mesora, anto a sigui Hesus.—Mateo 4:18-22.

Ma, bo ta kere cu ta cos bon so e hombernan aki a haci despues cu nan a bira disipel di Hesus?— No. Bo ta corda con nan a asta pleita cu otro tocante cua di nan ta mas importante? Pero nan tawata tende di Hesus si, y nan tawata dispuesto pa cambia nan manera. Si nos ta dispuesto pa cambia, nos tambe por ta disipel di Hesus.

Hesus a invita tur sorto di hende pa bira su disipel. Un biaha, un gobernante hoben rico a bin serca Hesus pa puntr’e con e por haya bida eterno. Ora el a bisa Hesus cu e ta cumpli cu Dios su mandamentonan for di tempo cu e ta mucha, Hesus a invit’e: “Bin, sigui mi.” Bo sa kico a sosode?—

Wel, ora e homber a haya sa cu bira disipel di Hesus mester ta mas importante cu rikesa, el a bira hopi tristo. E no a bira disipel di Hesus, pasobra el a stima su placa mas cu el a stima Dios.—Lucas 18:18-25.

Ora Hesus tawatin casi un aña y mei ta predica, el a scohe 12 di su disipelnan pa nan bira su apostelnan. E apostelnan ei ta hombernan cu el a manda pa haci trabou special. Bo sa nan nomber?— Laga nos wak si nos por siña corda nan. Mira nan riba e plachi aki, anto wak si bo por bisa nan nomber. Ora bo caba, purba bisa nan nomber for di cabes.

Cu tempo un di e 12 apostelnan a bira mal hende. Su nomber ta Hudas Iscariot. Pesei, despues a scohe un otro disipel pa bira apostel. Bo sa con yam’e?— Su nomber ta Matias. Mas despues, Pablo cu Barnabas tambe a bira apostel, pero nan no tawata di e grupo di 12 apostel.—Echonan 1:23-26; 14:14.

Manera nos a siña den capitulo 1 di e buki aki, Hesus tawatin interes den mucha chikito. Dicon?— Pasobra e tawata sa cu nan tambe por a bira su disipel. Si, hopi bes mucha por asta bisa cos na un manera cu ta pone hende grandi scucha y haya gana di siña mas tocante e Gran Maestro.

Hopi hende mohe tambe a bira disipel di Hesus. Un par di nan a biaha hunto cu ne ora e tawata bai otro stad pa predica. Algun di nan tawata Maria Magdalena, Juana y Susana. Kisas nan a yuda cushina y laba paña tambe p’e.—Lucas 8:1-3.

Abo kier ta disipel di Hesus?— Corda cu si nos djis bisa cu nos ta su disipel, esei no kiermen ainda cu nos ta su disipel di berdad. Nos mester mustra cu nos ta su disipel door di comporta nos manera un disipel unda cu nos ta, no ora nos ta na reunion cristian so. Bo por pensa unda asina ta importante pa nos comporta nos manera un disipel di Hesus?—

Si, na cas tambe nos mester comporta nos asina. Pero tin un caminda mas: na scol. Loke ami y abo no mester lubida nunca ta cu pa nos ta berdadero disipel di Hesus, nos mester comporta nos manera Hesus henter dia, tur dia, y unda cu nos ta.