Papia “Loke Ta Bon pa Edifica”

1-3. (a) Ki regalo Jehova a duna nos, y con nos por haci mal uzo di dje? (b) Con nos mester uza nos don di papia pa nos por keda den e amor di Dios?

CON lo bo sinti bo si bo duna un ser keri un regalo, anto e dicidi di haci mal uzo di dje? Supone cu bo a dun’e un auto, y despues bo ta haya sa cu el a cor’e na un manera iresponsabel y a causa daño na otro hende. Sin duda, lo bo sinti bo masha decepciona.

² Jehova ta Esun cu ta duna “tur don cu ta bon y tur regalo perfecto.” (Santiago 1:17) El a regala nos algo cu ta distingui nos for di bestia y cu ta haci posibel pa nos expresa nos pensamento- y sintimentonan. Esey ta e capacidad di papia na un manera comprendibel. Anto mescos cu e auto menciona den e ilustracion, nos por haci mal uzo di e regalo aki. Nos por imagina con decepciona Jehova ta sintie ora hende uza nan don di papia na un manera iresponsabel y causa daño na otronan.

³ Pa nos keda den e amor di Dios, nos tin cu uza e don di papia na e manera cu E kier. Jehova ta bisa bon cla con nos tin cu papia pa nos agrad’e. Su Palabra ta bisa: “No laga ningun palabra putri sali for di boso boca, sino solamente loke ta bon pa edifica segun e necesidad di e momento, pa esaki por comparti loke ta probechoso cu esnan cu ta tende.” (Efesionan 4:29) Laga nos ban wak dicon nos mester domina nos lenga, kico nos mester evita di papia y con nos por papia “loke ta bon pa edifica.”

DICON NOS MESTER DOMINA NOS LENGA?

4, 5. Con algun proverbio biblico ta describi e poder di palabra?

⁴ Un motibo importante pakico nos tin cu domina nos lenga ta pasobra palabra tin poder. Proverbionan 15:4 (BPK) ta bisa: “Palabra suave ta pone bo biba di [berdad], palabra perverso por destruí bo totalmente.” E palabranan trankil di un lenga suave por anima hende cu tende nan. En cambio, e palabranan troci di un lenga malicioso por desanima un hende. Pues, e palabranan cu nos ta papia tin e poder pa causa herida of pa cura.​—Proverbionan 18:21.

⁵ Proverbionan 12:18 tambe ta duna un bon descripcion di e poder cu palabra tin. E ta bisa: “Tin hende ta papia sin pensa, manera hinca di spada.” Si, ora un hende ta papia sin pensa, e por causa heridanan emocional profundo y kibra bon amistad. Abo a yega di sinti e hinca ey di “spada” den bo curason? Pero, palabra por tin un efecto positivo tambe, manera e mesun proverbio ey ta sigui bisa: “Lenga di hende sabi ta trece curamento.” Hende cu ta haci esfuerso pa demostra sabiduria divino ta midi nan palabranan. Nan comentarionan bondadoso por cura curason herida y reestablece bon amistad. Bo ta corda un ocasion cu bo a sinti e poder curativo di palabra bondadoso? (Proverbionan 16:24) Como cu nos ta consciente di e echo cu loke ta sali for di nos boca tin hopi poder, nos lo kier uza nos palabranan pa cura otro hende, no pa herida nan.

6. Dicon nos tin cu haci asina tanto esfuerso pa frena nos lenga?

⁶ Maske cuanto esfuerso nos haci, nos no por domina nos lenga completamente. Y esey ta un di dos motibo pakico nos tin cu tene cuidou kico nos ta papia: Pica y imperfeccion ta pone cu nos tin e tendencia di haci mal uzo di nos lenga. Palabra ta sali for di nos curason, y “e intencion di curason di hende ta malo.” (Genesis 8:21; Lucas 6:45) Ta pesey nos tin cu haci asina tanto esfuerso pa frena nos lenga. (Santiago 3:​2-4) Aunke nos no por domina nos lenga perfectamente, toch nos por sigui haci esfuerso pa mehora e manera cu nos ta uz’e. Mescos cu un hende cu ta ­landa contra coriente tin cu sigui lucha pa yega canto, asina nos tin cu sigui lucha contra e tendencia pecaminoso di haci mal uzo di nos lenga.

7, 8. Te na ki grado Jehova ta tene nos responsabel pa loke nos ta bisa?

⁷ Un di tres motibo pakico nos mester domina nos lenga ta pasobra Jehova ta tene nos responsabel pa loke nos ta bisa. E manera cu nos ta uza nos lenga ta influencia no solamente nos relacion cu otro hende sino tambe nos relacion cu Jehova. Santiago 1:26 ta bisa: “Si un hende ta kere cu e ta adora Dios, ma e no ta frena su lenga, e ta gaña su mes y su adoracion ta envano.”a Manera nos a mira den e capitulo anterior, nos manera di papia ta estrechamente liga cu nos adoracion. Si nos no ta frena nos lenga​—si nos ta papia cosnan ofensivo y venenoso—tur loke nos ta haci pa sirbi Dios lo por perde balor den su bista. Esey no ta un cos serio pa pensa ariba?​—Santiago 3:​8-10.

⁸ Ta bisto anto cu nos tin bon motibo pa no haci mal uzo di nos don di papia. Pero prome cu nos considera con nos lo por papia pa edifica otro hende, laga nos analisa e tipo di habla cu un cristian berdadero mester evita cueste loke cueste.

PALABRA CU TA KIBRA HENDE

9, 10. (a) Ki tipo di habla a bira masha normal den e mundo djawe? (b) Dicon nos mester rechasa papiamento di palabra malo y di cosnan vulgar? (Wak tambe e nota.)

⁹ Palabra malo. Papiamento di palabra malo, di cosnan vulgar y di blasfemia contra Dios a bira un parti normal di hende su manera di papia di tur dia. Hopi hende ta uza palabra malo ora nan ta rabia of djis pa expresa nan mes mas fuerte. Comediantenan sa gusta uza palabranan vulgar y chistenan dobel sentido pa pone hende hari. Ma esey no ta cos di hari. Un 2.000 aña pasa, apostel Pablo, bou di inspiracion, a conseha e congregacion di e Colosensenan pa ‘no laga palabra malo sali for di nan boca.’ (Colosensenan 3:8) Y el a bisa e congregacion di e Efesionan cu “chansanan vulgar” ta entre e cosnan cu ‘no mester menciona mes meymey’ di cristiannan berdadero.​—Efesionan 5:​3, 4.

¹⁰ Papiamento di palabra malo y di cosnan vulgar ta ofende Jehova y tambe hende cu ta stim’e. Pues, nos amor pa Jehova ta motiva nos pa rechasa e tipo di habla ey, ya cu e por ta un forma di “impureza”, y impureza ta un di “e obranan di carni” cu Pablo a menciona. (Galationan 5:​19-21) Esaki ta un asunto serio. Un persona por ser expulsa for di e congregacion si, a pesar di a haya varios spiertamento, e ta sigui papia abiertamente of den dobel sentido tocante topiconan sumamente inmoral, indecente of perverso y ta nenga di arepenti y corigi su mes.b

11, 12. (a) Ki ora ta malo pa papia riba bida di otro hende? (b) Dicon sirbidornan di Jehova mester evita calumnia?

¹¹ Redashi y calumnia. Hende gusta papia tocante bida di otro hende. Esey riba su mes no ta malo si ta trata di informacion positivo of util, manera ken a caba di batisa of ken tin mester di animacion. Por ehempel, e cristiannan di prome siglo tabata hopi interesa den e bienestar di nan rumannan den fe, y sin ningun malicia nan a comparti informacion apropia tocante otro. (Efesionan 6:​21, 22; Colosensenan 4:​8, 9) Loke si ta malo ta pa papia cosnan cu ta troce berdad of cu ta revela detaye di hende su bida priva. Esaki lo por hiba na algo mas grave ainda, esta, calumnia. Esey ta ora un persona ta presenta acusacion falso cu ta difama y daña reputacion di otro hende. Por ehempel, e fariseonan a lanta calumnia contra Hesus pa daña su nomber. (Mateo 9:​32-34; 12:​22-24) Redo malicioso of calumnia hopi biaha ta hiba na pleito y desunion.​—Proverbionan 26:20.

¹² Kico Jehova ta pensa di hende cu ta uza nan don di papia pa difama otronan of pa causa desunion? Nan no tin su aprobacion. Es mas, e ta odia esun cu ta “sembra desunion entre rumannan.” (Proverbionan 6:​16-19) E palabra Griego traduci como “calumniado” ta diabolos, loke ta un titulo cu Bijbel ta uza tambe pa Satanas. E ta e “Diabel”, es decir, e Calumniado cu ta difama Dios. (Revelacion 12:​9, 10) Claro cu ningun di nos lo kier papia cosnan cu ta haci nos un “diabel”, esta, un calumniado. Den e congregacion no tin luga pa calumnia ni pa e obranan di carni cu esey ta fomenta, manera “pleitamento” y “desunion.” (Galationan 5:​19-21) Pesey, prome cu nos conta cualkier cos tocante un persona, nos mester puntra nos mes: ‘Mi tin sigur cu esaki ta berdad? Ta un muestra di amor pa conta otro hende di e cos aki? Ta necesario of consehabel pa laga otro hende sa esaki?’​—1 Tesalonicensenan 4:11.

13, 14. (a) Ki efecto papiamento di cos ofensivo por tin riba otro hende? (b) Dicon hende cu ta cana zundra ta den un situacion peligroso?

¹³ Papiamento di cos ofensivo. Manera nos a mira caba, palabra por haci hopi daño. Ta berdad cu debi na imperfeccion, nos tur tin biaha ta bisa cosnan cu despues ta duel nos. Pero Bijbel ta spierta nos pa un forma di papia cu sigur no ta aceptabel den congregacion ni den un cas cristian. Pablo a anima e cristiannan: “Kita tur tipo di amargura malicioso, rabia, furia, gritamento y papiamento di cos ofensivo for di boso.” (Efesionan 4:31) Otro traduccionnan di Bijbel ta uza na luga di “papiamento di cos ofensivo” expresionnan manera “palabra cu ta pica”, “plegamento” y “insulto.” Papiamento di cos ofensivo—cu ta encera uzo di palabranan cu ta insulta hende, palabranan skerpi y critica constante—ta trapa hende su dignidad y respet propio. Vooral mucha, como cu nan curason ta mas tierno y inocente, por ser afecta mas lihe pa papiamento di cos ofensivo.​—Colosensenan 3:21.

¹⁴ Bijbel ta condena fuertemente e custumber di humilia y insulta hende cu palabranan denigrante. Un persona cu ta haci esey ta den un situacion masha peligroso, ya cu un “hende cu ta cana zundra” por ser expulsa for di e congregacion si e no haci caso di e esfuersonan cu e rumannan ta haci pa yud’e cambia. Es mas, e por hasta perde bida eterno bou di e Reino di Dios. (1 Corintionan 5:​11-13; 6:​9, 10) Ta bisto anto cu di ningun manera nos por keda den e amor di Dios si nos tin e custumber di papia palabranan cu ta kibra hende, manera palabra malo, mentira of insulto.

PALABRA CU TA “BON PA EDIFICA”

15. Ki forma di papia “ta bon pa edifica”?

¹⁵ Con nos por uza e don di papia manera Jehova kier pa nos uz’e? Wel, corda cu su Palabra ta urgi nos pa papia “solamente loke ta bon pa edifica.” (Efesionan 4:29) Jehova ta keda contento ora nos ta papia palabranan constructivo cu ta anima y fortalece otro hende. Pa haci esey, nos tin cu siña pensa bon prome. Bijbel no ta duna un lista di palabra “sano” ni un set di regla detaya. (Tito 2:8) Pa nos por papia loke ta “bon pa edifica”, nos mester tene na mente tres factor simpel pero importante: Loke nos ta papia mester ta sano, berdad y bondadoso. Cu e tres caracteristicanan importante ey na mente, laga nos analisa algun ehempel specifico di habla edificante.​—Wak e cuadro “Mi Manera di Papia Ta Edificante?”

16, 17. (a) Dicon nos mester elogia otro hende? (b) Ki oportunidad pa elogia otro hende nos tin den congregacion, y na cas?

¹⁶ Elogio sincero. Tanto Jehova como Hesus a reconoce e importancia di duna palabra di elogio y di aprobacion. (Mateo 3:17; 25:​19-23; Juan 1:47) Como cristian, nos tambe ta haci bon di elogia hende na un manera sincero. Dicon? Pasobra Proverbionan 15:23 ta bisa: “Ki bon ta un palabra duna na ora!” Puntra bo mes: ‘Con ami ta sinti mi ora un hende elogia mi na un manera sincero? Acaso esey no ta anima mi y pone mi sinti mi bon?’ Y ta natural cu bo ta sinti asina, ya cu un palabra sincero di elogio ta laga bo sa cu un hende tin atencion pa loke bo ta haci, cu un hende ta interesa den bo y cu bo esfuerso ta bale la pena. Tambe e ta duna bo mas confianza den bo mes y ta motiva bo pa ta mas diligente ainda den futuro. Pues, siendo cu nos tur ta gusta ricibi elogio, nos no mester haci nos best tambe pa duna elogio?​—Mateo 7:12.

¹⁷ Si nos custumbra di busca e cosnan positivo den otro hende, semper nos lo haya motibo pa elogia nan. Kico ta algun cos positivo cu nos por mira den congregacion? Por ehempel, nos por tende un discurso bon desaroya, nos por mira un hoben cu ta lucha pa alcansa metanan spiritual of nos ta ripara un ruman di edad cu semper ta na reunion a pesar cu e tin problema cu salud. Algun palabra di elogio sincero lo por touch nan curason y fortalece nan determinacion pa sirbi Jehova. Y na cas awor? Tanto esposo como esposa tin e necesidad di tende palabranan bondadoso di elogio y di aprecio for di otro. (Proverbionan 31:​10, 28) Mucha specialmente ta sinti nan bon ora ta tuma nan na cuenta y laga nan sinti cu nan ta aprecia. Mescos cu mata mester di awa y luz pa bona, asina mucha mester di palabra di elogio y di aprobacion pa nan por bay bon. Pues mayornan, busca oportunidad pa elogia boso yiunan pa nan bon cualidadnan y e esfuerso cu nan ta haci. Asina boso ta duna nan mas curashi y confianza den nan mes y ta motiva nan pa haci nan best mas ainda.

18, 19. Dicon nos mester haci nos best pa consola y anima rumannan den fe, y con nos por haci esey?

¹⁸ Consuelo y animacion. Jehova ta profundamente interesa den hende “humilde y di spirito kibra.” (Isaias 57:15) Su Palabra ta urgi nos pa “sigui anima otro” y “papia palabranan di consuelo cu esnan deprimi.” (1 Tesalonicensenan 5:​11, 14) Nos por tin sigur cu Dios ta tuma nota y ta keda contento cu e esfuerso cu nos ta haci pa consola y anima nos rumannan den fe, cu ta hopi kibra di tristeza.

¹⁹ Pero kico bo por bisa pa edifica y anima un ruman cu ta desanima y deprimi? No sinti cu bo mester resolve e problema. Den hopi caso, algun palabra simpel ta e cos di mas mihor. Sigura e persona desanima cu bo ta interesa den dje y ta apoy’e. Tambe bo por haci oracion cu ne y pidi Jehova yud’e mira cuanto hende ta stim’e, incluso Jehova mes. (Santiago 5:​14, 15) Sigur’e cu e congregacion mester di dje y ta apreci’e. (1 Corintionan 12:​12-26) Lesa un versiculo di Bijbel cu ta record’e cu Jehova realmente ta interesa den dje. (Salmo 34:18; Mateo 10:​29-31) Si bo tuma bo tempo pa consola e ruman desanima cu algun “bon palabra” cu ta sali for di bo curason, lo e sinti su mes mas stima y aprecia.​—Proverbionan 12:25.

20, 21. Menciona algun factor cu ta haci un conseho efectivo.

²⁰ Conseho cu ta efectivo. Como hende imperfecto, nos tur tin mester di conseho de bes en cuando. Bijbel ta anima nos pa ‘scucha conseho y acepta disciplina, pa nos por ta sabi pa resto di nos bida.’ (Proverbionan 19:20) No ta e ancianonan so ta duna conseho. Por ehempel, mayornan tambe tin cu conseha nan yiunan. (Efesionan 6:4) Y rumannan muher spiritualmente maduro kisas tin cu conseha rumannan muher mas hoben. (Tito 2:​3-5) Amor pa prohimo ta motiva nos pa formula nos conseho di tal manera cu e persona por acept’e sin sintie ataca. Kico por yuda nos duna conseho di e manera ey? Laga nos analisa tres factor cu ta haci un conseho mas efectivo: e actitud y motivacion di esun cu ta duna e conseho, e base pa duna e conseho y e manera cu ta duna e conseho.

²¹ E prome factor ta cu conseho efectivo ta cuminsa cu esun cu ta duna e conseho. Puntra bo mes: ‘Ki ora ta mas facil pa ami acepta un conseho?’ Wel, esey ta ora bo sa cu esun cu ta duna bo conseho ta realmente interesa den bo y cu e no ta duna bo conseho pasobra e ta sintie frustra of pasobra e tin un motibo egoista. Pues, ora abo ta conseha otro hende, bo tambe mester tin e mesun actitud y motivacion. E di dos factor pa duna conseho exitoso ta cu e mester ta basa riba e Palabra di Dios. (2 Timoteo 3:16) Tur loke nos ta bisa mester ta basa riba Bijbel, sea cu nos ta les’e directamente for di Bijbel of no. Pues, ancianonan ta tene cuidou pa no impone nan propio opinion riba otro hende. Nan no ta troce ni manipula textonan biblico tampoco pa laga parce cu esakinan ta apoya nan ideanan. E di tres factor ta pa ofrece e conseho na e forma adecuado. Conseho sasona cu bondad semper ta mas facil pa acepta y ta laga e persona cu ta ricibie keda cu su dignidad.​—Colosensenan 4:6.

22. Kico ta bo determinacion relaciona cu e uzo di bo don di papia?

²² Un cos ta sigur, e capacidad di papia ta un regalo maraviyoso di Dios. Y como cu nos ta stima Jehova, nos kier haci bon uzo di e regalo aki. Laga nos corda cu e palabranan cu nos ta papia tin poder: nan por edifica hende of kibra nan. Pues, laga nos haci esfuerso pa semper uza e regalo aki manera Jehova kier, esta, “pa edifica” otro hende. Asina nos lo ta un bendicion pa e hendenan rond di nos y, ademas, lo e yuda nos keda den e amor di Dios.