Dicon Nos Mester Pordona

UN HENDE a yega di haci bo un cos malo?— El a yega di dal bo of bisa bo un cos cu a haci bo tristo?— Bo mester haci cu ne mescos cu e a haci cu bo?—

Tin hopi hende cu, ora un hende haci nan algo, nan ta haci e hende ei algo bek. Pero Hesus a siña nos cu nos mester pordona hende cu haci malo contra nos. (Mateo 6:12) Awor, kico nos mester haci si un hende ta keda haci malo contra nos cada bes? Cuanto biaha nos mester pordon’e?—

Pedro tawatin gana di sa e cos ei. Pesei, un dia el a puntra Hesus: ‘Mi mester pordon’e te shete bes?’ Pero shete bes no ta basta. Hesus a contest’e: ‘Setenta biaha shete bes bo mester pordona’ si e hende peca asina tanto biaha contra bo.

Setenta biaha shete ta hopi! Si un hende haci malo asina hopi biaha contra nos, nos lo no por corda mes ta cuanto biaha el a hacie, bo no ta kere? Y ta esei mes Hesus tawata kiermen: Nos no mester purba corda cuanto biaha un hende ta haci malo contra nos. Si e pidi nos pordon, nos mester pordon’e.

Hesus kier a mustra su disipelnan con importante ta pa pordona. Pesei, despues cu el a contesta Pedro su pregunta, el a conta su disipelnan un cuenta. Bo tin gana di tend’e?—

Un dia tawatin un bon rei. E tawata hopi bondadoso. E tawata asta fia su esclabonan placa ora nan tawatin mester di yudansa. Pero a yega e dia cu e rei tawata kier pa su esclabonan cu a deb’e, pag’e su cen bek. Wel, un di e esclabonan cu nan a trece dilanti di e rei tawata deb’e 60 miyon moneda. Esei si ta hopi placa!

Pero e esclabo a gasta tur e cen di e rei, y e no por a paga bek. Awel, e rei a duna ordo pa bende e esclabo. E rei a bisa pa bende e casa di e esclabo, y su yiunan, y tur loke tawata di dje. Y cu e cen cu nan haya nan mester a paga e rei bek. Con bo ta kere cu e esclabo a sintie?—

El a cai na rudia dilanti e rei y rog’e: ‘Por fabor, duna mi mas tempo y lo mi paga bo tur loke mi ta debe bo.’ Si abo tawata e rei, kico lo bo a haci cu e esclabo?— E rei a sinti duele di e esclabo, y el a pordon’e. El a bisa e esclabo cu e no tin nodi paga nada bek, ni un cen chikito di tur e 60 miyon monedanan. E esclabo lo mester a bira hopi contento, no?

Pero kico e esclabo a haci e ora ei? El a sali y a topa un otro esclabo cu tawata debe e shen moneda so. El a cohe e otro esclabo aki na su garganta y cuminsa choc’e. El a bis’e: ‘Paga mi e shen monedanan cu bo debe mi!’ Bo por kere cu un hende ta haci un cos asina, anto net despues cu e rei a pordon’e un debe asina grandi?—

Wel, e esclabo cu tawata deb’e djis shen pida placa tawata pober. E no por a paga e placa bek mesora. El a tira su curpa abou na pia di e otro esclabo y a rog’e: ‘Por fabor, duna mi mas tempo y lo mi paga bo loke mi debe bo.’ Bo ta kere cu e homber mester a duna e otro esclabo mas tempo pa paga?— Kico abo lo a haci?—

E homber aki si no a mustra bondad manera e rei a mustra na dje. E tawata kier su cen mesora. Y door cu e otro esclabo no por a pag’e, el a laga tir’e den prizon. E otro esclabonan a mira kico a pasa, y nan no a gusta. Nan a sinti duele di e esclabo den prizon. Pesei, nan a bai conta e rei kico a pasa.

E rei tampoco no a gusta loke a pasa. El a rabia masha hopi mes cu e esclabo cu no kier a pordona. Wel, el a yam’e y bis’e: ‘Esclabo malbado, mi no a pordona bo tur loke bo tawata debe mi? Awel, abo tambe no mester a pordona bo compañero esclabo?’

E esclabo cu no kier a pordona mester a siña un les for di loke e bon rei a haci p’e. Pero e no a siña nada. Pesei e rei a laga tira e esclabo ei den prizon te ora e por paga e 60 miyon monedanan. Anto di mes, sera den prizon e no por gana cen pa paga e rei bek. Pesei e mester a keda sera te dia e muri.

Ora Hesus a caba di conta e cuenta, el a bisa su siguidonan: “Asina tambe mi Tata celestial lo haci cu boso, si cada un di boso no pordona su ruman di henter su curason.”—Mateo 18:21-35.

Bo a compronde? Nos tur debe Dios masha hopi mes. Ta Dios a duna nos asta nos bida! Pesei, ora bo corda cuanto cos nos debe Dios, e cosnan cu otro hende debe nos ta masha poco. Loke nan debe nos ta manera e shen monedanan cu un di e esclabonan tawata debe e otro. Pero e debe cu nos tin serca Dios door cu nos ta haci cos malo ta manera e 60 miyon monedanan cu e esclabo tawata debe e rei.

Dios ta hopi bondadoso. Maske nos ta haci cos malo, e ta pordona nos. E no ta pone nos pag’e door di kita nos bida for di nos pa semper. Pero nos mester corda e les aki si: Dios ta pordona nos si, basta cu nos ta pordona hende cu ta haci malo contra nos. Esei ta un cos serio pa pensa ariba, no?—

Pesei, si un hende haci bo un cos malo, pero despues e ta pidi bo despensa, kico bo ta haci? Lo bo pordon’e?— Awor, si e mesun cos ei bolbe sosode cada bes, lo bo sigui pordon’e toch?—

Ora nos pidi despensa, nos kier pa e otro hende pordona nos, no ta asina?— Pesei, nos mester haci mescos cu otro hende. Nos no mester djis bisa cu nos ta pordona nan. Nos mester pordona nan di berdad, di curason. Ora nos haci asina nos ta mustra cu di berdad nos kier ta siguido di e Gran Maestro.