Ken Dios Ta?

1. Dicon nos mester adora Dios?

E Dios berdadero ta e Creador di tur cos. E no tabatin principio ni lo e no tin fin. (Salmo 90:2) E ta e Fuente di e bon noticia cu nos ta haya den Bijbel. (1 Timoteo 1:11) Como cu ta Dios a duna nos bida, ta e so nos mester adora.—Lesa Revelacion 4:11.

2. Con Dios ta?

Nunca niun hende no a mira Dios pasobra Dios ta un Spirito; esey ta nifica cu e tin un forma di bida superior na hende cu ta biba riba tera. (Juan 1:18; 4:24) No obstante, e cosnan cu Dios a crea ta yuda nos conoce su cualidadnan. Por ehempel, e variedad di fruta y flor cu nos ta mira rond di nos ta siña nos cu e ta un Dios di amor y di sabiduria. Ademas, e inmenso universo ta duna nos un idea cuanto poder e tin.—Lesa Romanonan 1:20.

Nos por siña hasta mas tocante Dios su cualidadnan ora nos lesa su Palabra. Por ehempel, su Palabra ta bisa nos kico e ta gusta y kico e no ta gusta, con e ta trata hende y con e ta reacciona den cada situacion.—Lesa Salmo 103:7-10.

3. Dios tin un nomber?

Hesus a bisa: “Nos Tata cu ta den cielo, bo nomber sea santifica.” (Mateo 6:9) Aunke Dios tin hopi titulo, ta un nomber so e tin. Cada idioma ta pronunci’e na un manera diferente. Por lo general, na Papiamento hende ta bisa “Jehova.” Algun ta bisa “Yahweh.” Den e Traduccion di Mundo Nobo, Salmo 83:18 ta bisa: “Pa hende por sa cu abo, kende su nomber ta Jehova, abo so ta e Haltisimo riba henter tera.”

Den hopi Bijbel nan a reemplasa e nomber di Dios cu titulo manera Señor of Dios. Pero tempo cu a skirbi Bijbel, e nomber di Dios tabata aparece mas o menos 7.000 biaha. Ora Hesus a siña hende tocante Dios, el a duna nan di conoce e nomber ey.—Lesa Juan 17:26.

4. Jehova ta interesa den nos?

E echo cu tin asina tanto sufrimento awe ta nifica cu Dios no ta interesa den nos? Tin hende ta bisa cu Dios ta laga nos sufri pa pone nos na prueba. Pero esey no ta berdad.—Lesa Santiago 1:13.

Dios a duna hende boluntad liber; esey ta demostra cu e ta balora cada un di nos. Nos no ta aprecia cu nos tin libertad pa scoge si nos kier sirbi Dios? (Josue 24:15) Pero hopi hende ta scoge pa haci loke ta malo, y esey ta causa hopi sufrimento. Tal inhusticia ta duel Jehova.—Lesa Genesis 6:5, 6.

Jehova ta un Dios cu ta interesa den nos. E kier pa nos disfruta di bida. Pronto lo e caba cu sufrimento y tur esnan cu ta caus’e. Mientrastanto, Jehova tin un motibo pakico e ta laga hende sufri pa un tempo. Den Les 8 nos lo haya sa kico e motibo ey ta.—Lesa 2 Pedro 2:9; 3:7, 13.

5. Con nos por hala mas cerca Dios?

Jehova ta invita nos pa hala cerca dje, y nos por haci esey ora nos ta papia cu ne den oracion. E ta interesa den cada un di nos. (Salmo 65:2; 145:18) E ta cla pa pordona. Aunke nos ta faya de bes en cuando, e ta mira e esfuerso cu nos ta haci pa agrad’e. A pesar cu nos ta imperfecto, nos por tin un bon relacion cu Dios.—Lesa Salmo 103:12-14; Santiago 4:8.

Jehova ta esun cu a duna nos bida; pesey, nos mester stim’e mas cu tur otro persona. (Marco 12:30) Bo ta demostra bo amor pa Jehova ora cu bo ta siña mas tocante dje y ta haci loke e ta pidi bo; asina bo ta hala mas cerca dje.—Lesa 1 Timoteo 2:4; 1 Juan 5:3.