“El A Siña Obediencia”

1, 2. Dicon un tata amoroso ta keda contento di mira su yiu obedec’e, y con su sintimentonan ta refleha e sintimentonan di Jehova?

UN TATA para den bentana ta mira su yiu homber chikito ta hunga bala pafo cu algun amiguito. E bala ta sali for di cura y bai cai riba caya. E yiu ta keda wak e bala cu gana di bai su tras. Un di su amiguitonan ta mand’e bai coi e bala, pero e yiu ta sacudi cabes y bisa: “Mi no tin mag di bai riba caya.” E tata ta para smile su so.

² Dicon e tata a keda asina contento? Pasobra el a siña su yiu pa no sali riba caya su so. Ora e mucha ta obedece—sin sa cu su tata ta mir’e—e tata sa sigur cu su yiu a siña obediencia y p’esei e yiu lo ta mas safe. E tata ei ta sinti mescos cu nos Tata celestial, Jehova. Dios sa cu pa nos por keda fiel y na bida pa mira e maraviyoso futuro cu e tin prepara pa nos, nos tin cu siña confi’e y obedec’e. (Proverbionan 3:5, 6) Pa logra esei, el a manda pa nos e mihor maestro humano den historia.

3, 4. Den ki sentido Hesus “a siña obediencia” y a “wordo haci perfecto”? Ilustra esei.

³ Bijbel ta bisa algo asombroso tocante Hesus: “Aunke cu e tabata Yiu, el a siña obediencia dor di e cosnan cu el a sufri. Y despues di a wordo haci perfecto, el a bira pa tur esnan cu ta obedec’e, e autor di salbacion eterno.” (Hebreonan 5:8, 9) E Yiu aki a existi pa masha hopi siglo mes den shelo. El a mira Satanas y e otro angelnan rebelde desobedece Dios, pero e Yiu primogenito nunca a uni cu nan. Profesia inspira a aplica e palabranan aki na Hesus: “Mi no tabata desobedecido.” (Isaias 50:5) Pues anto, con e palabranan “el a siña obediencia” por a aplica na e Yiu perfectamente obedecido aki? Con un criatura perfecto asina por a “wordo haci perfecto”?

⁴ Pensa riba e ilustracion aki. Un solda tin un spada di hero. Aunke e spada nunca a ser getest den bataya, e ta perfectamente forma y bunita diseña. Sinembargo, e solda ta cambia e spada ei pa uno traha di un metal mas fuerte, di staal solido. E spada nobo aki si nan a uza efectivamente caba den bataya. Acaso esei no ta un cambio sabi? Asina tambe, e obediencia cu Hesus a demostra prome cu el a bin na Tera tabata sin defecto. Pero despues di su estadia aki riba Tera, su obediencia a bira di completamente un otro calidad. E obediencia a ser getest y, na moda di papia, a bira mas solido. El a keda someti na pruebanan cu Hesus lo no por a confronta nunca den shelo.

5. Kico a haci e obediencia di Hesus asina importante, y kico nos lo considera den e capitulo aki?

⁵ Obediencia tabata masha importante den Hesus su mision riba Tera. Como “e ultimo Adam”, Hesus a bin akibou pa haci loke nos prome mayor no a haci, esta, keda obedecido na Jehova Dios, asta bou di prueba. (1 Corintionan 15:45) Sinembargo, e obediencia di Hesus no tabata superficial. Hesus a obedece cu henter su mente, curason y alma. Anto el a hacie cu goso. Hacimento di e boluntad di su Tata tabata mas importante p’e cu come! (Juan 4:34) Kico por yuda nos imita e obediencia di Hesus? Laga nos considera prome kico ta loke a motiv’e. Ora nos cultiva e mesun motivacion cu e tabatin, esei lo yuda nos resisti tentacion y tambe cumpli cu e boluntad di Dios. Despues nos lo repasa algun recompensa cu nos lo haya ora nos ta desplega obediencia manera Cristo.

Loke A Motiva Hesus pa Obedece

6, 7. Menciona algun cos cu a motiva Hesus pa obedece.

⁶ E obediencia di Hesus a sali for di loke tabatin den su curason. Manera nos a mira den Capitulo 3, Cristo tabata humilde di curason. Orguyo arogante ta pone cu hende no ta gusta obedece, mientras cu humildad ta yuda nos obedece Jehova di buena gana. (Exodo 5:1, 2; 1 Pedro 5:5, 6) Ademas, Hesus su obediencia a sali for di loke el a stima y loke el a odia.

⁷ Mas cu tur cos, Hesus a stima su Tata celestial, Jehova. Nos lo papia mas en detaye di e amor ei den Capitulo 13. Ta e amor ei a pone Hesus desaroya temor di Dios. Su amor pa Jehova tabata asina intenso, su respet asina profundo, cu e tabatin temor di desagrada su Tata. Un di e motibonan pakico Jehova a scucha su oracionnan ta pasobra Hesus tabatin temor di Dios. (Hebreonan 5:7, NW) Ademas, temor di Jehova ta un caracteristica sobresaliente di Hesus su gobernacion como Rei Mesianico.—Isaias 11:3.

8, 9. Manera a ser profetisa, con Hesus a sinti tocante husticia y maldad, y con el a demostra e sintimentonan ei bon cla?

⁸ Amor pa Jehova ta ensera tambe odia loke Jehova ta odia. Por ehempel, tuma nota di e siguiente profesia dirigi na e Rei Mesianico: “Bo a stima husticia y a odia maldad; p’esei Dios, bo Dios, a ungi bo cu e azeta di goso, mas cu bo compañeronan.” (Salmo 45:7) E “compañeronan” di Hesus tabata e otro reinan den e liña di descendencia di Rei David. Mas cu cualkier un di nan, Hesus tabatin motibo pa sinti gran goso ora cu el a ser ungi. Dicon? Su recompensa ta mucho mas grandi cu di nan, su reino ta infinitamente mas beneficioso. Hesus ta ser recompensa pasobra su amor pa husticia y su odio pa maldad a motiv’e pa obedece Dios den tur cos.

⁹ Con Hesus a demostra bon cla kico tabata su sintimentonan relaciona cu husticia y maldad? Por ehempel, con Hesus a reacciona ora su siguidonan a obedece su instruccion den e trabou di predica y a ser bendiciona cu bon resultado? El a bira sumamente contento. (Lucas 10:1, 17, 21) Anto con Hesus a sinti ora e pueblo di Jerusalem a demostra bes tras bes un actitud desobedecido, rechasando su esfuerso amoroso pa yuda nan? E actitud aki di e hendenan di e stad ei a pon’e yora. (Lucas 19:41, 42) Hesus tabata profundamente interesa den hende su conducta, tanto bon como malo.

10. Ki sintimentonan nos tin cu cultiva pa loke ta bon obra y malecho, y kico lo yuda nos haci esei?

¹⁰ Ora nos medita riba e sintimentonan di Hesus, esei por yuda nos samina nos propio motivacion pa obedece Jehova. Pa imperfecto cu nos ta, nos por cultiva un amor di curason pa bon obra y un odio sincero contra mal conducta. Nos tin cu haci oracion na Jehova y pidie yuda nos cultiva e mesun sintimentonan cu tanto e como su Yiu tin. (Salmo 51:10) Na mes momento, nos tin cu evita cosnan cu por debilita e sintimentonan ei. Ta sumamente importante pa nos scohe nos recreo y amistadnan cuidadosamente. (Proverbionan 13:20; Filipensenan 4:8) Si nos cultiva e mesun motivacion manera di Cristo, nos obediencia lo no ta djis un formalidad. Nos lo haci loke ta corecto pasobra nos ta gusta haci esei. Nos lo evita malecho, no pasobra nos tin miedo di ser gara, sino pasobra nos ta odia tal conducta.

E “No A Comete Pica”

11, 12. (a) Kico a pasa cu Hesus na principio di su ministerio? (b) Na prome instante con Satanas a tenta Hesus, y ki tactica mañoso el a uza?

¹¹ Relaciona cu su odio contra pica, Hesus a ser getest for di tempran den su ministerio. Despues di su bautismo, el a pasa 40 dia y anochi den desierto sin cuminda. Na fin di e periodo ei Satanas a bin tent’e. Tuma nota con mañoso Diabel tabata.—Mateo 4:1-11.

¹² Prome Satanas a bis’e: “Si bo ta e yiu di Dios, ordena e piedranan aki pa nan bira pan.” (Mateo 4:3) Kico Hesus a sinti despues di a yuna asina largo? Bijbel ta bisa bon cla: “El a haya hamber.” (Mateo 4:2) Pues Satanas a probecha di e deseo natural pa cuminda, y sin duda el a warda deliberadamente te ora Hesus tabata den un condicion fisicamente debil. Tuma nota tambe di e palabranan provocativo cu Satanas a uza: “Si bo ta e yiu di Dios.” Satanas tabata sa cu Hesus ta “e primogenito di henter creacion.” (Colosensenan 1:15) Sinembargo, Hesus no a laga Satanas provoc’e pa desobedece Dios. Hesus tabata sa cu no tabata e boluntad di Dios pa e uza su poder pa metanan egoista. P’esei el a nenga di haci esei, mustrando cu humildemente el a depende riba Jehova pa dun’e alimentacion y instruccion.—Mateo 4:4.

13-15. (a) Con Satanas a tenta Hesus pa di dos y di tres biaha, y con Hesus a reacciona? (b) Dicon nos sa cu Hesus nunca por a stop di vigila contra Satanas?

¹³ Pa e di dos tentacion, Satanas a hiba Hesus na un luga halto riba e tempel. Trociendo e Palabra di Dios astutamente, Satanas a tenta Hesus pa haci un hazaña espectacular tirando su curpa abou for di e luga halto ei di manera cu angel lo tabatin cu scap’e. Si e multitud na e tempel a mira un milager asina, ta ken lo a tribi duda despues di esei cu Hesus tabata e Mesias priminti? Y si e multitud a acepta Hesus como e Mesias a base di tal hazaña espectacular, Hesus lo no a scapa di hopi problema y dificultad? Kisas. Pero Hesus tabata sa cu e boluntad di Jehova tabata pa e Mesias cumpli cu su trabou na un manera humilde, y no pa e influencia hende pa kere den dje pa medio di hazañanan espectacular. (Isaias 42:1, 2) Un biaha mas, Hesus a nenga di desobedece Jehova. Fama no tabata un tentacion p’e.

¹⁴ Pero kico di e tentacion di poder? Den Satanas su di tres intento, el a ofrece Hesus tur e reinonan na mundo si el a haci un solo acto di adoracion na Satanas. Acaso Hesus a pensa seriamente riba e oferta di Satanas? Hesus a contest’e: “Bai for di akinan, Satanas!” Anto el a agrega: “Pasobra ta para skirbi: ‘Adora [Jehova] bo Dios, y sirbi e so.’” (Mateo 4:10) Nada hamas lo por a tenta Hesus pa adora otro dios. Ningun oferta di poder of influencia den e mundo aki lo por a combenc’e pa comete cualkier acto di desobediencia.

¹⁵ Esei a pone Satanas entrega? El a bai ora Hesus a orden’e pa haci esei. Sinembargo, e Evangelio di Lucas ta declara cu Diabel “a lag’e pa un tempo.” (Lucas 4:13) De echo, Satanas a haya otro ocasionnan pa test y tenta Hesus, y el a hacie te na final. Bijbel ta bisa nos cu Hesus a “wordo tenta den tur cos.” (Hebreonan 4:15) Pues Hesus nunca por a stop di vigila; y nos tampoco.

16. Con Satanas ta tenta sirbidor di Dios awe, y con nos por rechasa su esfuersonan?

¹⁶ Satanas ta sigui tenta sirbidornan di Dios awe. Lamentablemente, nos imperfeccionnan ta haci nos hopi bes un blanco facil. Satanas astutamente ta probecha di nos inclinacionnan egoista, di orguyo y di sed pa poder. Uzando e tentacion di materialismo, Satanas por asta probecha di tur e inclinacionnan aki pareu! P’esei ta masha importante pa de bes en cuando nos para keto y analisa nos mes honestamente. Ta bon pa nos medita riba e palabranan di 1 Juan 2:15-17. Segun cu nos ta haci esei, nos lo por puntra nos mes si e deseonan di carni di e mundo aki, e anhelo pa cos material y e deseo pa impresiona otro hende, no a mengua nos amor pa nos Tata celestial te na cierto grado. Nos tin cu corda cu e mundo aki, hunto cu su gobernante, Satanas, ta cerca di pasa bai. P’esei laga nos rechasa su intentonan mañoso di tenta nos pa cai den pica! Laga e ehempel di nos Shon inspira nos, pasobra e “no a comete pica.”—1 Pedro 2:22.

“Semper Mi Ta Haci e Cosnan Cu Ta Agrad’e”

17. Kico Hesus a pensa di e obediencia cu e mester a rindi na su Tata, pero ki obhecion algun hende lo por bin cu ne?

¹⁷ Obediencia ta ensera hopi mas cu djis keda sin peca; Cristo a cumpli activamente cu delaster un mandamento di su Tata. El a declara: “Semper mi ta haci e cosnan cu ta agrad’e.” (Juan 8:29) E obediencia aki a duna Hesus gran goso. Naturalmente, tin hende kisas ta bin cu e obhecion cu obediencia tabata menos complica pa Hesus. Podise nan ta kere cu e tabatin cu obedece Jehova so, kende ta perfecto, mientras cu nos hopi bes tin cu obedece hende imperfecto den puesto di autoridad. Pero echo ta cu Hesus tabata obedecido na hende imperfecto den puesto di autoridad.

18. Como hoben, con Hesus tabata un ehempel di obediencia?

¹⁸ Segun cu Hesus a crece, e tabata bou di e autoridad di su mayornan humano imperfecto, Jose cu Maria. Probablemente, mas cu mayoria mucha, lo e por a mira e imperfeccionnan di su mayornan. Acaso el a rebela y bai mas aya di e papel di yiu cu Dios a dun’e, bisando nan con nan mester a dirigi e famia? Tuma nota di loke Lucas 2:51 ta bisa di Hesus na edad di 12 aña: “El a keda someti na nan.” Cu e obediencia aki, el a pone un excelente ehempel pa hobennan cristian cu ta haci esfuerso pa obedece nan mayornan y mustra nan e debido respet.—Efesionan 6:1, 2.

19, 20. (a) Hesus a confronta ki retonan unico relaciona cu obediencia na hende imperfecto? (b) Dicon cristiannan berdadero djawe mester ta obedecido na e rumannan cu ta hiba delantera?

¹⁹ Pa loke ta trata obedece hende imperfecto, Hesus a confronta retonan cu cristiannan berdadero djawe nunca tin cu confronta. Pensa riba e tempo unico den cua el a biba. E sistema religioso Hudiu, cu su tempel na Jerusalem y su sacerdocio, pa hopi tempo tabatin e aprobacion di Jehova. Pero awor Jehova tabata a punto di rechas’e y remplas’e cu e areglo di e congregacion cristian. (Mateo 23:33-38) Mientrastanto, hopi di e lidernan religioso tabata siña mentira basa riba filosofia Griego. Tabatin asina tanto corupcion den e tempel cu Hesus a yam’e “un cueba di ladron.” (Marco 11:17) Acaso Hesus a keda leu for di e tempel ei y di e sinagoganan? No! Jehova ainda tabata haci uzo di e areglonan ei. Tanten cu Dios no a cai den e asunto y haci cambio, Hesus obedientemente a bai na e fiestanan di tempel y na sinagoga.—Lucas 4:16; Juan 5:1.

²⁰ Si Hesus tabata obedecido bou di e circunstancianan ei, cuanto mas cristiannan berdadero mester keda obedecido awe! De echo, nos ta biba den un tempo masha distinto, den e era di restauracion di adoracion puro, un era profetisa hopi tempo pasa. Dios ta sigura nos cu hamas lo e permiti Satanas corumpi su pueblo restaura. (Isaias 2:1, 2; 54:17) Ta berdad cu nos ta topa pica y imperfeccion den e congregacion cristian. Pero nos mester uza e imperfeccionnan di otro hende como un excuse pa desobedece Jehova, podise keda sin asisti na reunionnan cristian of cuminsa critica e ancianonan? Hamas! Mas bien, di curason nos ta sostene esnan cu ta hiba delantera den e congregacion. Obedientemente, nos ta asisti na e reunion- y asambleanan cristian y ta aplica e conseho biblico cu nos ta haya na e ocasionnan ei.—Hebreonan 10:24, 25; 13:17.

21. Con Hesus a reacciona riba presion di otro hende pa e desobedece Dios, y ki ehempel el a pone pa nos?

²¹ Hesus nunca a laga hende, ni sikiera amigonan cu bon intencion, stop e di obedece Jehova. Por ehempel, apostel Pedro a purba combence su Shon cu e no tabatin nodi sufri y muri. Su conseho pa Hesus ta bondadoso cu su mes tabata duna cu bon intencion. Pero Hesus a rechas’e redondamente pasobra e tabata incorecto. (Mateo 16:21-23) Awe, siguido di Hesus hopi biaha ta haya nan tin cu trata cu nan famianan cu tin bon intencion pero cu ta purba combence nan pa stop di obedece e lei- y principionan di Dios. Mescos cu siguido di Hesus den prome siglo, nos ta mantene e posicion cu “nos mester obedece Dios mas cu hende.”—Echonan 5:29.

E Recompensanan di Ta Obedecido Manera Cristo

22. Ki pregunta Hesus a contesta, y con el a hacie?

²² Ora cu Hesus a confronta morto, su obediencia a ser someti na e prueba di mas severo. Tabata durante e momentonan dificil ei di su bida cu “el a siña obediencia” den e pleno sentido di palabra. El a haci e boluntad di su Tata, no di su mes. (Lucas 22:42) Na mesun tempo, el a establece un registro perfecto di integridad. (1 Timoteo 3:16, NW) El a duna e contesta riba e pregunta cu a existi pa hopi tempo: Hende perfecto por keda obedecido na Jehova asta bou di prueba? Adam a fracasa, y Eva tambe. Anto Hesus a bin na Tera, biba, muri y mustra bon cla cu esei ta posibel. E criatura mas grandi di tur e criaturanan di Jehova a duna e contesta di mas impactante. El a obedece asta ora esei a caus’e hopi sufrimento, incluso su morto.

23-25. (a) Con obediencia ta liga cu integridad? Ilustra esei. (b) Ki topico e siguiente capitulo lo trata?

²³ Nos por expresa integridad, of devocion di henter nos curason na Jehova, pa medio di obediencia. Como cu Hesus a obedece, el a mantene su integridad y a beneficia henter humanidad. (Romanonan 5:19) Jehova a recompensa Hesus ricamente. Si nos ta obedece Cristo, nos Shon, Jehova lo recompensa nos tambe. Obedece Cristo ta hiba na “salbacion eterno”!—Hebreonan 5:9.

²⁴ Ademas, integridad ta un recompensa riba su mes. Proverbionan 10:9 [NW] ta bisa: “Esun cu ta cana den integridad lo cana den siguridad.” Si nos compara integridad cu un cas grandi traha di bon bloki, cada acto di obediencia por ser compara cu un bloki. Un bloki so por parce insignificante, pero cada un tin su luga, su balor. Y ora pega hopi bloki hunto, nos ta construi algo di un balor mucho mas grandi. Ora nos combina actonan di obediencia, agregando nan un pa un, dia aden dia afo y aña aden aña afo, nos ta construi nos bunita cas di integridad.

²⁵ Un bida di obediencia cu ta extende pa un periodo largo ta laga nos corda riba un otro cualidad: perseverancia. E aspecto ei di e ehempel di Hesus ta topico di e siguiente capitulo.