E Bon Noticia Realmente Ta Bin di Dios?

1. Ken ta e Autor di Bijbel?

E bon noticia cu hende lo biba pa semper riba tera ta skirbi den Bijbel. (Salmo 37:29) Bijbel ta consisti di 66 buki. Dios a uza rond di 40 homber fiel pa skirbi nan. Moises a skirbi e prome cinco bukinan mas o menos 3.500 aña pasa. Anto apostel Juan a skirbi e ultimo buki rond di 1.900 aña pasa. Ken su ideanan nan a skirbi? Dios a comunica cu e escritornan di Bijbel pa medio di su spirito santo. (2 Samuel 23:2) Loke nan a skirbi tabata Dios su pensamentonan, no di nan mes. Pues, e Autor di Bijbel ta Jehova.—Lesa 2 Timoteo 3:16; 2 Pedro 1:20, 21.

2. Con nos por tin sigur cu loke Bijbel ta bisa ta berdad?

Nos sa cu Bijbel ta bin di Dios pasobra e ta profetisa futuro en detaye y cu exactitud. No tin niun hende cu por haci esey. (Josue 23:14) Ta Dios Todopoderoso so por premira futuro di humanidad cu exactitud.—Lesa Isaias 42:9; 46:10.

Nos mester por spera cu un buki di Dios ta unico, y e ta tambe. Awe Bijbel ta disponibel den cientos di idioma y nan a produci y distribui miyones y miyones di ehemplar. Aunke Bijbel ta un buki hopi bieu, e ta cuadra cu ciencia. Ademas, su escritornan no a contradeci otro.a Y loke Bijbel ta bisa relaciona cu amor por bin solamente di e Dios berdadero—e Dios di amor—y te awe e tin poder pa cambia bida di hende. E echonan aki ta convence miyones di hende cu Bijbel ta e Palabra di Dios.—Lesa 1 Tesalonicensenan 2:13.

3. Kico Bijbel ta contene?

Bijbel ta enfoca riba e bon noticia cu Dios tin un proposito amoroso pa humanidad. E Scritura ta splica con hende a perde e privilegio di biba den un paradijs riba tera na principio di historia di humanidad y con finalmente Dios lo bolbe haci tera un paradijs.—Lesa Revelacion 21:4, 5.

Tambe e Palabra di Dios ta contene ley, principio y conseho. Ademas, Bijbel ta conta con Dios a trata cu hende; e relatonan ey ta siña nos ki clase di Dios e ta. Pues, Bijbel por yuda bo conoce Dios. E ta splica bo con bo por bira su amigo.—Lesa Salmo 19:7, 11; Santiago 2:23; 4:8.

4. Kico por yuda bo compronde Bijbel?

E foyeto aki ta sigui e mesun metodo cu Hesus a uza pa yuda bo compronde Bijbel. Hesus a referi na varios texto biblico y a splica “nificacion di e Scritura.”—Lesa Lucas 24:27, 45.

E bon noticia cu ta bin di Dios ta realmente fascinante. Toch, algun hende no ta interesa den dje y tin otronan cu hasta no kier tend’e mes. Ma no desanima. Bo speransa di biba pa semper ta depende di e conocemento cu bo ta hayando di Dios.—Lesa Juan 17:3.