Organisa pa Sirbi “e Dios di Paz”

1, 2. Ki cambio tabatin riba portada di E Toren di Vigilancia di januari 1895, y con e rumannan a reacciona?

JOHN A. BOHNET, un Studiante di Bijbel yen di entusiasmo, a bira masha contento ora el a mira E Toren di Vigilancia di januari 1895. E revista tabatin un portada nobo: un plachi di un faro (lighthouse) halto cu tabata ilumina un cielo scur, segun cu ola di lama bruto tabata dal contra dje. E articulo cu a anuncia e diseño nobo di e revista tabata titula “Nos Bachi Nobo.”

² Impresiona cu e portada, Ruman Bohnet a manda un carta pa Ruman Russell. El a skirbi: “Contento di mira con bunita e TOREN a keda.” John H. Brown, un otro fiel Studiante di Bijbel, a skirbi tocante e portada: “E ta capta bo atencion pasobra mientras cu ola cu biento ta dal contra e toren, e fundeshi ta keda firmemente para.” E portada nobo ey tabata e prome cambio cu nos rumannan a mira e aña ey, pero esaki no tabata e ultimo. Na november nan a mira un otro cambio grandi. Y esaki tambe tabatin di haber cu lama bruto.

3, 4. Ki problema E Toren di Vigilancia di 15 di november 1895 a trata, y ki cambio cu lo tabatin un efecto di largo alcance a ser anuncia?

³ Un articulo largo cu a sali den E Toren di Vigilancia di 15 di november 1895 a revela un problema: Tabata comosifuera e organisacion di Studiantenan di Bijbel a haya su mes den lama bruto, y esaki a perturba e paz di e organisacion. Ruman hombernan tabata discuti mas y mas tocante ken mester ta lider den e congregacion local. Pa yuda e rumannan mira kico nan mester a haci pa corigi e spirito di rivalidad ey cu tabata causa desunion, e articulo a compara e organisacion cu un barco. Y e articulo a admiti francamente cu eigenlijk e rumannan cu tabata dirigi e organisacion no a prepara e “barco” pa mal tempo. Kico nan mester a haci?

⁴ E articulo a trece padilanti cu un bon capitan ta percura pa su barco tin salbabida y pa e tripulacion ta prepara pa enfrenta mal tempo. Asina tambe, e rumannan cu tabata dirigi e organisacion mester a percura pa tur congregacion tabata prepara pa deal cu situacionnan dificil. Pa logra esey, e articulo a anuncia un cambio cu lo a drenta na vigor mesora y cu lo tabatin un efecto di largo alcance. Kico esey tabata? Segun e articulo, “den tur grupo mester a scoge ancianonan” pa “supervisa e tou.”—Echo. 20:28.

5. (a) Dicon e prome nombramento di anciano a bin net na ora y tabata alabes un paso den bon direccion? (b) Ki preguntanan nos lo analisa?

⁵ E prome nombramento di anciano ey a bin net na ora y tabata alabes un bon paso den direccion di establece un structura mas stabiel den congregacion. El a yuda nos rumannan nabega den e awanan turbulento di Prome Guera Mundial. Den e decadanan cu a sigui, mas mehoracion den e structura di e organisacion a yuda e pueblo di Dios pa ta mihor prepara pa sirbi Jehova. Ki profecia di Bijbel a papia di e desaroyo aki? Kico ta e cambionan cu abo a mira den e structura di e organisacion? Con bo a beneficia di nan?

“Lo Mi Haci Paz Bira Bo Administradornan”

6, 7. (a) Kico e palabranan na Isaias 60:17 ta nifica? (b) Kico e echo cu e profecia ta menciona “administradornan” y “mayordomonan” ta indica?

⁶ Manera nos a considera den Capitulo 9, Isaias a profetisa cu Jehova lo bendiciona su pueblo. Con? Door di lag’e crece. (Isa. 60:22) Pero Jehova a priminti di haci hasta mas cu esey. Den e mesun profecia ey, el a declara: “Na luga di brons lo mi trece oro, y na luga di hero lo mi trece plata, na luga di palo, brons, y na luga di piedra, hero. Lo mi haci paz bira bo administradornan, y husticia bira bo mayordomonan.” (Isa. 60:17) Kico e profecia ey ta nifica? Con e ta aplica na nos?

⁷ E profecia di Isaias ta indica cu Jehova lo a reemplasa un cierto material pa un otro tipo di material. Pero tuma nota cu e cambionan no ta di un material malo pa uno bon, sino di un bon material pa uno mihor. Si reemplasa brons pa oro, esey ta un mehoracion, y mescos ta conta pa e otro materialnan menciona den e profecia. Pues, Jehova a uza e ilustracion aki pa profetisa cu e condicion di su pueblo lo a mehora gradualmente. Pero e profecia ta referi na mehoracion di kico? E echo cu el a menciona “administradornan” y “mayordomonan” a indica cu e mehoracion gradual ey tabatin di haber cu e manera cu e pueblo di Jehova ta ser cuida y organisa.

8. (a) Ta ken ta tras di e mehoracionnan cu e profecia di Isaias a menciona? (b) Con nos ta beneficia di e mehoracionnan ey? (Wak tambe e cuadro “El A Acepta Coreccion Humildemente.”)

⁸ Pues, ken ta tras di e progreso di e organisacion? Wel, Jehova ta Esun cu a declara: “Lo mi trece oro, ... lo mi trece plata, ... lo mi haci paz bira bo administradornan.” Ta Jehova, y no esfuerso di hende, tabata tras di e progreso cu a tuma luga den e manera di organisa e congregacion. Despues cu Hesus a ser corona como Rey, Jehova a laga e mehoracionnan aki tuma luga via su Yiu. Con nos ta beneficia di e cambionan aki? E mesun texto ey ta bisa cu e mehoracionnan aki lo resulta den “paz” y “husticia.” Ora nos acepta Dios su guia y ahustenan, paz lo reina meymey di nos y amor pa husticia ta motiva nos pa sirbi Jehova, Esun cu apostel Pablo a describi como “e Dios di paz.”—Flp. 4:9.

9. Orden y union den congregacion mester ta funda riba kico, y dicon?

⁹ Ademas, Pablo a bisa di Jehova: “Dios no ta un Dios di desordo, sino di paz.” (1 Cor. 14:33) Tuma nota cu Pablo no a haci un contraste entre desordo cu orden, sino entre desordo cu paz. Dicon? Wel, pensa riba esaki: Orden riba su mes no ta resulta semper den paz. Por ehempel, un grupo di soldaat kisas ta marcha ordenadamente den direccion caminda e bataya lo tuma luga, pero esaki lo no resulta den paz sino den guera. Pesey, como cristian, nos kier tene e siguiente punto clave na mente: Cualkier organisacion cu tin orden pero cu no tin paz como su fundeshi, tardi of trempan ta cay den otro. Na contraste, e paz di Dios ta promove e tipo di orden cu ta dura. Pues, nos ta masha agradecido cu ta “e Dios cu ta duna paz” ta guia nos organisacion y refin’e. (Rom. 15:33) E paz cu Dios ta duna ta e fundeshi di e orden y union sincero cu ta reina entre nos y cu nos ta aprecia asina tanto den nos congregacionnan rond mundo.—Sal. 29:11.

10. (a) Kico ta algun mehoracion cu a tuma luga den nos organisacion durante e prome añanan? (Wak e cuadro “Mehoracion den Supervision.”) (b) Ki preguntanan nos lo bay considera awor?

¹⁰ E cuadro “Mehoracion den Supervision” ta duna un idea di e cambionan probechoso cu a tuma luga den nos organisacion durante e prome añanan. Pero ki cambio di “brons” pa “oro” Jehova a trece via di nos Rey den tempo mas recien? Con e ahustenan ey relaciona cu supervision den e congregacion a fortifica e paz y union di e congregacionnan rond mundo? Con nan ta yuda abo sirbi “e Dios di paz”?

E Manera Cu Cristo Ta Dirigi e Congregacion

11. (a) Un estudio di e Scritura a hiba na ki ahuste den comprondemento? (b) Kico e rumannan di e cuerpo gobernante tabata determina pa haci?

¹¹ Di 1964 pa 1971, e cuerpo gobernante a supervisa un proyecto di estudio di Bijbel cu a analisa hopi tema, y un di nan tabata e manera cu e congregacion cristian di e prome siglo tabata funciona.a Pa loke ta trata e manera cu e congregacionnan di prome siglo tabata funciona, nan a haya sa cu supervision di e congregacion tabata na encargo di un cuerpo di anciano en bes di den man di un solo anciano, of superintendente. (Lesa Filipensenan 1:1; 1 Timoteo 4:14.) Unabes cu e cuerpo gobernante a compronde e punto ey mihor, nan a realisa cu ta nan Rey Hesus tabata guia nan pa mehora e structura di e organisacion di e pueblo di Dios, y e rumannan di e cuerpo gobernante tabata determina pa sigui direccion di nan Rey. Di biaha nan a haci ahuste pa e organisacion por tabata mas na harmonia cu e patronchi biblico di nombra anciano. Cua ta algun di e ahustenan cu nan a haci na cuminsamento di decada di 1970?

12. (a) Ki ahuste a tuma luga den e cuerpo gobernante? (b) Describi e structura actual di e Cuerpo Gobernante. (Wak e cuadro “E Manera Cu e Cuerpo Gobernante Ta Percura pa e Interesnan di Reino.”)

¹² E prome ahuste tabata en conexion cu e cuerpo gobernante mes. Prome cu 1971, e grupo aki di ruman homber ungi tabata consisti di e shete miembronan di e hunta di directiva di Watch Tower Bible and Tract Society of Pennsylvania. Pero na 1971, nan a hisa e cantidad di miembro di e cuerpo gobernante di 7 pa 11, y e miembronan no tabata forma parti mas di e hunta di directiva. E miembronan a considera cu nan tur ta igual, y pesey cada un tabata haya beurt, den orden alfabetico, pa fungi como presidente di e cuerpo pa un aña.

13. (a) Ki areglo tabata na vigor pa 40 aña? (b) Kico e Cuerpo Gobernante a haci na 1972?

¹³ E siguiente ahuste tabatin impacto riba tur congregacion. Con asina? Wel, di 1932 pa 1972, ta un ruman homber so tabata principalmente encarga cu supervision di e congregacion. Te cu 1936 tabata yama e ruman nombra ey director di sirbishi. E nomber a cambia prome pa sirbidor di compania, despues pa sirbidor di congregacion y finalmente pa superintendente di congregacion. E ruman hombernan nombra ey tabata atende e bienestar spiritual di e tou cu hopi entusiasmo. E superintendente di congregacion normalmente tabata tuma decision pa e congregacion sin consulta cu e otro sirbidornan den congregacion cu tabata yud’e. Pero durante aña 1972, e Cuerpo Gobernante a habri caminda pa un cambio historico. Kico e cambio ey a encera?

14. (a) Ki areglo nobo a drenta na vigor dia 1 di october 1972? (b) Con e coordinador di e cuerpo di anciano ta aplica e conseho cu tin na Filipensenan 2:3?

¹⁴ Awor supervision di cada congregacion lo no tabata na encargo di un ruman homber so sino di un cuerpo di anciano cu a consisti di rumannan cu tin e cualificacionnan biblico y cu a ser nombra teocraticamente. E areglo nobo di anciano ey a drenta na vigor dia 1 di october 1972. Actualmente, e coordinador di e cuerpo di anciano no ta considera su mes mas importante cu e otro ancianonan; mas bien, e ta considera su mes “esun di mas chikito.” (Luc. 9:48) E ruman hombernan humilde ey ta un gran bendicion pa nos hermandad mundial.—Flp. 2:3.

15. (a) Menciona e beneficionan cu e areglo di un cuerpo di anciano den congregacion a trece cu ne. (b) Kico ta demostra cu nos Rey a actua sabi?

¹⁵ E areglo di comparti responsabilidad di e congregacion entre miembronan di un cuerpo di anciano a resulta di ta un gran mehoracion. Laga nos wak tres beneficio: Na prome luga y lo principal ta cu e areglo ta yuda tur anciano—maske con importante nan responsabilidadnan di congregacion por ta—pa keda consciente di e echo cu ta Hesus ta Cabes di e congregacion. (Efe. 5:23) Di dos beneficio ta loke Proverbionan 11:14 ta bisa: “Caminda tin hopi consehero tin victoria.” Ancianonan tin cu tuma decisionnan cu lo influencia e bienestar spiritual di e congregacion. Ora nan ta consulta cu otro y ta tene cuenta cu e sugerencianan di otro, esey ta yuda nan yega na decisionnan cu ta na harmonia cu principio biblico. (Prov. 27:17) Jehova ta bendiciona e tipo di decisionnan ey, y esaki ta duna bon resultado. Di tres bendicion ta cu e organisacion por a atende e creciente necesidad cu tabatin di supervisa y pastorea e congregacionnan, ya cu tabatin mas ruman cualifica pa sirbi como anciano. (Isa. 60:3-5) Imagina bo: E cantidad di congregacion rond mundo a subi di 27.000 y pico na 1971 pa mas cu 113.000 na 2013. Pues, ta bisto cu nos Rey den su sabiduria a percura pa su siguidornan haya e wardadornan necesario na e debido tempo.—Mik. 5:5.

“Bira Ehempel pa e Tou”

16. (a) Ki responsabilidad ancianonan tin? (b) Con e Studiantenan di Bijbel a mira Hesus su conseho pa pastorea of “cuida [e] lamchinan”?

¹⁶ Ya for di tempo di e Studiantenan di Bijbel, e ancianonan tabata compronde cu nan tabatin e responsabilidad di yuda nan rumannan den fe sigui sirbi Dios. (Lesa Galationan 6:10.) Na 1908, un articulo den E Toren di Vigilancia a trata e conseho di Hesus: “Cuida mi lamchinan.” (Juan 21:15-17) E articulo a bisa e ancianonan: “Ta masha importante pa e encargo cu e Doño a duna relaciona cu e tou haya un luga importante den nos curason. Nos tin cu mira e responsabilidad di alimenta y cuida e siguidornan di nos Señor como un gran privilegio.” Na 1925, E Toren di Vigilancia a bolbe enfatisa e importancia di sirbi como wardador ora el a recorda e ancianonan: “Dios ta doño di e congregacion, ... y e lo tene tur esnan cu tin e privilegio di sirbi e rumannan responsabel.”

17. Ki yudansa e superintendentenan a haya pa bira wardadornan capacita?

¹⁷ Con e organisacion di Jehova a yuda ancianonan mehora den nan trabou di pastorea, cu otro palabra, mehora e calidad di e trabou di “hero” pa “plata”? Esey ta door di percura entrenamento. Na 1959, nan tabatin e prome Scol di Ministerio di Reino pa superintendentenan. Un discurso di e curso ey a trata e tema “Duna Atencion Personal na e Carnenan.” E parti a anima e rumannan responsabel pa “traha un programa pa bishita e publicadornan na cas.” E discurso aki a trata varios manera cu e ancianonan por a haci e bishitanan ey edificante. Na 1966 a cuminsa cu un Scol di Ministerio di Reino actualisa. Nan a trata e tema “E Importancia di e Trabou di Pastorea.” Kico tabata e punto principal di e les ey? E rumannan cu ta dirigi e congregacion “mester yuda percura cuido amoroso pa e tou di Dios, pero sin descuida nan propio famia ni sirbishi di veld.” Den añanan mas recien a tene mas scol pa anciano. Kico tabata e resultado di e entrenamento continuo cu e organisacion di Jehova a percura? Actualmente, e congregacion cristian tin miles di ruman homber capacita cu ta sirbi como wardador spiritual.

18. (a) Ki responsabilidad importante ancianonan a haya? (b) Dicon Jehova cu Hesus tin masha cariño pa e ancianonan cu ta traha duro?

¹⁸ Jehova, via nos Rey Hesus, a nombra anciano cristian pa cumpli cu un responsabilidad importante. Kico e responsabilidad ey ta? Esey ta pa dirigi e carnenan di Dios durante e tempo di mas critico den historia di humanidad. (Efe. 4:11, 12; 2 Tim. 3:1) Jehova cu Hesus tin hopi cariño pa e ancianonan cu ta traha duro, pasobra e rumannan aki ta obedece e conseho biblico pa “pastorea e tou di Dios cu ta bou di [nan] cuido ... di buena gana; ... cu entusiasmo; ... [siendo] ehempel pa e tou.” (1 Ped. 5:2, 3) Laga nos wak dos di e tantisimo maneranan cu wardador di carne cristian ta un ehempel pa e tou y ta contribui na e paz y goso di e congregacion.

E Manera Cu Ancianonan Ta Pastorea e Tou di Dios Awe

19. Kico nos ta pensa di e ancianonan cu ta traha hunto cu nos den sirbishi?

¹⁹ Di prome, e ancianonan ta traha den sirbishi cu e miembronan di e congregacion. Lucas, un escritor di Evangelio, a skirbi: “Hesus a cuminsa biaha di stad pa stad y di pueblito pa pueblito, predicando y anunciando e bon noticia di e Reino di Dios. Y e 12 apostelnan tabata hunto cu ne.” (Luc. 8:1) Mescos cu Hesus a predica hunto cu su apostelnan, awe tambe ancianonan ehemplar ta traha hunto cu nan rumannan den fe den e trabou di predica. Nan ta realisa cu ora nan ta haci esey, nan ta contribui na e bon spirito di e congregacion. Kico e rumannan ta pensa di ancianonan asina? Jeannine, un ruman muher di casi 90 aña, a comenta: “Ora mi traha cu un anciano den sirbishi di veld, mi ta haya un bon chens pa combersa cu ne y siña conoc’e mihor.” Steven, un ruman homber di mas o menos 35 aña a bisa: “Ora un anciano traha hunto cu mi den e trabou di cas pa cas, mi ta sinti cu e kier yuda mi y esey ta haci mi hopi contento.”

20, 21. Con e ancianonan por imita e wardador di carne den e ilustracion di Hesus? Duna un ehempel. (Wak tambe e cuadro “Bishitanan Semanal Ta Duna Fruta.”)

²⁰ Di dos, e organisacion di Jehova a entrena e ancianonan pa mustra interes den e rumannan cu a perde contacto cu e congregacion. (Heb. 12:12) Dicon e ancianonan mester yuda e rumannan spiritualmente debil ey, y con nan mester haci esey? E ilustracion di Hesus tocante un wardador di carne y un carne perdi ta duna nos e contesta. (Lesa Lucas 15:4-7.) Ora e wardador den e ilustracion a ripara cu tabata falta un carne, el a bay busca e carne perdi comosifuera esey ta e unico carne cu e tin. Con ancianonan cristian ta imita e ehempel di e wardador di carne ey? Mescos cu e carne perdi ainda ta valioso den bista di e wardador, asina e rumannan cu a perde contacto cu e pueblo di Dios ainda ta valioso den bista di e ancianonan. Nan ta considera un persona spiritualmente debil como un carne perdi, no un caso perdi. Ademas, mescos cu e wardador ta “bay busca esun perdi te ora e hay’e”, asina ancianonan ta tuma iniciativa pa bay busca e rumannan cu ta debil y yuda nan.

²¹ Kico e wardador di carne den e ilustracion di Hesus a haci ora el a haya e carne? Suavemente, el a “pon’e riba su schouder” y hib’e bek na e tou. Asina tambe, un anciano su palabranan sincero di interes y preocupacion por anima un ruman spiritualmente debil, y yud’e bolbe na e congregacion. Esey ta loke a pasa cu Victor, un ruman homber na Africa cu a stop di asocia cu e congregacion. El a conta: “Durante e ocho añanan cu mi tabata inactivo, e ancianonan a sigui busca manera pa yuda mi.” Kico ta e cos cu mas a conmov’e? El a splica: “Un dia, John, un anciano cu mi a bay Scol di Sirbishi di Pionero cu ne, a tuma tempo pa bishita mi y a mustra mi algun potret cu el a saca di nos durante e scol. E potretnan ey a trece asina tanto bunita recuerdo cu mi a cuminsa anhela e goso cu mi tabata sinti tempo mi tabata sirbi Jehova.” Poco despues di e bishita di John, Victor a bolbe na e congregacion. Awe e ta sirbi atrobe como pionero. En berdad, ancianonan amoroso ta contribui na nos goso.—2 Cor. 1:24.b

Mihor Supervision Ta Fortalece e Union di e Pueblo di Dios

22. Con husticia y paz ta fortalece e union di e congregacion cristian? (Wak tambe e cuadro “Nos A Keda Impresiona.”)

²² Manera nos a menciona anteriormente, Jehova a profetisa cu husticia y paz lo aumenta gradualmente den su pueblo. (Isa. 60:17) Tur e dos cualidadnan aki ta fortalece e union di e congregacionnan. Con? Pa loke ta trata husticia, Bijbel ta bisa cu “SEÑOR, nos Dios, ta ún SEÑOR.” (Deu. 6:4, BPK, nota) Pues, su normanan husto den e congregacionnan no ta varia di un pais pa otro. Ta un set di norma Jehova tin encuanto loke ta bon y loke ta malo, y nan ta mescos “den tur congregacion di e santonan.” (1 Cor. 14:33) Pues, un congregacion lo bay bon solamente ora e rumannan ta aplica e normanan di Dios. Y pa loke ta trata paz, nos Rey kier pa nos disfruta di paz den congregacion pero tambe pa nos ta personanan “cu ta haci paz.” (Mat. 5:9, nota) Pues, nos ta “haci esfuerso pa busca e cosnan cu ta promove paz.” Nos ta tuma iniciativa pa soluciona desacuerdo cu por surgi entre nos. (Rom. 14:19) Di e manera ey, nos ta contribui na paz y union di nos congregacion.—Isa. 60:18.

23. Como sirbidornan di Jehova, kico nos ta disfruta di dje awe?

²³ Na november 1895, tempo cu E Toren di Vigilancia a anuncia e prome areglo di anciano, e rumannan responsabel a expresa un deseo sincero cu nan tabatin. Kico esey tabata? Nan a desea, y a pidi Jehova, pa e areglo nobo aki relaciona cu structura di e organisacion por a yuda e pueblo di Dios “yega rapidamente na un fe uni.” Ora nos wak e decadanan cu a pasa desde e tempo ey, nos ta keda masha agradecido. Dicon? Pasobra e refinamentonan gradual cu Jehova a haci via nos Rey relaciona cu supervision di e congregacion a yuda nos bira mas uni den adoracion. (Sal. 99:4) Como resultado, awe henter e pueblo di Jehova na tur parti di mundo ta alegra, segun cu nos ta “demostra e mesun actitud”, “actua di e mesun manera” y sirbi e “Dios di paz” “lado a lado.”—2 Cor. 12:18; lesa Filipensenan 1:27.