Considera Esun Cu A Persevera

1-3. (a) Con pisa Hesus su agonia tabata den e hofi di Getsemane, y kico tabata e causa? (b) Kico nos por bisa di Hesus su ehempel di perseverancia, y ki preguntanan ta surgi?

E PRESION tabata hopi fuerte. Nunca prome Hesus a experencia asina tanto angustia mental y emocional. E tabata den e ultimo oranan di su bida riba Tera. Hunto cu su apostelnan el a yega na un luga cu nan tabata conoce bon, e hofi di Getsemane. El a reuni hopi biaha cu nan einan. Sinembargo, e anochi aki el a sinti e necesidad di ta su so un rato. El a laga su apostelnan y a bai mas leu den e hofi. Anto hincando rudia el a cuminsa haci oracion. Su oracion tabata asina intenso, y el a drenta asina un ansha cu su sodo a bira “manera gotanan di sanger cu tabata cai abou na suela.”—Lucas 22:39-44.

² Dicon Hesus tabata asina angustia? Ta berdad cu e tabata sa cu denter di poco lo el a confronta sufrimento fisico extremo, pero esei no tabata e motibo di su angustia. Su mente tabata riba asuntonan hopi mas importante. E tabata profundamente precupa pa e santificacion di e nomber di su Tata y a reconoce cu futuro di e famia humano a depende di su fieldad. Hesus tabata sa con importante tabata pa el a persevera. Si el a fracasa, lo el a trece gran reproche riba e nomber di Jehova. Pero Hesus no a fracasa. Mas despues riba e dia ei, e homber cu a yega di pone e mihor ehempel di perseverancia na mundo, net prome cu el a hala su ultimo rosea, a grita triunfantemente: “Ta cumpli!”—Juan 19:30.

³ Bijbel ta urgi nos pa “considera” Hesus su ehempel di perseverancia. (Hebreonan 12:1-3) P’esei tin algun pregunta importante cu ta surgi: Cua ta algun prueba cu Hesus a wanta cu perseverancia? Kico a yud’e persevera? Con nos por sigui su ehempel? Pero prome cu nos contesta e preguntanan aki, laga nos analisa kico perseverancia ta ensera.

Kico Ta Perseverancia?

4, 5. (a) Kico “perseverancia” ta nifica? (b) Con nos por ilustra cu perseverancia ta ensera mas cu djis pasa den dificultadnan inevitabel?

⁴ De bes en cuando, nos tur ta “wordo aflihi pa medio di varios prueba.” (1 Pedro 1:6) Pero e echo cu nos ta pasando den un prueba ta nifica cu nos ta demostrando perseverancia? No necesariamente. E sustantivo Griego pa “perseverancia” ta nifica “e capasidad di soporta cosnan of di no entrega a pesar di dificultad.” Relaciona cu e tipo di perseverancia cu escritornan biblico ta referi na dje, un comentarista biblico a splica: “Ta e spirito cu por soporta cos, no simplemente cu resignacion, sino cu speransa ferviente . . . Ta e cualidad cu ta tene un hende riba pia cu cara pa biento. Ta e virtud cu por transforma e prueba di mas dificil den gloria, pasobra mas aya di e dolor e ta mira e meta.”

⁵ Pues anto, perseverancia no kiermen djis pasa den dificultadnan inevitabel. Den e sentido biblico, perseverancia ta ensera firmesa, kedando cu e actitud mental corecto y cu un punto di bista yen di speransa a pesar di prueba. Pensa riba e siguiente ilustracion: Dos homber ta sera den prizon den condicionnan similar pero pa motibonan completamente distinto for di otro. Uno ta un criminal comun y coriente, cu ta sinta su sentencia cu rencor, resignacion y cara tristo. E otro—un cristian berdadero encarsela pa su fieldad—ta para firme y ta mantene un actitud positivo pasobra e ta mira su situacion como un oportunidad pa demostra su fe. Siguramente nos no por considera e criminal como un ehempel di perseverancia, mientras cu e cristian fiel si ta un ehempel di e cualidad excelente aki.—Santiago 1:2-4.

6. Con nos ta cultiva perseverancia?

⁶ Perseverancia ta esencial si nos kier alcansa salbacion. (Mateo 24:13) Sinembargo, nos no ta nace cu e cualidad sumamente importante aki. Perseverancia ta algo cu nos mester cultiva. Con? Romanonan 5:3 ta bisa: “Tribulacion ta produci perseverancia.” Pues, si di berdad nos kier desaroya perseverancia, nos no por cobardia pa tur test of prueba di fe. Mas bien, nos tin cu confronta nan. Nos ta cultiva perseverancia ora cu dia tras dia nos ta confronta y vence pruebanan grandi y chikito. Cada prueba cu nos supera ta fortalece nos pa enfrenta e siguiente. Claro cu nos no ta desaroya perseverancia riba nos mes. Nos ta depende di “e forsa cu Dios ta duna.” (1 Pedro 4:11) Pa yuda nos keda firme, Jehova a duna nos e mihor yudansa cu tin: e ehempel di su Yiu. Laga nos analisa Hesus su registro perfecto di perseverancia.

Loke Hesus A Wanta

7, 8. Kico Hesus a wanta segun cu su bida terenal tabata yega su fin?

⁷ Segun cu Hesus tabata yega na fin di su bida riba Tera, el a soporta tur tipo di crueldad. Fuera di e stress mental extremo cu el a pasa aden durante su ultimo anochi, pensa tambe riba e decepcion cu lo e mester a sinti y e humiliacion cu el a sufri. Un compañero intimo a traicion’e, su amigonan mas pega a bandon’e, y el a keda someti na un huicio ilegal durante cua miembronan di e corte religioso di mas halto di e pais a haci bofon di dje, scupie y dal e mokete. Sinembargo, el a wanta tur esaki cu dignidad, serenidad y fortalesa.—Mateo 26:46-49, 56, 59-68.

⁸ Hesus a wanta tambe bastante sufrimento fisico durante su ultimo oranan. Nan a sut’e, y segun expertonan esei tabata un hala di sota cu a causa “strepinan di corta profundo y bastante perdida di sanger.” Nan a clab’e na staca, un forma di ehecucion cu a causa “un morto lento acompaña pa e maximo dolor y sufrimento.” Pensa riba e agonia cu Hesus lo mester a experencia ora cu nan a pasa clabonan grandi dor di su man y pia pa peg’e na e staca. (Juan 19:1, 16-18, NW) Imagina bo e dolor inmenso cu el a sinti ora cu nan a pone e staca para recht y e peso di su curpa tabata colga na e clabonan y su lomba tur habri tabata feila contra e staca. Anto el a wanta e sufrimento fisico teribel aki mientras cu e tabata carga e peso mental cu nos a describi na cuminsamento di e capitulo aki.

9. Kico hisa nos “staca di tormento” y sigui Hesus ta ensera?

⁹ Como siguido di Cristo, kico nos kisas tin cu wanta? Hesus a bisa: “Si un hende kier bin mi tras, lag’e . . . tuma su staca di tormento y sigui mi continuamente.” (Mateo 16:24, NW) Aki Hesus a uza e expresion “staca di tormento” den sentido figurativo pa representa sufrimento, berguensa of asta morto. Sigui Cristo no ta un caminda facil. Nos normanan cristian ta haci nos diferente. E mundo aki ta odia nos pasobra nos no ta parti di dje. (Juan 15:18-20; 1 Pedro 4:4) Sinembargo, nos ta dispuesto pa hisa nos staca di tormento. Si, nos ta prefera di sufri, asta muri, cu stop di sigui nos Gran Ehempel.—2 Timoteo 3:12.

10-12. (a) Dicon e imperfeccion di e personanan rond di Hesus a pone su perseverancia na prueba? (b) Cua tabata algun di e situacionnan dificil cu Hesus a soporta?

¹⁰ Durante Hesus su ministerio el a confronta otro pruebanan causa pa e imperfeccion di e hendenan rond di dje. Corda cu e tabata e “trahado experto” cu Jehova a uza pa crea e Tera y tur bida cu tin riba dje. (Proverbionan 8:22-31) Pues, Hesus tabata sa kico ta Jehova su proposito pa humanidad; hende lo mester a refleha Jehova su cualidadnan y disfruta di bida den salud perfecto. (Genesis 1:26-28) Pero ora Hesus tabata riba Tera, el a mira e resultado tragico di pica for di un otro perspectiva, esta, como hende, ya cu e mes por a experencia sintimento y emocion humano. Lo mester tabata hopi doloroso p’e pa mira personalmente con leu hende a cai for di e perfeccion original cu Adam cu Eva tabatin! Pues Hesus a confronta un prueba di perseverancia. Acaso lo el a descurasha y entrega, considerando hende pecaminoso como un caso perdi? Laga nos mira.

¹¹ E indiferencia di parti di e Hudiunan a haci Hesus asina tristo cu el a yora abiertamente. Pero el a laga nan actitud indiferente fria su celo of stop e di predica? Al contrario, el a “siña hende tur dia den tempel.” (Lucas 19:41-44, 47) El a keda masha “tristo” ora el a mira con duro curason di e farizeonan tabata, cu a vigil’e pa mira si lo el a cura un cierto homber riba sabat. Acaso Hesus a laga e opositornan ei, cu tabata husto den nan mes bista, intimid’e? Absolutamente cu no! El a para firme y a cura e homber, anto meimei di sinagoga!—Marco 3:1-5.

¹² Tabatin un cos mas cu lo mester tabata un prueba pa Hesus, esta, e debilidadnan di su discipelnan mas intimo. Manera nos a siña den Capitulo 3, nan a demostra un deseo persistente pa prominencia. (Mateo 20:20-24; Lucas 9:46) Hesus a conseha nan mas cu un biaha cu nan mester tabata humilde. (Mateo 18:1-6; 20:25-28) Sinembargo, nan a tarda pa aplica e conseho ei. Figura bo, e ultimo anochi cu e tabata cu nan, “a lanta un discusion” entre nan tocante cua di nan tabata esun di mas grandi! (Lucas 22:24) Acaso Hesus a entrega, rasonando cu lo e no por a logra nada mas cu nan? No. Manera semper cu pasenshi, el a keda positivo y cu speransa, y a sigui mira e bon den nan. E tabata sa cu den nan curason nan a stima Jehova y realmente kier a haci Su boluntad.—Lucas 22:25-27.

13. Ki pruebanan similar na esnan cu Hesus a wanta nos lo por confronta?

¹³ Kisas nos ta confronta pruebanan similar na esnan cu Hesus a wanta. Por ehempel, podise nos ta topa hende cu no ta interesa den e mensahe di Reino of kisas ta bai asta contra di dje. Nos lo laga e reaccionnan negativo ei descurasha nos, of nos lo sigui predica cu celo? (Tito 2:14) Podise e imperfeccionnan di nos rumannan cristian ta pone nos na prueba. Kisas un palabra papia sin pensa of un trato con cu ta ta ofende nos. (Proverbionan 12:18) Nos lo laga e imperfeccionnan di nos rumannan den fe pone nos bira lomba pa nan, of nos lo sigui tolera nan faltanan y busca e bon den nan?—Colosensenan 3:13.

Dicon Hesus A Persevera

14. Cua ta e dos factornan cu a yuda Hesus para firme?

¹⁴ Kico a yuda Hesus para firme y mantene su integridad a pesar di tur humiliacion, decepcion y sufrimento cu el a confronta? Tin dos factor sobresaliente cu a sostene Hesus. Di prome, el a wak ariba y a apela na “e Dios di perseverancia.” (Romanonan 15:5) Di dos, el a wak padilanti y a consentra riba loke su perseverancia lo a hiba na dje. Laga nos considera e factornan aki un pa un.

15, 16. (a) Kico ta mustra cu Hesus no a steun riba su propio forsa pa persevera? (b) Ki confiansa Hesus tabatin den su Tata, y dicon?

¹⁵ Aunke Hesus tabata e Yiu perfecto di Dios, e no a steun riba su propio forsa pa persevera. Mas bien, el a acudi na su Tata celestial y a pidi su yudansa den oracion. Apostel Pablo a skirbi: “[Cristo] tabata ofrece oracion y suplica cu gran sclamacion y lagrima na Esun cu ta capas pa salb’e for di morto.” (Hebreonan 5:7) Tuma nota cu Hesus a “ofrece” no solamente oracion sino tambe suplica. E expresion “suplica” ta referi na un peticion intenso y di curason, si, el a roga pa haya yudansa. Na e idioma Griego original, “suplica” ta den un forma plural, locual ta indica cu Hesus a roga Jehova mas cu un biaha. De echo, den e hofi di Getsemane, bes tras bes Hesus a haci oracion fervientemente.—Mateo 26:36-44.

¹⁶ Hesus tabatin e pleno confiansa cu Jehova lo a contesta su suplicanan, pasobra e tabata sa cu su Tata ta Esun “cu ta scucha oracion.” (Salmo 65:2) Durante su existencia prehumano, e Yiu primogenito a mira con su Tata a reacciona riba e oracionnan di su sirbidornan leal. Por ehempel, e Yiu tabata testigo den shelo ora cu Jehova a manda un angel contesta e oracion sincero di profeta Daniel, asta prome cu Daniel a caba di resa. (Daniel 9:20, 21) Pues anto, con e Tata lo por a keda sin contesta ora cu su Yiu unigenito a drama su curason “cu gran sclamacion y lagrima”? Jehova a contesta e ruegonan di su Yiu y a manda un angel fortalec’e pa e por a persevera bou di e prueba.—Lucas 22:43.

17. Pa nos persevera, dicon nos mester acudi na shelo, y con nos por haci esei?

¹⁷ Pa por persevera, nos tambe tin cu acudi na shelo, na e Dios cu ta “duna forsa.” (Isaias 40:29) Si e Yiu perfecto di Dios a sinti e necesidad di suplica Jehova pa yudansa, cuanto mas nos mester hacie! Mescos cu Hesus, nos kisas tin cu roga Jehova bes tras bes. (Mateo 7:7, NW) Aunke nos no ta spera bishita di un angel, di un cos si nos por ta sigur: Nos Dios amoroso lo reacciona riba e ruegonan di cristiannan leal cu “ta sigui den suplica y oracion di dia y anochi.” (1 Timoteo 5:5) Sin importa ki pruebanan nos por ta confronta—sea ta malesa, morto di un ser keri of persecucion cerca opositor—Jehova lo contesta nos oracionnan ferviente den cua nos ta pidi e sabiduria, curashi y fortalesa pa persevera.—2 Corintionan 4:7-11; Santiago 1:5.

18. Con Hesus a wak mas aya di su sufrimento na loke tabatin su dilanti?

¹⁸ E di dos factor cu a yuda Hesus persevera ta cu el a wak padilanti, mas aya di e sufrimento na loke tabata sper’e. Bijbel ta bisa di Hesus: “Pa motibo di e goso poni su dilanti, [el] a soporta e sufrimento di [“un staca di tormento”, NW].” (Hebreonan 12:2) E ehempel di Hesus ta ilustra con speransa, goso y perseverancia ta traha hunto. Nos por resumie asin’aki: Speransa ta hiba na goso, y goso na perseverancia. (Romanonan 15:13; Colosensenan 1:11) Hesus tabatin varios expectativa maraviyoso su dilanti. E tabata sa cu su fieldad lo a yuda vindica e soberania di su Tata y habri caminda pa e cumpra e famia humano bek for di pica y morto. Ademas, Hesus tabatin e speransa di goberna como Rei y sirbi como Sumo Sacerdote, y asina trece mas bendicion ainda pa hende obedecido. (Mateo 20:28; Hebreonan 7:23-26) Hesus a haya un goso inmenso ora el a consentra riba e expectativanan y speransa cu tabatin su dilanti, y e goso ei en buelta a yud’e persevera.

19. Ora nos ta confronta pruebanan di nos fe, con nos por laga speransa, goso y perseverancia traha hunto na nos fabor?

¹⁹ Mescos cu Hesus, nos tin cu laga speransa, goso y perseverancia traha hunto na nos fabor. Apostel Pablo a bisa: ‘Regociha den speransa.’ Anto el a agrega: ‘Persevera den tribulacion.’ (Romanonan 12:12) Abo ta enfrenta un prueba pisa di bo fe na e momentonan aki? Haci esfuerso pa wak padilanti. No perde for di bista cu bo perseverancia lo trece alabansa pa e nomber di Jehova. Mantene e precioso speransa di Reino bon cla den bo mente. Mira bo mes den Dios su benidero mundo nobo, y imagina bo mes ta experencia e bendicionnan di e Paradijs. Ora bo ta anticipa cumplimento di e cosnan maraviyoso cu Jehova a priminti—incluso e vindicacion di su soberania, eliminacion di maldad for di riba Tera y fin di malesa y morto—esei lo yena bo curason cu goso. Anto e goso ei lo por yuda bo persevera a pesar di cualkier prueba cu bo por haya bo cu ne. Cualkier sufrimento den e sistema di cosnan aki en berdad ta ‘leve y pa un momento so’, si compara nan cu e realisacion di e speransa di Reino.—2 Corintionan 4:17.

“Sigui Su Pasonan cu Sumo Cuidou y Atencion”

20, 21. Pa loke ta perseverancia, kico Jehova ta spera di nos, y kico mester ta nos determinacion?

²⁰ Hesus tabata sa cu ser su siguido lo ta un reto, un bida cu lo a rekeri perseverancia. (Juan 15:20) E tabata prepara pa hiba delantera, sabiendo cu su ehempel lo a fortalece otro hende. (Juan 16:33) Ta berdad cu Hesus a pone e ehempel perfecto di perseverancia, pero nos ta leu for di perfeccion. Kico Jehova ta spera di nos? Pedro a splica: “Cristo a sufri pa boso, lagando un modelo pa boso sigui su pasonan cu sumo cuidou y atencion.” (1 Pedro 2:21, NW) Den e manera cu Hesus a trata cu su pruebanan, el a laga “un modelo”, un ehempel pa nos imita.a E registro di perseverancia cu el a traha por ser compara cu “pasonan”, es decir, marca di pia. Nos no por sigui e pasonan ei perfectamente, pero si nos por siguie cu “sumo cuidou y atencion.”

²¹ Pues anto, laga nos ta determina pa sigui e ehempel di Hesus lo mihor cu nos por. No lubida nunca cu mas precies nos sigui den e pasonan di Hesus, mihor prepara nos lo ta pa persevera “te na fin”, sea fin di e sistema di cosnan bieu aki of fin di nos bida actual. Nos no sa cua lo yega prome, pero un cos si nos sa: Pa eternidad, Jehova lo recompensa nos pa nos perseverancia.—Mateo 24:13.